ಮಂಗಳೂರು ಹಾಗೂ ಮೂಡುಬಿದಿರೆ ನಡುವೆ ಸರ್ಕಾರಿ ಬಸ್ ಸಂಚಾರಕ್ಕಿದ್ದ ತೊಡಕು ನಿವಾರಣೆಯಾಗಿದೆ. ಈ ರೂಟ್ನಲ್ಲಿ ಸರ್ಕಾರಿ ಬಸ್ ಸಂಚಾರಕ್ಕೆ ವ್ಯವಸ್ಥೆ ಮಾಡುವಂತೆ ಕೋರ್ಟ್ ಆದೇಶ ನೀಡಿದೆ.
ಮಂಗಳೂರು-ಮೂಡುಬಿದಿರೆ ಮಾರ್ಗದ ಗುರುಪುರ ಹೊಸ ಸೇತುವೆ ನಿರ್ಮಾಣದ ಬಳಿಕ ಮಂಗಳೂರು-ಮೂಡುಬಿದಿರೆ ಪ್ರಯಾಣಿಸುವ ಒಟ್ಟು ಎಂಟು ಕೆಎಸ್ಆರ್ಟಿಸಿ ಬಸ್ಗಳಿಗೆ ಜಿಲ್ಲಾಡಳಿತದಿಂದ ಪರವಾನಗಿ ತಡೆಹಿಡಿಯಲಾಗಿತ್ತು. ವಿಭಜಿತ ದ.ಕ ಜಿಲ್ಲೆಯ ಖಾಸಗಿ ಸಂಚಾರ ಲಾಬಿ ಮಧ್ಯೆ ಕೆಎಸ್ಆರ್ಟಿಸಿಗೆ ಈ ನಿರ್ಧಾರ ಹಿನ್ನಡೆಯಾಗಿದ್ದರಿಂದ ಜಿಲ್ಲಾ ಸಾರಿಗೆ ಸಂಚಾರ ಪರವಾನಗಿ ಸಮಿತಿ ನಿರ್ಧಾರವನ್ನು ಪ್ರಶ್ನಿಸಿ ಕೆಎಸ್ಆರ್ಟಿಸಿ ಕೋರ್ಟ್ ಮೊರೆ ಹೋಗಿತ್ತು.
ಈ ಹಿಂದೆ ಮೂಡುಬಿದಿರೆ ಮಾರ್ಗದಲ್ಲಿ ಗುರುಪುರ ಹಳೇ ಸೇತುವೆ ದುರ್ಬಲವಾಗಿದೆ ಎಂದು ಕೆಎಸ್ಆರ್ಟಿಸಿ ಬಸ್ಗೆ ದೊರೆತ ಪರವಾನಗಿ ತಡೆಹಿಡಿಯಲಾಗಿತ್ತು. ಹೊಸ ಸೇತುವೆ ನಿರ್ಮಾಣ ಅಥವಾ ಹಳೇ ಸೇತುವೆ ದುರಸ್ತಿ ಬಳಿಕ ಬಸ್ಗಳಿಗೆ ಟ್ರಿಪ್ ಓಡಿಸಲು ಸಾರಿಗೆ ಇಲಾಖೆಯಿಂದ ಕೆಎಸ್ಆರ್ಟಿಸಿಗೆ ಪರವಾನಗಿ ನೀಡುವ ಭರವಸೆಯನ್ನೂ ನೀಡಲಾಗಿತ್ತು. ಆದರೆ ಖಾಸಗಿ ಬಸ್ಗಳಿಗೆ ಯಾವುದೇ ನಿರ್ಬಂಧ ವಿಧಿಸದೆ ಸಂಚಾರಕ್ಕೆ ವ್ಯವಸ್ಥೆ ಮಾಡಿರುವುದರಿಂದ ಇದೊಂದು ಖಾಸಗಿ ಬಸ್ ಲಾಬಿ ಎಂಬ ಆರೋಪ ಕೇಳಿ ಬಂದಿತ್ತು. ಇದಾಗಿ ವರ್ಷಗಳ ಬಳಿಕ ಗುರುಪುರ ಹೊಸ ಸೇತುವೆ ನಿರ್ಮಾಣ ಬಳಿಕ ಈ ನಿರ್ಬಂಧ ತೆರವುಗೊಂಡಿತ್ತು. ನಂತರ ಎಂಟು ಬಸ್ಗಳಿಗೆ 56 ಟ್ರಿಪ್ ಓಡಿಸಲು ಕೆಎಸ್ಆರ್ಟಿಸಿ ಪರವಾನಗಿ ಕೇಳಿತ್ತು. ಆದರೆ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರ, ಪೊಲೀಸ್ ಇಲಾಖೆ, ಜಿಲ್ಲಾಡಳಿತದ ಜಂಟಿ ಸಮಿತಿ ಸೀಮಿತ ಟ್ರಿಪ್ ಓಡಿಸಲು ಮಾತ್ರ ಅವಕಾಶ ನೀಡಿತ್ತು. ಈ ಕ್ರಮದ ವಿರುದ್ಧ ಕೆಎಸ್ಆರ್ಟಿಸಿ ನ್ಯಾಯಾಲಯದ ಮೆಟ್ಟಿಲೇರಿತ್ತು.
