ಉತ್ತರ ಕರ್ನಾಟಕ ಜನರ ನೆರವಿಗೆ ಬಂದ ಕಿಚ್ಚ! ಈ ನಂಬರ್​ಗೆ ಕರೆ​ ಮಾಡಿದ್ರೆ ಸಿಗುತ್ತೆ ಸಹಾಯ

ಬೆಂಗಳೂರು: ಸ್ಯಾಂಡಲ್​ವುಡ್​ನ ಸ್ಟಾರ್​ ನಟ ಕಿಚ್ಚ ಸುದೀಪ್​ ನೆರೆ ಸಂತ್ರಸ್ಥರ ನೆರವಿಗೆ ಧಾವಿಸಿದ್ದಾರೆ.

ತಮ್ಮ ಚಾರಿಟಬಲ್ ಟ್ರಸ್ಟ್ ಮೂಲಕ ನಿರಂತರವಾಗಿ ಸಾಮಾಜಿಕ ಸೇವೆ ಸಲ್ಲಿಸಿಕೊಂಡು ಬರುತ್ತಿರುವ ಸುದೀಪ್​, ರಣಭೀಕರ ಮಳೆಯಿಂದಾಗಿ ಸಂಕಷ್ಟಕ್ಕೆ ಸಿಲುಕಿರುವ ಉತ್ತರ ಕರ್ನಾಟಕದ ಜನರಿಗೆ ನೆರವಿನ ಹಸ್ತಚಾಚಿದ್ದಾರೆ. ಸಹಾಯವಾಣಿ ನಂಬರ್ ಹಂಚಿಕೊಂಡಿರುವ ಸುದೀಪ್, ಅಗತ್ಯ ಸಾಮಗ್ರಿ ಯಾವ ಗ್ರಾಮಗಳಿಗೆ ಬೇಕು ಎಂದು ಆ ಊರಿನ ಯಾರಾದರೂ ಫೋನ್​ ಮಾಡಿ ತಿಳಿಸಿದರೆ ಕೂಡಲೇ ವ್ಯವಸ್ಥೆ ಮಾಡುವುದಾಗಿ ಮನವಿ ಮಾಡಿದ್ದಾರೆ.

'ಪ್ರವಾಹದಲ್ಲಿ ಕೊಚ್ಚಿಹೋಗುತ್ತಿರುವ ನಮ್ಮವರೊಂದಿಗೆ ಜೊತೆಯಾಗೋ ಸಮಯ ಇದು. ಕಲಬುರಗಿ, ರಾಯಚೂರು, ಯಾದಗಿರಿ, ಹುಬ್ಬಳ್ಳಿ, ಧಾರವಾಡ... ಸೇರಿದಂತೆ ಹಲವು ಜಿಲ್ಲೆಯ ಗ್ರಾಮಗಳು ಮಳೆಯಿಂದಾಗಿ ತೊಂದರೆ ಅನುಭವಿಸುತ್ತಿವೆ. ದಯವಿಟ್ಟು ಆ ಗ್ರಾಮಗಳ ಯಾರಾದರೂ ಒಂದಿಬ್ಬರು ನಮ್ಮ ಕಿಚ್ಚ ಸುದೀಪ ಚಾರಿಟಬಲ್​ ಸೊಸೈಟಿ ಸಹಾಯವಣಿ ಸಂಖ್ಯೆ 63603 34455 ಕ್ಕೆ ಕರೆ ಮಾಡಿ. ಅಗತ್ಯವಾಗಿ ಬೇಕಿರುವ ಸಾಮಗ್ರಿ ಎಲ್ಲಿಗೆ ಅತ್ಯಂತ ಅವಶ್ಯಕವಾಗಿದೆ ಎಂಬುದರ ಮಾಹಿತಿ ನೀಡಿ. ಕಷ್ಟದಲ್ಲಿರುವ ನಿಮ್ಮೊಂದಿಗೆ ಕಿಚ್ಚ ಸುದೀಪ ಚಾರಿಟಬಲ್​ ಸೊಸೈಟಿ ಸದಾ ಜೊತೆಯಲ್ಲಿರುತ್ತದೆ. ಆದಷ್ಟು ಬೇಗ ನಿಮ್ಮನ್ನು ನಾವು ಸೇರಲಿದ್ದೇವೆ' ಎಂದು ಅಭಯ ನೀಡಿದೆ.

ಹೌದು, ಸುದೀಪ್​ರ ಸಹಾಯವಾಣಿಗೆ ಕರೆ ಮಾಡಿ ಪ್ರವಾಹ ಪ್ರದೇಶಗಳ ಸ್ಥಿತಿಯನ್ನ ವಿವರಿಸಿದರೆ ನೆರವು ಸಿಗಲಿದೆ. ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಟ್ರಸ್ಟ್​ ಮಾಹಿತಿ ಹಂಚಿಕೊಂಡಿದೆ. ಈಗಾಗಲೇ ಸುದೀಪ್​ರ ಟ್ರಸ್ಟ್‌, ಹಲವು ಶಾಲೆಗಳ ದತ್ತು, ತುಮಕೂರಿನ ವೃದ್ಧರೊಬ್ಬರ ಮನೆಗೆ ವಿದ್ಯುತ್‌ ವ್ಯವಸ್ಥೆ ಸೇರಿದಂತೆ ಅನೇಕ ಜನಪರ ಕೆಲಸಗಳನ್ನು ಮಾಡಿದೆ.

https://www.vijayavani.net/110-years-old-age-grandmother-save-rain-vijayapura/