ಮೀನು ಮರಿ ಪಾಲನಾ ಘಟಕ

ಪ್ರಕಾಶ್ ಮಂಜೇಶ್ವರ ಮಂಗಳೂರು

ಕರಾವಳಿಯಲ್ಲಿ ಸಾಕಷ್ಟು ರೈತರು ಒಳನಾಡು ಮೀನುಗಾರಿಕೆಯನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿದ್ದಾರೆ. ಇಂಥ ರೈತರನ್ನು ಒಗ್ಗೂಡಿಸಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲೇ ಮೀನು ಮರಿ ಪಾಲನಾ ಕೇಂದ್ರಗಳ ಸ್ಥಾಪಿಸಲು ಮಂಗಳೂರು ಕೃಷಿ ವಿಜ್ಞಾನ ಕೇಂದ್ರ(ಕೆವಿಕೆ) ಮುಂದಾಗಿದೆ.

ಸಾಗಾಟ ಮತ್ತು ಕೃಷಿಯ ಒಟ್ಟು ನಿರ್ವಹಣಾ ವೆಚ್ಚ ಕಡಿಮೆ ಮಾಡುವುದು, ಸಕಾಲದಲ್ಲಿ ಆಸಕ್ತ ರೈತರಿಗೆ ಮರಿಗಳನ್ನು ಒದಗಿಸುವುದು ಈ ಯೋಜನೆಯ ಉದ್ದೇಶ. ಪ್ರಸ್ತುತ ದಕ್ಷಿಣ ಕನ್ನಡ ಜಿಲ್ಲೆಯ ರೈತರಿಗೆ ಪಶ್ಚಿಮ ಬಂಗಾಳ, ಆಂಧ್ರಪ್ರದೇಶ, ಒಡಿಶಾ, ಕೇರಳ ಹಾಗೂ ರಾಜ್ಯದ ಭದ್ರಾವತಿ, ಬೆಂಗಳೂರು, ಮೂಡಿಗೆರೆ, ಕಾರ್ಕಳ ಮುಂತಾದ ಪ್ರದೇಶಗಳಿಂದ ಮರಿ ಮೀನುಗಳನ್ನು ತರಿಸಿಕೊಳ್ಳಲಾಗುತ್ತಿದೆ.

ಮೀನು ಕೃಷಿ ಸುಲಭ ಹಾಗೂ ಕಡಿಮೆ ಖರ್ಚಿನಲ್ಲಿ ನಿರ್ವಹಿಸಬಹುದಾದ ಉದ್ಯಮ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮೀನನ್ನು ಆಹಾರವಾಗಿ ಬಳಸುವವರು ಅಧಿಕವಿದ್ದರೂ ಒಳನಾಡು ಮೀನು ಕೃಷಿ ಮಾಡುವವರ ಸಂಖ್ಯೆ ಇಲ್ಲಿಯ ತನಕವೂ ಕಡಿಮೆ ಇತ್ತು. ಯೋಗ್ಯ ಕೆರೆಗಳ ಕೊರತೆ ಮತ್ತು ವೈಜ್ಞಾನಿಕ ಮೀನು ಕೃಷಿ ಕುರಿತು ನಿರೀಕ್ಷಿತ ಪ್ರಮಾಣದಲ್ಲಿ ಜನಜಾಗೃತಿ ಇಲ್ಲದಿರುವುದು ಮತ್ತು ಕರಾವಳಿಯಲ್ಲಿ ಯಥೇಚ್ಛ ಸಮುದ್ರ ಮೀನು ಲಭ್ಯವಿರುವುದರಿಂದ ಕರಾವಳಿ ಜನರು ಸ್ವಲ್ಪಮಟ್ಟಿನ ಉದಾಸೀನತೆ ತೋರಲು ಕಾರಣವಾಗಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಚಿತ್ರಣವೇ ಬದಲಾಗಿದೆ. ಅನೇಕ ಸಂದರ್ಭ ಕರಾವಳಿ ಜನರು ತಿನ್ನುವ ಮೀನಿಗೂ ಕಷ್ಟ ಪಡಬೇಕಾದ ಸ್ಥಿತಿ ಎದುರಾಗಿತ್ತು. ದಕ್ಷಿಣ ಕನ್ನಡ ಜಿಲ್ಲಾದ್ಯಂತ ನೀರು ನಿಲ್ಲುವ ತಗ್ಗು ಪ್ರದೇಶಗಳು, ಹಡಿಲು ಬಿಟ್ಟಿರುವ ಗದ್ದೆಗಳು ಸಾಕಷ್ಟು ಇವೆ. ಬಹಳಷ್ಟು ಕಿಂಡಿ ಅಣೆಕಟ್ಟುಗಳು, ಕೃಷಿ ಹೊಂಡಗಳಿವೆ. ಇವುಗಳನ್ನು ಕಡಿಮೆ ವೆಚ್ಚದಲ್ಲಿ ಕೃಷಿ ಕೊಳಗಳಾಗಿ ಪರಿವರ್ತಿಸಿಕೊಳ್ಳಬಹುದು.