ಅಭಿಮಾನಿಯ ಕೆಲಸಕ್ಕೆ ಮೆಚ್ಚಿ ಚಿನ್ನದ ಸರ ಕೊಟ್ಟ ರಜಿನಿ

ಸರಳತೆ ಮತ್ತು ಸಜ್ಜನಿಕೆ

'ತಲೈವಾ' ಹೆಸರು ಯಾರಿಗೆ ಗೊತ್ತಿಲ್ಲ ಹೇಳಿ? ಪ್ರತಿಯೊಬ್ಬ ಚಿತ್ರಪ್ರೇಮಿಗೂ ರಜಿನಿ ಕಂಡರೆ ಅದೇನೋ ವಿಶೇಷ ಪ್ರೀತಿ, ಅಭಿಮಾನ. ಕಾರಣ, ನಟನೆಯಲ್ಲಿ ಅವರ ವಿಭಿನ್ನತೆ ಹಾಗೂ ವಿಶಿಷ್ಟ ಸ್ವ್ಯಾಗ್​. ಮಾಸ್ಸಿಗೂ, ಕ್ಲಾಸಿಗೂ ಸೈ ಎನ್ನುವ ರಜಿನಿಕಾಂತ್​, ಕೇವಲ ಸಿನಿಮಾದಲ್ಲಿ ಮಾತ್ರವಲ್ಲ, ಅದರಾಚೆಗೂ ಸಜ್ಜನಿಕೆ ಮತ್ತು ಸರಳತೆಯಿಂದಲೇ ಹೃದಯ ಗೆಲ್ತಾರೆ ಅನ್ನೋದಕ್ಕೆ ಇದೇ ಸಾಕ್ಷಿ

ಫ್ಯಾನ್ಸ್ ವಾರ್​

ಇತ್ತೀಚಿನ ದಿನಗಳಲ್ಲಿ, ಸಾಮಾಜಿಕ ಜಾಲತಾಣಗಳಲ್ಲಿ ಸ್ಟಾರ್​ ವಾರ್​ಗೆ ಕಾರಣವಾಗುವ ಇಂದಿನ ಕಾಲಘಟ್ಟದ ಅಭಿಮಾನಿಗಳ ಮಧ್ಯೆ ತಮ್ಮ ನೆಚ್ಚಿನ ನಾಯಕನನ್ನು ಸ್ಮರಿಸಿ, ಅವರ ಹೆಸರಿನಲ್ಲಿ ಇತರರಿಗೆ ಅನ್ನ ಸಂತರ್ಪಣೆ, ಧಾನ ಸೇರಿದಂತೆ ಸಾಕಷ್ಟು ಒಳ್ಳೆಯ ಕೆಲಸಗಳನ್ನು ಮಾಡುವ ಹಳೆಯ ತಲೆಮಾರಿನ ಫ್ಯಾನ್ಸ್​ಗಳು ಇಂದಿಗೂ ಇದ್ದಾರೆ ಎಂಬುದಕ್ಕೆ ತಮಿಳುನಾಡಿನ ಮಧುರೈನ ಶೇಖರ್​ ಉದಾಹರಣೆ.

5 ರೂ.ಗೆ ಪರೋಟ

ಕೆಲವು ದಿನಗಳಿಂದ ಸೋಷಿಯಲ್ ಮೀಡಿಯಾದಲ್ಲಿ ರಜಿನಿ ಅಭಿಮಾನಿಗಳ ಮೆಚ್ಚುಗೆಗೆ ಗುರಿಯಾಗಿರುವ ಶೇಖರ್​, ಮಧುರೈನಲ್ಲಿ ಹೋಟೆಲ್ ಉದ್ಯಮ ನಡೆಸುತ್ತಿದ್ದಾರೆ. ವಿಶೇಷ ಏನಪ್ಪ ಅಂದರೆ, ಅವರು ಕಳೆದ 15 ವರ್ಷಗಳಿಂದ ಕೇವಲ 5 ರೂ.ಗೆ ಪರೋಟಗಳನ್ನು ಗ್ರಾಹಕರಿಗೆ ನೀಡುವ ಮೂಲಕ ಸ್ಥಳೀಯವಾಗಿ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.

ಇಲ್ಲಿಗೆ ನಿಲ್ಲದ ಅಭಿಮಾನ

ಇವರ ಹೋಟೆಲ್ ತುಂಬೆಲ್ಲ ರಜನಿಕಾಂತ್ ಅವರದ್ದೇ ಫೋಟೋಗಳಿವೆ. ಎತ್ತ ನೋಡಿದರೂ ತಲೈವಾ ಸಿನಿಮಾಗಳ ಪೋಟೋಗಳೇ ಕಾಣುತ್ತವೆ. ಇಲ್ಲಿಗೆ ನಿಲ್ಲದ ಇವರ ಅಭಿಮಾನ, ತಮ್ಮ ಎದೆಯ ಮೇಲೆ ರಜಿನಿಕಾಂತ್​ ಅವರ ಟ್ಯಾಟೂ ಹಾಕಿಸಿಕೊಂಡಿದ್ದಾರೆ. ಮುಖ್ಯವಾಗಿ, ಇಂದಿನ ದಿನಗಳಲ್ಲಿ, ಕೇವಲ 5 ರೂ.ಗೆ ಪರೋಟ ನೀಡುವುದು ಸಾಮಾನ್ಯ ವಿಷಯವಲ್ಲ ಬಿಡಿ.

ಹೃದಯ ಶ್ರೀಮಂತಿಕೆ

ಲಾಭಕ್ಕಿಂತ ಜನರ ಹೊಟ್ಟೆ ತುಂಬಿಸುವುದು ಮುಖ್ಯ ಎಂದು ನಂಬಿರುವ ಅಭಿಮಾನಿ ಶೇಖರ್ ಅವರ ಹೃದಯ ಶ್ರೀಮಂತಿಕೆಯನ್ನು ಸ್ವತಃ ತಲೈವಾ ಅವರೇ ಕೊಂಡಾಡಿದ್ದಾರೆ. ಶೇಖರ್ ಹೋಟೆಲ್​ ಬಗ್ಗೆ ಮಾಹಿತಿ ಪಡೆದ ರಜಿನಿಕಾಂತ್​, ಅವರನ್ನು ತಮ್ಮ ನಿವಾಸಕ್ಕೆ ಕರೆಸಿಕೊಂಡು ಆತ್ಮೀಯವಾಗಿ ಮಾತನಾಡಿಸಿದ್ದಾರೆ.

ಚಿನ್ನದ ಸರ

ತಮ್ಮ ಮೇಲೆ ಇಷ್ಟೊಂದು ಅಭಿಮಾನ, ಪ್ರೀತಿ ತೋರಿಸಿದ ಅಭಿಮಾನಿಯನ್ನು ತಬ್ಬಿಕೊಂಡ ರಜನಿಕಾಂತ್, ಶೇಖರ್ ಅವರ ಕೆಲಸವನ್ನು ಮೆಚ್ಚಿ, ತಮ್ಮ ಬಳಿಯಿದ್ದ ಚಿನ್ನದ ಸರವನ್ನು ಉಡುಗೊರೆಯಾಗಿ ನೀಡಿದ್ದು ವಿಶೇಷ. ಅಭಿಮಾನಿಯ ಕೆಲಸವನ್ನು ಗುರುತಿಸಿ, ಅವರಿರುವ ಜಾಗಕ್ಕೆ ಬಂದು ಮಾತನಾಡಿಸುವ ನಟನ ಸರಳತೆಗೆ ನೆಟ್ಟಿಗರು ಫಿದಾ ಆಗಿದ್ದಾರೆ,(ಏಜೆನ್ಸೀಸ್).