ಗಿಲ್ಕಿ ಸದ್ದು ಮಾಡುತ್ತಿದೆ ಮುಗ್ಧ ಮನಸುಗಳ ವಿಚಿತ್ರ ಪ್ರೇಮಕಥೆ

ಟ್ರೇಲರ್​ ನೋಡಿ ಎಲ್ಲರೂ ಮೆಚ್ಚಿಕೊಂಡರು. ಚಪ್ಪಾಳೆ ತಟ್ಟಿ ಪ್ರೋತ್ಸಾಹಿಸಿದರು. ಇದನ್ನು ನೋಡಿ ತಂಡದವರು ಖುಷಿಯಾದರು. ಅಲ್ಲಿಗೆ "ಗಿಲ್ಕಿ' ಚಿತ್ರತಂಡದ ಟ್ರೇಲರ್​ ಬಿಡುಗಡೆ ಸಮಾರಂಭದ ಒಂದು ಹಂತ ಮುಗಿದಿತ್ತು. ಇನ್ನೊಂದು ಹಂತ ಬಾಕಿ ಇತ್ತು. ಅದು ಚಿತ್ರತಂಡದವರ ಮಾತು . ಮೊದಲು ನಿರ್ದೇಶಕ ವೈಕೆ ಮಾತನಾಡಿದರು.

"ಈ ಚಿತ್ರ ಗಿಲ್ಕಿ, ನ್ಯಾನ್ಸಿ ಹಾಗೂ ಷೇಕ್​ಸ್ಪಿಯರ್​ ಎಂಬ ಮೂರು ಪಾತ್ರಗಳ ಸುತ್ತ ಸುತ್ತುತ್ತದೆ. ಇಲ್ಲಿ ನಾಯಕನ ಹೆಸರು ಗಿಲ್ಕಿ. ಅವನು ಬುದ್ಧಿಮಾಂದ್ಯನಾದರೆ, ನಾಯಕಿ ಅಂಗವಿಕಲೆ. ಅವರಿಬ್ಬರ ನಡುವೆ ನಡೆಯುವ ಪ್ರೇಮಕಥೆ ಇದು. ಕಂಟೆಂಟ್​ ಇರುವ ಸಿನಿಮಾ ಇದು. ಕಮಷಿರ್ಯಲ್​ ಆಗಿ ನಿರೂಪಿಸುವ ಪ್ರಯತ್ನ ಮಾಡಿದ್ದೇವೆ. ಇದೇ 18ರಂದು ಚಿತ್ರ ಬಿಡುಗಡೆಯಾಗುತ್ತಿದೆ' ಎಂದರು.

ನರಸಿಂಹ ಕುಲಕರ್ಣಿ ನಿರ್ಮಾಣ ಮಾಡಿರುವ ಈ ಚಿತ್ರದಲ್ಲಿ ನಾಯಕನಾಗಿ ತಾರಕ್​ ಪೊನ್ನಪ್ಪ ಇದ್ದರೆ, ನಾಯಕಿಯಾಗಿ ಚೈತ್ರಾ ಆಚಾರ್ಯ ನಟಿಸಿದ್ದಾರೆ. ಈ ಪೈಕಿ ಚೈತ್ರಾ ಕಥೆ ಕೇಳುತ್ತಲೇ ಮುಳುಗಿ ಹೋದರಂತೆ. ಈ ಪಾತ್ರವನ್ನು ತಾವೇ ನಿರ್ವಹಿಸಬೇಕೆಂದು ನಿರ್ಧರಿಸಿದರಂತೆ. "ಈ ಚಿತ್ರದ ಹಾಡು ಮತ್ತು ಟ್ರೇಲರ್​ ನೋಡಿ ಒಳ್ಳೆಯ ಮಾತಾಡುತ್ತಿದ್ದಾರೆ. ನನಗೆ ಈ ಚಿತ್ರದಿಂದ ಇನ್ನಷ್ಟು ಚಿತ್ರಗಳಲ್ಲಿ ನಟಿಸುವ ಅವಕಾಶ ಸಿಗುತ್ತಿದೆ' ಎನ್ನುತ್ತಾರೆ.

ಚಿತ್ರದ ಇನ್ನೊಂದು ಪ್ರಮುಖ ಪಾತ್ರವನ್ನು ಮೈಸೂರಿನ ಗೌತಮ್​ ರಾಜ್​ ನಿರ್ವಹಿಸಿದ್ದಾರೆ. ಆದಿಲ್​ ನದಾಫ್ ಸಂಗೀತ ಸಂಯೋಜಿಸಿದರೆ, ಬಿ.ಎಸ್​. ಕೆಂಪರಾಜು ಸಂಕಲನ ಮಾಡಿದ್ದಾರೆ. "ರಾಮ ರಾಮಾ ರೇ' ಮತ್ತು "ಒಂದಲ್ಲ ಎರಡಲ್ಲ' ನಿರ್ದೇಶಕ ಡಿ. ಸತ್ಯಪ್ರಕಾಶ್​ ಈ ಚಿತ್ರವನ್ನು ತಮ್ಮ ಸತ್ಯ ಪಿಕ್ಚರ್ಸ್​ ಮೂಲಕ ವಿತರಿಸುತ್ತಿದ್ದಾರೆ.