Gaza Peace Meeting | ಟ್ರಂಪ್ ನೇತೃತ್ವದಲ್ಲಿ ಈಜಿಪ್ಟ್‌ನಲ್ಲಿ ಗಾಜಾ ಶಾಂತಿ ಸಭೆ: ಪ್ರಧಾನಿ ಮೋದಿಗೆ ಆಹ್ವಾನ, ಭಾರತದ ಪರ MEA ರಾಜ್ಯ ಸಚಿವ ಕೀರ್ತಿ ವರ್ಧನ್ ಸಿಂಗ್ ಭಾಗಿ

Gaza Peace Meeting: ಈಜಿಪ್ಟ್‌ನ ಶರ್ಮ್ ಎಲ್-ಶೇಖ್‌ನಲ್ಲಿ ನಡೆಯಲಿರುವ ಗಾಜಾ ಯುದ್ಧವನ್ನು ಕೊನೆಗೊಳಿಸುವ ಒಪ್ಪಂದವನ್ನು ಅಂತಿಮಗೊಳಿಸುವ ಗುರಿಯನ್ನು ಹೊಂದಿರುವ ಅಂತರ್​ರಾಷ್ಟ್ರೀಯ ಶಾಂತಿ ಶೃಂಗಸಭೆಗೆ ಪ್ರಧಾನಿ ಮೋದಿಯನ್ನು ಆಹ್ವಾನಿಸಲಾಗಿದೆ ಎಂದು ಭಾರತ ಸರ್ಕಾರ ದೃಢಪಡಿಸಿದೆ.

ಈ ಸಭೆಯು ಶರ್ಮ್ ಎಲ್-ಶೇಖ್ ಶಾಂತಿ ಶೃಂಗಸಭೆಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಈಜಿಪ್ಟ್ ಅಧ್ಯಕ್ಷ ಅಬ್ದೆಲ್ ಫತ್ತಾಹ್ ಎಲ್-ಸಿಸಿ ಜಂಟಿಯಾಗಿ ಅಧ್ಯಕ್ಷತೆ ವಹಿಸಲಿದ್ದಾರೆ. ಅಲ್ಲದೆ, ಈಜಿಪ್ಟ್ ಅಧ್ಯಕ್ಷತೆಯ ಹೇಳಿಕೆಯ ಪ್ರಕಾರ, 20 ಕ್ಕೂ ಹೆಚ್ಚು ದೇಶಗಳ ನಾಯಕರು ನಿರ್ಣಾಯಕ ಸಭೆಯಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ.

ಈ ಶೃಂಗಸಭೆಗೆ ಪ್ರಧಾನಿ ಮೋದಿಯನ್ನು ಆಹ್ವಾನಿಸಲಾಗಿದೆ ಎಂದು ಭಾರತ ಸರ್ಕಾರ ದೃಢಪಡಿಸಿದೆ. ಅದರೆ, ಮೋದಿ ಬದಲಿಗೆ ವಿದೇಶಾಂಗ ವ್ಯವಹಾರಗಳ ಖಾತೆ ರಾಜ್ಯ ಸಚಿವ ಕೀರ್ತಿ ವರ್ಧನ್ ಸಿಂಗ್ ಟ್ರಂಪ್-ಸಿಸಿ ಅವರ ಮಧ್ಯಪ್ರಾಚ್ಯ ಶಾಂತಿ ಶೃಂಗಸಭೆಯಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ ಎಂದು ತಿಳಿದು ಬಂದಿದೆ.

ಇದನ್ನೂ ಓದಿ: ಟ್ರಂಪ್​ ಸುಂಕ ಸಮರ: ಅಗತ್ಯವಿದ್ದರೆ ಹೋರಾಡಲು ಹೆದರುವುದಿಲ್ಲ ಎಂದು ಡ್ರ್ಯಾಗನ್​ ತಿರುಗೇಟು| Trump tariff war

ಇಸ್ರೇಲ್ ಮತ್ತು ಹಮಾಸ್ ನಡುವೆ ಇತ್ತೀಚೆಗೆ ಸಾಧಿಸಲಾದ ಕದನ ವಿರಾಮವನ್ನು ಖಾತ್ರಿತಾಗಿಸಲು ಮತ್ತು ಮಧ್ಯಪ್ರಾಚ್ಯದಲ್ಲಿ ದೀರ್ಘಕಾಲೀನ ಶಾಂತಿ ಮತ್ತು ಸ್ಥಿರತೆಗಾಗಿ ಒಂದು ಚೌಕಟ್ಟನ್ನು ಸ್ಥಾಪಿಸಲು ಶೃಂಗಸಭೆಯು ಪ್ರಯತ್ನಿಸುತ್ತದೆ. ಅಲ್ಲದೆ, ಗಾಜಾ ಪಟ್ಟಿಯಲ್ಲಿ ಯುದ್ಧವನ್ನು ಕೊನೆಗೊಳಿಸುವುದು. ಈ ಪ್ರದೇಶಕ್ಕೆ ಶಾಂತಿ ಮತ್ತು ಸ್ಥಿರತೆಯನ್ನು ತರುವ ಪ್ರಯತ್ನಗಳನ್ನು ಹೆಚ್ಚಿಸುವುದು ಮತ್ತು ಭದ್ರತೆಯ ಹೊಸ ಹಂತಕ್ಕೆ ನಾಂದಿ ಹಾಡುವುದು ಶೃಂಗಸಭೆಯ ಗುರಿಯಾಗಿದೆ ಎಂದು ಈಜಿಪ್ಟ್ ಅಧ್ಯಕ್ಷತೆ ಹೇಳಿದೆ. ಇದೆ ಸಂದರ್ಭದಲ್ಲಿ ಶಾಂತಿಯನ್ನು ಸಾಧಿಸುವ ಮತ್ತು ಜಾಗತಿಕ ಸಂಘರ್ಷಗಳನ್ನು ಕೊನೆಗೊಳಿಸುವ ಅಧ್ಯಕ್ಷ ಟ್ರಂಪ್​ರ ವಿಶಾಲ ದೃಷ್ಟಿಕೋನವನ್ನು ಸಭೆ ಪ್ರತಿಬಿಂಬಿಸುತ್ತದೆ ಎಂದು ಹೇಳಿದೆ.

ಶೃಂಗಸಭೆಗೆ ಭಾಗವಹಿಸಲಿರುವ ವಿಶ್ವ ನಾಯಕರು

ಈ ಶೃಂಗಸಭೆಗೆ ಸ್ಪೇನ್, ಜಪಾನ್, ಅಜೆರ್ಬೈಜಾನ್, ಅರ್ಮೇನಿಯಾ, ಹಂಗೇರಿ, ಭಾರತ, ಸೈಪ್ರಸ್, ಗ್ರೀಸ್, ಬಹ್ರೇನ್, ಕುವೈತ್ ಮತ್ತು ಕೆನಡಾ ಸೇರಿದಂತೆ ಹಲವಾರು ಪ್ರಮುಖ ಅಂತರರಾಷ್ಟ್ರೀಯ ಪಾಲುದಾರರಿಗೆ ಅಮೆರಿಕ ಆಹ್ವಾನ ನೀಡಿದೆ ಎಂದು ಆಕ್ಸಿಯಾಸ್ ವರದಿ ಮಾಡಿದೆ. ಈ ಸಭೆಗೆ ಇರಾನ್​ನನ್ನು ಸಹ ಆಹ್ವಾನಿಸಲಾಗಿದೆ, ಆದರೂ ಇಸ್ರೇಲ್ ಮಾತುಕತೆಯಲ್ಲಿ ಭಾಗವಹಿಸುವುದಿಲ್ಲ. ಪಾಕಿಸ್ತಾನ ಪ್ರಧಾನಿ ಶೆಹಬಾಜ್ ಷರೀಫ್ ಸೋಮವಾರ ಈಜಿಪ್ಟ್‌ನಲ್ಲಿ ನಡೆಯುವ ಶೃಂಗಸಭೆಯಲ್ಲಿ ಭಾಗವಹಿಸಲಿದ್ದಾರೆ.

ಈ ಶೃಂಗಸಭೆಯು ನಾಯಕರು ಕದನ ವಿರಾಮ ಒಪ್ಪಂದವನ್ನು ಅನುಮೋದಿಸಲು ಮತ್ತು ಗಾಜಾಗೆ ಮಾನವೀಯ ಮತ್ತು ಪುನರ್ನಿರ್ಮಾಣ ಕ್ರಮಗಳ ಅನುಷ್ಠಾನದ ಬಗ್ಗೆ ಚರ್ಚಿಸಲು ಒಂದು ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ.

ಇಸ್ರೇಲ್ - ಹಮಾಸ್ ನಡುವೆ ಕದನ ವಿರಾಮ

ಈಜಿಪ್ಟ್, ಕತಾರ್, ಟರ್ಕಿ ಮತ್ತು ಯುನೈಟೆಡ್ ಸ್ಟೇಟ್ಸ್ ಮಧ್ಯಸ್ಥಿಕೆಯಲ್ಲಿ ಶರ್ಮ್ ಎಲ್-ಶೇಖ್‌ನಲ್ಲಿ ಮೂರು ದಿನಗಳ ಕಾಲ ನಡೆದ ತೀವ್ರ ಮಾತುಕತೆಗಳ ನಂತರ ಇಸ್ರೇಲ್ ಮತ್ತು ಹಮಾಸ್ ನಡುವಿನ ಕದನ ವಿರಾಮ ಶುಕ್ರವಾರ ಜಾರಿಗೆ ಬಂದಿತು. ಈ ಯೋಜನೆಯ ಮೊದಲ ಹಂತವು ಗಾಜಾ ನಗರ, ರಫಾ, ಖಾನ್ ಯೂನಿಸ್ ಮತ್ತು ಉತ್ತರ ಗಾಜಾದಿಂದ ಇಸ್ರೇಲಿ ಪಡೆಗಳನ್ನು ಹಿಂತೆಗೆದುಕೊಳ್ಳುವುದು. ಸಭೆಯಲ್ಲಿ ಐದು ಮಾನವೀಯ ಕ್ರಾಸಿಂಗ್‌ಗಳನ್ನು ತೆರೆಯುವುದು ಮತ್ತು ಒತ್ತೆಯಾಳುಗಳು ಮತ್ತು ಕೈದಿಗಳನ್ನು ಬಿಡುಗಡೆ ಮಾಡುವುದು ಒಳಗೊಂಡಿರುತ್ತದೆ. (ಏಜೆನ್ಸೀಸ್)

https://www.vijayavani.net/afghan-foreign-minister-invites-female-journalists-to-new-press-conference-amid-outrage