ಕುಂದಾಪುರ: ಮುಂಬೈ ಕ್ರೈಂ ಬ್ರಾಂಚ್ ಹೆಸರಿನಲ್ಲಿ ಲಕ್ಷಾಂತರ ರೂ.ವಂಚಿಸಿದ ಬಗ್ಗೆ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಕುಂದಾಪುರದ ತುಳಸಿ (29) ಎಂಬುವರಿಗೆ ಅನಾಮಧೇಯ ವ್ಯಕ್ತಿಯೊಬ್ಬರು ಕರೆ ಮಾಡಿ, ತುಳಸಿ ಅವರ ಆಧಾರ್ ನಂಬರಿನಿಂದ ತೈವಾನ್ಗೆ ಒಂದು ಪಾರ್ಸೆಲ್ ಕಳುಹಿಸಿದ್ದು, ಅದರಲ್ಲಿ ಕಾನೂನು ಬಾಹಿರ ವಸ್ತುಗಳಿದ್ದು ಈ ಬಗ್ಗೆ ಪ್ರಕರಣ ದಾಖಲಿಸುವುದಾಗಿ ತಿಳಿಸಿ ಮುಂಬೈ ಕ್ರೈಂ ಬ್ರಾೃಂಚ್ಗೆ ಕರೆ ಕನೆಕ್ಟ್ ಮಾಡುವುದಾಗಿ ತಿಳಿಸಿದ್ದಾರೆ.
ಕರೆಯಲ್ಲಿ ತುಳಸಿ ಅವರಿಗೆ ಸ್ಕೈಪ್ ಡೌನ್ ಲೋಡ್ ಮಾಡುವಂತೆ ಹೇಳಿ, ವಿಡಿಯೋ ಕರೆ ಮಾಡಿ ಕುಟುಂಬದ ಸದಸ್ಯರ ಬಗ್ಗೆ ಆಧಾರ್ ಕಾರ್ಡ್ ಇತ್ಯಾದಿ ವಿವರ ಕೇಳಿದ್ದಾರೆ. ಬಳಿಕ ಕಾನೂನು ಬಾಹಿರ ಚಟುವಟಿಕೆ ತಪಾಸಣೆ ಮಾಡಲು ಹಣ ಕೇಳಿದ್ದು, ವಾಪಾಸು ಮಾಡುವುದಾಗಿ ತಿಳಿಸಿ ಒಟ್ಟು 5,69,133.00 ಹಣ ಕರೆ ಮಾಡಿದ ಅನಾಮಧೇಯ ವ್ಯಕ್ತಿಯ ವಿವಿಧ ಬ್ಯಾಂಕ್ ಖಾತೆಗಳಿಗೆ ಪಾವತಿಸಿದ್ದಾರೆ. ಹಣ ಪಡೆದುಕೊಂಡ ವ್ಯಕ್ತಿಗಳು ಪಡೆದುಕೊಂಡ ಹಣ ವಾಪಾಸು ನೀಡದೇ ಮೋಸ ಮಾಡಿರುವುದಾಗಿ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
