ವಿಶ್ವಕಪ್ ಇತಿಹಾಸದಲ್ಲೇ ದಾಖಲೆ!...ಫ್ರಾನ್ಸ್ ವಿರುದ್ಧ ಭರ್ಜರಿ ಜಯ ಗಳಿಸಿ 280 ಕೋಟಿ ರೂ. ಬಾಚಿಕೊಂಡ ಇಂಗ್ಲೆಂಡ್ | EnglandVsFrance

ಟೂರ್ನಿಯ ಟ್ರೋಫಿ ರೇಸ್‌ನಿಂದ ಹೊರಬಿದ್ದ ಬೇಸರವನ್ನು ಮರೆತು ಇಂಗ್ಲೆಂಡ್ ವಿಶ್ವಕಪ್ ಇತಿಹಾಸದಲ್ಲೇ ತನ್ನ ಎರಡನೇ ಅತ್ಯುತ್ತಮ ಪ್ರದರ್ಶನ ನೀಡಿ ಮೂರನೇ ಸ್ಥಾನವನ್ನು ಮುಡಿಗೇರಿಸಿಕೊಂಡಿದೆ. ಮಿಯಾಮಿಯ ಹಾರ್ಡ್ ರಾಕ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯವು 1982ರ ನಂತರ (ಹಂಗೇರಿ ಮತ್ತು ಎಲ್ ಸಾಲ್ವಡಾರ್ ನಡುವಿನ 10-1 ಪಂದ್ಯ) ವಿಶ್ವಕಪ್ ಇತಿಹಾಸದಲ್ಲೇ ಅತ್ಯಧಿಕ ಗೋಲುಗಳು ದಾಖಲಾದ ಪಂದ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಅಲ್ಲದೆ, ವಿಶ್ವಕಪ್‌ನ ಮೂರನೇ ಸ್ಥಾನಕ್ಕಾಗಿ ನಡೆದ ಪಂದ್ಯವೊಂದರಲ್ಲಿ ದಾಖಲಾದ ಗರಿಷ್ಠ 10 ಗೋಲುಗಳ ದಾಖಲೆ ಇದಾಗಿದೆ.

ಪಂದ್ಯದ ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಮೊರೆಹೋದ ಇಂಗ್ಲೆಂಡ್ ಪರ ಬುಕಾಯೊ ಸಾಕಾ ಪಂದ್ಯದ 37ನೇ ನಿಮಿಷ ಹಾಗೂ ಮೊದಲಾರ್ಧದ ಹೆಚ್ಚುವರಿ ಸಮಯದಲ್ಲಿ ಗೋಲು ಬಾರಿಸಿದರು. ತದನಂತರ 87ನೇ ನಿಮಿಷದಲ್ಲಿ ಪೆನಾಲ್ಟಿ ಮೂಲಕ ಮೂರನೇ ಗೋಲು ಗಳಿಸಿ ಇಂಗ್ಲೆಂಡ್ ಪರ ತಮ್ಮ ವೃತ್ತಿಜೀವನದ ಎರಡನೇ ಹ್ಯಾಟ್ರಿಕ್ ಪೂರೈಸಿದರು. ಮೊದಲಾರ್ಧದಲ್ಲೇ ಡೆಕ್ಲಾನ್ ರೈಸ್ ಮತ್ತು ಎಜ್ರಿ ಕನ್ಸಾ ತಲಾ ಒಂದು ಗೋಲು ಗಳಿಸಿದ್ದರಿಂದ ಇಂಗ್ಲೆಂಡ್ 4-0 ರ ಭಾರಿ ಮುನ್ನಡೆ ಸಾಧಿಸಿತ್ತು. ಕೊನೆಯಲ್ಲಿ ಜೂಡ್ ಬೆಲ್ಲಿಂಗ್‌ಹ್ಯಾಮ್ ಪಂದ್ಯದ 8ನೇ ನಿಮಿಷದ ಹೆಚ್ಚುವರಿ ಸಮಯದಲ್ಲಿ ಟೂರ್ನಿಯಲ್ಲಿ ತಮ್ಮ 7ನೇ ಗೋಲು ಬಾರಿಸಿ ಇಂಗ್ಲೆಂಡ್ ಗೆಲುವನ್ನು ಖಚಿತಪಡಿಸಿದರು.

ಇನ್ನೊಂದೆಡೆ, ಬಲಿಷ್ಠ ಪ್ರತಿರೋಧ ಒಡ್ಡಿದರೂ ಪಂದ್ಯವನ್ನು ಸೋತ ಫ್ರಾನ್ಸ್‌ನ ಸ್ಟಾರ್ ಆಟಗಾರ ಕಿಲಿಯನ್ ಎಂಬಾಪ್ಪೆ ಹೊಸ ಇತಿಹಾಸ ಸೃಷ್ಟಿಸಿದರು. ದ್ವಿತೀಯಾರ್ಧದಲ್ಲಿ (48ನೇ ಮತ್ತು 66ನೇ ನಿಮಿಷ) ಎರಡು ಅಮೋಘ ಗೋಲುಗಳನ್ನು ಗಳಿಸುವ ಮೂಲಕ ಎಂಬಾಪ್ಪೆ ತಮ್ಮ ವೃತ್ತಿಜೀವನದ ಒಟ್ಟು ವಿಶ್ವಕಪ್ ಗೋಲುಗಳ ಸಂಖ್ಯೆಯನ್ನು 22ಕ್ಕೇರಿಸಿದರು. ಈ ಮೂಲಕ ಲಿಯೋನೆಲ್ ಮೆಸ್ಸಿ (21 ಗೋಲು) ಅವರ ಸಾರ್ವಕಾಲಿಕ ದಾಖಲೆಯನ್ನು ಹಿಂದಿಕ್ಕಿದರು. ಪ್ರಸ್ತುತ ಟೂರ್ನಿಯಲ್ಲಿ 10 ಗೋಲು ಗಳಿಸಿರುವ ಎಂಬಾಪ್ಪೆ ಸದ್ಯ ಗೋಲ್ಡನ್ ಬೂಟ್ ರೇಸ್‌ನಲ್ಲಿ ಮುಂಚೂಣಿಯಲ್ಲಿದ್ದಾರೆ.

ಫ್ರಾನ್ಸ್ ತಂಡಕ್ಕೆ ಬರೋಬ್ಬರಿ 14 ವರ್ಷಗಳ ಕಾಲ ತರಬೇತುದಾರರಾಗಿ ಸೇವೆ ಸಲ್ಲಿಸಿದ್ದ ಕೋಚ್ ಡಿಡಿಯರ್ ಡೆಶಾಂಪ್ಸ್ ಅವರಿಗೆ ಇದು ಕೊನೆಯ ಪಂದ್ಯವಾಗಿತ್ತು. ಪಂದ್ಯದ ಮುಕ್ತಾಯದ ನಂತರ ಅವರು ಆಟಗಾರರನ್ನು ಆಲಂಗಿಸಿ, ನೆರೆದಿದ್ದ 64,478 ಪ್ರೇಕ್ಷಕರತ್ತ ಕೈಬೀಸಿ ಮೈದಾನದಿಂದ ಭಾವುಕರಾಗಿ ನಿರ್ಗಮಿಸಿದರು. ಭಾನುವಾರ ನ್ಯೂಜೆರ್ಸಿಯಲ್ಲಿ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ಮತ್ತು ಸ್ಪೇನ್ ಮುಖಾಮುಖಿಯಾಗಲಿದ್ದು, ಮೆಸ್ಸಿಗೆ ಎಂಬಾಪ್ಪೆ ದಾಖಲೆ ಮುರಿಯಲು ಒಂದು ಕೊನೆಯ ಅವಕಾಶವಿದೆ(ಏಜೆನ್ಸೀಸ್​).