ದಿಢೀರ್​ ಭಾರತಕ್ಕೆ ಮರಳಿದ ಗಂಭೀರ್​: ಟೀಮ್​ ಇಂಡಿಯಾ ಮುಖ್ಯ ಕೋಚ್​ ತಾಯಿಗೆ ಅನಾರೋಗ್ಯ

ಬೆಕೆನ್​ಹ್ಯಾಮ್​: ಭಾರತ ತಂಡದ ಮುಖ್ಯ ಕೋಚ್​ ಗೌತಮ್​ ಗಂಭೀರ್​ ತನ್ನ ಕುಟುಂಬದಲ್ಲಿನ ತುರ್ತು ವೈದ್ಯಕಿಯ ಪರಿಸ್ಥಿತಿಯಿಂದಾಗಿ ಇಂಗ್ಲೆಂಡ್​ನಿಂದ ನವದೆಹಲಿಗೆ ವಾಪಸ್​ ಆಗಿದ್ದಾರೆ. ಗಂಭೀರ್​ ಅನುಪಸ್ಥಿತಿಯಲ್ಲಿ ಭಾರತ ಹಾಗೂ ಭಾರತ ಎ ತಂಡಗಳು ಆಂತರಿಕ ಅಭ್ಯಾಸ ಪಂದ್ಯವನ್ನಾಡಲಿದ್ದು, ಸಹಾಯಕ ಕೋಚ್​ ರ್ಯಾನ್​ ಟೆನ್​ ಡೋಶೆಟ್​ ಭಾರತ ತಂಡಕ್ಕೆ ಮಾರ್ಗದರ್ಶನ ನೀಡಲಿದ್ದಾರೆ. ಸೀತಾಂಶು ಕೋಟಕ್​ (ಬ್ಯಾಟಿಂಗ್​ ಕೋಚ್​), ಮಾರ್ನ್​ ಮಾರ್ಕೆಲ್​ (ಬೌಲಿಂಗ್​ ಕೋಚ್​), ಟಿ. ದಿಲೀಪ್​ (ಫೀಲ್ಡಿಂಗ್​ ಕೋಚ್​) ತರಬೇತಿ ಬಳಗದ ಇತರ ಸದಸ್ಯರಾಗಿದ್ದಾರೆ.

ಗಂಭೀರ್​ ಅವರ ತಾಯಿ ಸೀಮಾ ಗಂಭೀರ್​ ಬುಧವಾರ ಹೃದಯಾಘಾತಕ್ಕೆ ಒಳಗಾಗಿದ್ದು, ಸದ್ಯ ನವದೆಹಲಿಯ ಖಾಸಗಿ ಆಸ್ಪತ್ರೆಯ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಗುರುವಾರವೇ ಭಾರತಕ್ಕೆ ಹಿಂದಿರುಗಿರುವ ಗಂಭೀರ್​ ತಾಯಿಯ ಜತೆಯಲ್ಲಿದ್ದು, ಅವರು ಬೇಗನೆ ಚೇತರಿಸಿಕೊಳ್ಳುವ ಸಾಧ್ಯತೆಗಳಿವೆ ಎಂದು ಅವರ ಆಪ್ತ ಮೂಲಗಳು ತಿಳಿಸಿವೆ. ಜೂನ್​ 20ರಿಂದ ಲೀಡ್ಸ್​ನಲ್ಲಿ ಇಂಗ್ಲೆಂಡ್​ ವಿರುದ್ಧ ಐದು ಪಂದ್ಯಗಳ ಸರಣಿ ಆರಂಭವಾಗಲಿದ್ದು, ಮೊದಲ ಟೆಸ್ಟ್​ಗೆ ಮುನ್ನ ಗಂಭೀರ್​ ತಂಡ ಕೂಡಿಕೊಳ್ಳುವ ನಿರೀಕ್ಷೆ ಇದೆ. ಆದರೆ ಸದ್ಯದ ಪರಿಸ್ಥಿತಿಯಲ್ಲಿ ಗಂಭೀರ್​ ತಂಡ ಸೇರ್ಪಡೆಯಾಗುವ ನಿಖರ ದಿನಾಂಕ ತಿಳಿದುಬಂದಿಲ್ಲ. ಜತೆಗೆ ಅವರ ತಾಯಿಯ ಆರೋಗ್ಯ ಸುಧಾರಣೆಯ ಮೇಲೆ ಇಂಗ್ಲೆಂಡ್​ಗೆ ಮರುಪ್ರಯಾಣ ಅವಲಂಬಿತವಾಗಿದೆ ಎನ್ನಲಾಗಿದೆ. ಜೂನ್​ 6ರಂದು ಭಾರತದ ಪ್ರಧಾನ ತಂಡದೊಂದಿಗೆ ಗಂಭೀರ್​ ಇಂಗ್ಲೆಂಡ್​ಗೆ ತೆರಳಿದ್ದರು. ಭಾರತ ಎ ತಂಡಕ್ಕೆ ಹೃಷಿಕೇಶ್​ ಕಾನಿಟ್ಕರ್​ ಮುಖ್ಯ ಕೋಚ್​ ಆಗಿದ್ದಾರೆ.