VIDEO | ಕನ್ನಡಿಗ ಜಾವಗಲ್​ ಶ್ರೀನಾಥ್​ ಬರ್ತ್​ಡೇಗೆ ವಿಶೇಷ ವಿಡಿಯೋ ಹಂಚಿಕೊಂಡ ಯುವರಾಜ್​ ಸಿಂಗ್​

ಬೆಂಗಳೂರು: ಭಾರತೀಯ ಕ್ರಿಕೆಟ್​ ಇತಿಹಾಸ ಕಂಡ ಅತ್ಯುತ್ತಮ ವೇಗಿಗಳಲ್ಲಿ ಪ್ರಮುಖರಾದ ಜಾವಗಲ್​ ಶ್ರೀನಾಥ್​ ಅವರಿಗೆ ಸೋಮವಾರ 51ನೇ ಜನ್ಮದಿನದ ಸಂಭ್ರಮ. ಇದೇ ವೇಳೆ ಕ್ರಿಕೆಟ್​ ವಲಯ ಮತ್ತು ಅಭಿಮಾನಿಗಳಿಂದ ಶುಭಾಶಯಗಳ ಸುರಿಮಳೆ ಹರಿದಿದೆ. ಈ ನಡುವೆ ಕನ್ನಡಿಗ ಜಾವಗಲ್​ ಶ್ರೀನಾಥ್​ ಅವರ ಮಾಜಿ ಸಹ-ಆಟಗಾರ ಹಾಗೂ ಟೀಮ್​ ಇಂಡಿಯಾ ಮಾಜಿ ಆಲ್ರೌಂಡರ್​ ಯುವರಾಜ್​ ಸಿಂಗ್​ ಅವರು ವಿಶೇಷ ವಿಡಿಯೋ ಒಂದನ್ನು ಹಂಚಿಕೊಂಡು ಶುಭಾಶಯ ತಿಳಿಸಿದ್ದಾರೆ.

ಶ್ರೀನಾಥ್ ಅವರು 2003ರಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಿದ್ದರೂ, 2017ರಲ್ಲೂ ಅವರು ಟೀಮ್​ ಇಂಡಿಯಾದ ಅಭ್ಯಾಸದ ಜೆರ್ಸಿ ಧರಿಸಿಯೇ ಟ್ರೆಡ್​ಮಿಲ್​ನಲ್ಲಿ ಓಡುವ ಮೂಲಕ ಫಿಟ್ನೆಸ್​ ಕಾಯ್ದುಕೊಳ್ಳಲು ಗಮನ ಹರಿಸಿರುವ ವಿಡಿಯೋವನ್ನು ಯುವರಾಜ್​ ಸಿಂಗ್​ ಹಂಚಿಕೊಂಡಿದ್ದಾರೆ. ಜತೆಗೆ ಟೀಮ್​ ಇಂಡಿಯಾ ಪರ ಅವರ ಬದ್ಧತೆಯನ್ನು ಪ್ರಶಂಸಿಸಿದ್ದಾರೆ.

'ಟೀಮ್​ ಇಂಡಿಯಾ ಪರ ನಿಮಗಿರುವ ಪ್ರೀತಿಯನ್ನು ತೋರಿಸುವ ಸಲುವಾಗಿ ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳದೇ ಇರಲು ಸಾಧ್ಯವಾಗಲಿಲ್ಲ. ಭಾರತೀಯ ಕ್ರಿಕೆಟ್​ನ ದಿಗ್ಗಜರಲ್ಲಿ ಇವರೂ ಒಬ್ಬರು. ನಿಮ್ಮೊಂದಿಗೆ ಡ್ರೆಸ್ಸಿಂಗ್ ರೂಮ್​ ಹಂಚಿಕೊಂಡಿರುವುದು ನನ್ನ ಭಾಗ್ಯ. ಹ್ಯಾಪಿ ಬರ್ತ್​ಡೇ ಶ್ರೀನಾಥ್​. ನಿಮ್ಮ ಈ ವಿಡಿಯೋವನ್ನು ನೋಡಿ ಮಾಜಿ ಸಹ-ಆಟಗಾರರಾದ ಸಚಿನ್​ ತೆಂಡುಲ್ಕರ್​, ಸೌರವ್​ ಗಂಗೂಲಿ ಮತ್ತು ಹರ್ಭಜನ್ ಸಿಂಗ್​ ಖುಷಿ ಪಡುವರು' ಎಂದು ಯುವರಾಜ್​ ಸಿಂಗ್​ ಟ್ವಿಟರ್​ನಲ್ಲಿ ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ:  ಐಪಿಎಲ್​ ಟೂರ್ನಿಗೆ ಆರ್​ಸಿಬಿ ತಂಡದ ಹೊಸ ಜೆರ್ಸಿ ಅನಾವರಣ

ಯುವರಾಜ್​ ಸಿಂಗ್​ ಅವರ ವಿಡಿಯೋಗೆ ಕರ್ನಾಟಕದ ಮಾಜಿ ವೇಗದ ಬೌಲರ್​ ದೊಡ್ಡ ಗಣೇಶ್​ ಕಮೆಂಟ್​ ಹಾಕಿದ್ದು, 'ಈ ವಿಡಿಯೋವನ್ನು ಹಂಚಿಕೊಂಡಿರುವುದಕ್ಕೆ ಧನ್ಯವಾದಗಳು ಯುವರಾಜ್​. ಶ್ರೀನಾಥ್​ ಟ್ರೇನಿಂಗ್​ನಲ್ಲಿರುವುದನ್ನು ನೋಡಿದರೆ ಸಕ್ರಿಯ ಕ್ರಿಕೆಟಿಗರಂತೆ ಕಾಣಿಸುತ್ತಿದ್ದಾರೆ. ಇದುವೇ ಜಾವಗಲ್ ಶ್ರೀನಾಥ್​ ಅವರ ಬದ್ಧತೆ' ಎಂದು ಬರೆದುಕೊಂಡಿದ್ದಾರೆ.