ಕರೊನಾ ಎಫೆಕ್ಟ್​: ಅವನ ಮದುವೆಗೆ ಅವನೇ ಓಲಗದವ! ವಿಡಿಯೋ ವೈರಲ್

ಬೆಂಗಳೂರು: ಕರೊನಾದಿಂದಾಗಿ ಜನ ಜೀವನ ಏರುಪೇರಾಗಿದೆ. ಈ ಸಮಯದಲ್ಲಿ ಮದುವೆ ನಿಶ್ಚಯಿಸಿಕೊಂಡವರಂತೂ ನೂರು ಬಾರಿ ಯೋಚಿಸಿ ಆಮಂತ್ರಣ ನೀಡುವಂತಾಗಿದೆ. ಮದುವೆಗೆ ಇಷ್ಟೇ ಜನ ಬರಬೇಕೆಂಬ ನಿಯಮವಿರುವದರಿಂದಾಗಿ ಆಡಂಭರವಿಲ್ಲದೆ, ಕೇವಲ ಕುಟುಂಬದ ಸದಸ್ಯರ ಸಮ್ಮುಖದಲ್ಲಿ ಮದುವೆಯಾಗುವಂತಾಗಿದೆ. ಅದೇ ರೀತಿ ಮದುವೆಯಾದ ವ್ಯಕ್ತಿಯೊಬ್ಬ ತನ್ನ ಮದುವೆಯಲ್ಲಿ ತಾನೇ ಓಲಗದವರೊಂದಿಗೆ ಸೇರಿ ಬ್ಯಾಂಡ್​ ಬಾರಿಸುತ್ತಿರುವ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದೆ.

ಮದುಮಗ ಕೊರಳಿಗೆ ಬ್ಯಾಂಡ್​ ಹಾಕಿಕೊಂಡು ಬಾರಿಸುತ್ತಿದ್ದಾನೆ. ವಧು ಅಲ್ಲೇ ವರನ ಪಕ್ಕದಲ್ಲೇ ನಿಂತು ನೋಡುತ್ತಿದ್ದಾಳೆ. ಇದರ 30 ಸೆಕೆಂಡಿನ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದ್ದು, ಭಾರೀ ವೈರಲ್​ ಆಗಿದೆ. ಈ ವರನಿಗೆ ಅನೇಕರು ಆತ್ಮನಿರ್ಭರ ವರ ಎಂದು ಕರೆದಿದ್ದರೆ ಇನ್ನು ಕೆಲವರು ಲಾಕ್​ಡೌನ್​ ಸಮಯದಲ್ಲಿ ಮದುವೆಯಾದರೆ ಹೀಗೇ ಆಗುವುದು ಎಂದು ಕಾಲೆಳೆದಿದ್ದಾರೆ.

ವಿಡಿಯೋದಲ್ಲಿರುವ ಜೋಡಿ ಎಲ್ಲಿಯದು, ಅವರ ಹೆಸರೇನು ಎನ್ನುವ ಬಗ್ಗೆ ಯಾವುದೇ ಮಾಹಿತಿಯಿಲ್ಲ. ಆದರೆ ಈ ಸಮಯಕ್ಕೆ ತಕ್ಕಂತ ವಿಡಿಯೋ ಇದಾಗಿರುವುದರಿಂದಾಗಿ ಹೆಚ್ಚಿನ ಜನರು ಆಸಕ್ತಿಯಿಂದ ವಿಡಿಯೋವನ್ನು ಹಂಚಿಕೊಳ್ಳಲಾರಂಭಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/doctor-seen-in-video-found-dead/