ಋತು ಬದಲಾವಣೆ ತರುವ ಕಾಯಿಲೆಗಳಿಂದ ಪಾರಾಗಲು ಈ ಕ್ರಮ ಕೈಗೊಳ್ಳಿ!

ಹವಾಮಾನ ಬದಲಾವಣೆ

ಹವಾಮಾನ ಬದಲಾಗುವಾಗ ಕಾಡುವ ನೆಗಡಿ, ಕೆಮ್ಮು, ಜ್ವರ ಹಾಗೂ ಉಸಿರಾಟದ ತೊಂದರೆಗಳಿಂದ ರಕ್ಷಿಸಿಕೊಳ್ಳಲು ಕೆಲವೊಂದು ಮನೆಮದ್ದುಗಳ ಬಳಕೆಯನ್ನು ಮಾಡಬೇಕಾಗುತ್ತದೆ.

ಉಗುರುಬೆಚ್ಚಗಿನ ನೀರು ಮತ್ತು ಕಷಾಯ

ದಿನವಿಡೀ ಉಗುರುಬೆಚ್ಚಗಿನ ನೀರನ್ನು ಕುಡಿಯುವುದರಿಂದ ಗಂಟಲಿನ ಸೋಂಕು ನಿವಾರಣೆಯಾಗುತ್ತದೆ. ದಿನಕ್ಕೆ ಒಮ್ಮೆ ಶುಂಠಿ, ತುಳಸಿ, ಮತ್ತು ಕಾಳುಮೆಣಸು ಹಾಕಿದ ಗಿಡಮೂಲಿಕೆ ಕಷಾಯ ಕುಡಿಯುವುದರಿಂದ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ.

ಬಿಸಿ ಹಾಗೂ ಪೌಷ್ಟಿಕ ಆಹಾರ

ತಂಪು ಪಾನೀಯ ಹಾಗೂ ಜಂಕ್ ಫುಡ್‌ಗಳನ್ನು ಸಂಪೂರ್ಣವಾಗಿ ಬಿಟ್ಟು, ಮನೆಯಲ್ಲೇ ತಯಾರಿಸಿದ ಬಿಸಿಬಿಸಿಯಾದ ಸೂಪ್, ತಿಳಿಸಾರು ಮತ್ತು ಸುಲಭವಾಗಿ ಜೀರ್ಣವಾಗುವ ಆಹಾರವನ್ನು ಸೇವಿಸಿ. ಅಡುಗೆಯಲ್ಲಿ ಅರಿಶಿನ, ಬೆಳ್ಳುಳ್ಳಿಯನ್ನು ಹೆಚ್ಚಾಗಿ ಬಳಸಿ.

ಆವಿ ತೆಗೆದುಕೊಳ್ಳುವುದು

ಹವಾಮಾನ ವೈಪರೀತ್ಯದಿಂದ ಮೂಗು ಕಟ್ಟುವುದು ಅಥವಾ ಸೈನಸ್ ತೊಂದರೆ ಕಾಣಿಸಿಕೊಂಡರೆ, ಬಿಸಿ ನೀರಿಗೆ ಸ್ವಲ್ಪ ಪುದೀನಾ ಎಲೆಗಳು ಅಥವಾ ನೀಲಗಿರಿ ಎಣ್ಣೆ ಹಾಕಿ ದಿನಕ್ಕೆ ಎರಡು ಬಾರಿ ಆವಿ ತೆಗೆದುಕೊಳ್ಳಿ.

ವೈಯಕ್ತಿಕ ಸ್ವಚ್ಛತೆ

ಗಾಳಿಯಲ್ಲಿ ವೈರಸ್ ಹರಡುವಿಕೆ ಹೆಚ್ಚಿರುವುದರಿಂದ ಹೊರಗಿನಿಂದ ಬಂದ ತಕ್ಷಣ ಕೈ-ಕಾಲುಗಳನ್ನು ಸ್ವಚ್ಛವಾಗಿ ತೊಳೆದುಕೊಳ್ಳಿ. ತಣ್ಣನೆ ಗಾಳಿ ಇದ್ದಾಗ ಕಿವಿ ಹಾಗೂ ತಲೆಯನ್ನು ಸ್ಕಾರ್ಫ್‌ನಿಂದ ಮುಚ್ಚಿಕೊಳ್ಳಿ.

ಪ್ರಾಣಾಯಾಮ ಮತ್ತು ನಿಯಮಿತ ನಿದ್ದೆ

ದಿನಕ್ಕೆ 15 ನಿಮಿಷಗಳ ಕಾಲ ಲಘು ವ್ಯಾಯಾಮ ಹಾಗೂ ಪ್ರಾಣಾಯಾಮ ಮಾಡುವುದರಿಂದ ಶ್ವಾಸಕೋಶದ ಸಾಮರ್ಥ್ಯ ವೃದ್ಧಿಯಾಗುತ್ತದೆ. ಹಗಲು ನಿದ್ದೆಯನ್ನು ತಪ್ಪಿಸಿ, ರಾತ್ರಿ ಸರಿಯಾದ ಸಮಯಕ್ಕೆ ನಿದ್ರಿಸುವುದರಿಂದ ದೇಹದ ರಕ್ಷಣಾ ವ್ಯವಸ್ಥೆ ಬಲಗೊಳ್ಳುತ್ತದೆ.