Google Map ​ಅವಾಂತರ; ಪೊಲೀಸರನ್ನೇ ಬಂಡುಕೋರರೆಂದು ತಿಳಿದು ಒತ್ತೆಯಾಳಾಗಿ ಇರಿಸಿಕೊಂಡ ಸ್ಥಳೀಯರು

ಗುವಾಹಟಿ: ಯಾವುದಾದರೂ ಸ್ಥಳಕ್ಕೆ ಹೋಗಬೇಕಾದಾಗ, ಯಾವುದಾದರೂ ಸ್ಥಳವನ್ನು ನೋಡಿ ತಿಳಿಯಬೇಕಾದಾಗ ಸಾಮಾನ್ಯವಾಗಿ ನಾವೆಲ್ಲ ಒಂದಲ್ಲ ಒಂದು ಸಲ ಗೂಗಲ್ ಮ್ಯಾಪ್ (Google Map)​, ಗೂಗಲ್​ ಸರ್ಚ್​ನ ಮೊರೆ ಹೋಗುತ್ತೇವೆ. ಅದರಲ್ಲೂ ಗೂಗಲ್​ ಮ್ಯಾಪ್ ಹೆಚ್ಚಾಗಿ ಬಳಕೆ ಮಾಡುತ್ತೇವೆ. ಆದರೆ, ಗೂಗಲ್​ ಮ್ಯಾಪ್​ ಬಳಸುವಾಗ ಸ್ವಲ್ಪ ಎಚ್ಚರ ತಪ್ಪಿದರೆ ಏನಾಗಬಹುದು ಎಂಬುದಕ್ಕೆ ಅಸ್ಸಾಂನಲ್ಲಿ ನಡೆದಿರುವ ಈ ಘಟನೆ ಜೀವಂತ ಸಾಕ್ಷಿಯಾಗಿದೆ.

ಪ್ರಕರಣ ಒಂದರ ತನಿಖೆ ನಡೆಸುದಾಗ ಅಸ್ಸಾಂ ಪೊಲೀಸರು ಸ್ಥಳ ಒಂದಕ್ಕೆ ತೆರಳುವಾಗ ಗೂಗಲ್ ಮ್ಯಾಪ್‌ನ (Google Map) ಸಹಾಯ ಪಡೆದಿದ್ದಾರೆ. ಮ್ಯಾಪ್​ ತೋರಿಸಿದ ದಾರಿಯಲ್ಲಿ ಅಧಿಕಾರಿಗಳು ತೆರಳಿದ್ದು, ಆ ಬಳಿಕ ನಾಗಾಲ್ಯಾಂಡ್​ನ ಮೊಕೊಕ್‌ಚುಂಗ್ ಜಿಲ್ಲೆಯನ್ನು ಪ್ರವೇಶಿಸಿದ್ದು, ಸ್ಥಳೀಯರಿಂದ ಬಂಧಿಯಾದ ಘಟನೆ ವರದಿಯಾಗಿದೆ. 

ಅಸ್ಸಾಂ ಪೊಲೀಸ್​ನ ಹಿರಿಯ ಅಧಿಕಾರಿಯ ಪ್ರಕಾರ ಜನವರಿ 06ರಂದು ಈ ಘಟನೆ ನಡೆದಿದ್ದು, ಜೋರ್ಹತ್ ಜಿಲ್ಲಾ ಪೊಲೀಸ್ ಅಧಿಕಾರಿಗಳ ತಂಡವು ಆರೋಪಿಯೊಬ್ಬನನ್ನು ಬಂಧಿಸಲು ಹೊರಟಾಗ ಆತ ಟೀ ಗಾರ್ಡನ್​ ಒಂದರಲ್ಲಿ ಬಚ್ಚಿಟ್ಟುಕೊಂಡಿರುವುದಾಗಿ ಮಾಹಿತಿ ಲಭಿಸಿದೆ. ಅದರಂತೆ ಅಧಿಕಾರಿಗಳು ಗೂಗಲ್​ ಮ್ಯಾಪ್​ನಲ್ಲಿ (Google Map) ತೋರಿಸಿದ ದಾರಿಯಲ್ಲಿ ತೆರಳಿದ್ದು, ನಾಗಾಲ್ಯಾಂಡ್​​ ಪ್ರವೇಶಿಸಿದ್ದಾರೆ. 

ತಂಡದಲ್ಲಿದ್ದ ಬಹುತೇಕ ಅಧಿಕಾರಿಗಳು ಸಮವಸ್ತ್ರ ಧರಿಸದ ಕಾರಣ ಅಲ್ಲಿನ ಸ್ಥಳೀಯರು ಇವರನ್ನು ಬವಂಡುಕೋರರು ಎಂದು ಭಾವಿಸಿ ದಾಳಿ ಮಾಡಿದ್ದು, ನಮ್ಮ ಅಧಿಕಾರಿಗಳು ಗಾಯಗೊಂಡಿದ್ದಾರೆ. ನಮ್ಮ ಪೊಲೀಸರನ್ನು ಒತ್ತೆಯಾಳಾಗಿ ಇರಿಸಿಕೊಂಡ ವಿಚಾರ ತಿಳಿದು ಅಧಿಕಾರಿಗಳು ಕೂಡಲೇ ನಾಗಾಲ್ಯಾಂಡ್​ ಪೊಲೀಸರನ್ನು ಸಂಪರ್ಕಿಸಿದ್ದು, ಸ್ಥಳೀಯರಿಗೆ ಅಲ್ಲಿನ ಪೊಲೀಸರು ವಿಚಾರವನ್ನು ತಿಳಿಸಿ ನಮ್ಮ ಅಧಿಕಾರಿಗಳನ್ನು ಬಿಡಿಸಿದ್ದಾರೆ ಎಂದು ಅಸ್ಸಾಂ ಪೊಲೀಸ್​ನ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

https://www.vijayavani.net/cm-siddaramaiah-talks-after-naxals-surrender

https://www.vijayavani.net/martin-guptill-confirms-retirement-from-international-cricket