FIFA ದಲ್ಲಿ ಮತ್ತೊಂದು ವಿವಾದ: ಮೆಸ್ಸಿ ಸೇರಿ ಅರ್ಜೆಂಟೀನಾ ಆಟಗಾರರ ಪಾಸ್‌ಪೋರ್ಟ್ ವಿವರ ಸೋರಿಕೆ; ಆಯೋಜಕರ ವಿರುದ್ಧ ರೊಚ್ಚಿಗೆದ್ದ ಫ್ಯಾನ್ಸ್​! Lionel Messi Passport leaked

ಫುಟ್ಬಾಲ್​: 2026 ರ ಫಿಫಾ ವಿಶ್ವಕಪ್​ ವಿವಾದಗಳ ಮೂಲಕವೇ ಆರಂಭವಾಗಿದೆ ಎಂದರೆ ಸುಳ್ಳಲ್ಲ. ಟೂರ್ನಿ ಆರಂಭಕ್ಕೂ ಮುನ್ನ ಸೊಮಾಲಿಯಾದ ರೆಫರಿ ಒಮರ್ ಅಬ್ದುಲ್ಕದಿರ್ ಅರ್ಟನ್​ನ್ನು ತವರಿಗೆ ವಾಪಸ್​ ಕಳಿಸಿದರೆ, ಈಗ ಅರ್ಜೆಂಟೀನಾದ ಆಟಗಾರರ ಪಾರ್ಸ್​ಪೋರ್ಟ್​ ದಾಖಲೆ ಸೋರಿಕೆ (Lionel Messi Passport leaked) ಯಾಗಿದೆ ಎಂದು ವರದಿಯಾಗಿದೆ.

ಮಂಗಳವಾರ (ಜೂ.9) ಅಲಬಾಮಾದ ಜೋರ್ಡಾನ್-ಹೇರ್ ಕ್ರೀಡಾಂಗಣದಲ್ಲಿ, ಐಸ್​ಲ್ಯಾಂಡ್​ ಜೊತೆ ನಡೆದ ಅಭ್ಯಾಸ ಪಂದ್ಯದಲ್ಲಿ ಲಿಯೋನಲ್​ ಮೆಸ್ಸಿ ಸೇರಿ ಇತರೆ ಅರ್ಜೆಂಟೀನಾ ಆಟಗಾರರ ಪಾಸ್​ಪೋರ್ಟ್​ ಸಂಖ್ಯೆಗಳನ್ನು ಟೀಂ ಶೀಟ್​ನಲ್ಲಿ ಪ್ರದರ್ಶನ ಮಾಡಲಾಗಿದೆ. ಆದರೆ ಟೀಂ ಶೀಟ್​ನಲ್ಲಿ ಪಾಸ್​ಪೋರ್ಟ್​ ಸಂಖ್ಯೆಯನ್ನು ಮರೆಮಾಚಬೇಕೆಂಬ ನಿಯಮವಿದ್ದರೂ ಸಹ ಇದನ್ನು ಮಾಡದಿರುವುದು ವೈಯಕ್ತಿಕ ದಾಖಲೆ ಸೋರಿಕೆ ಆರೋಪಕ್ಕೆ ಗುರಿಯಾಗಿದೆ.

ಹಾಗೂ ಇಲ್ಲಿ ಕೇವಲ ಅರ್ಜೆಂಟೀನಾದ ಆಟಗಾರರ ಪಾಸ್​ಪೋರ್ಟ್​ ದಾಖಲೆ ಮಾತ್ರ ಸೋರಿಕೆಯಾಗಿದ್ದು ಐಸ್​ಲ್ಯಾಂಡ್​ ಆಟಗಾರರ ಪಾಸ್​ಪೋರ್ಟ್​ನ್ನು ಬ್ಲರ್​ ಮಾಡಿರುವುದು ಫುಟ್ಬಾಲ್ ಅದರಲ್ಲೂ ಅರ್ಜೆಂಟೀನಾದ ಅಭಿಮಾನಿಗಳ ಕೋಪಕ್ಕೆ ಕಾರಣವಾಗಿದೆ.

ಅಂದು ನಡೆದ ಅಭ್ಯಾಸ ಪಂದ್ಯದಲ್ಲಿ ಶುಭಾರಂಭ ಮಾಡಿದ ಅರ್ಜೆಂಟೀನಾ ತಂಡ 3-0 ಅಂತರದಲ್ಲಿ ಐಸ್​ಲ್ಯಾಂಡ್​ ತಂಡವನ್ನು ಸೋಲಿಸಿತು. ಹ್ಯಾಮ್​​ಸ್ಟ್ರಿಂಗ್​ ಇಂಜುರಿಯಿಂದ ಬಳಲುತ್ತಿದ್ದ ಲಿಯೋನಲ್​ ಮೆಸ್ಸಿ, ಈ ಪಂದ್ಯದಲ್ಲಿ 2 ಗೋಲುಗಳನ್ನ ಗಳಿಸುವಲ್ಲಿ ಯಶಸ್ವಿಯಾದರು.

ಫುಟ್‌ಬಾಲ್ ಇತಿಹಾಸದಲ್ಲೇ ಮೊದಲ ಬಾರಿಗೆ ವಿಶ್ವಕಪ್ ಪಂದ್ಯಾವಳಿಯಲ್ಲಿ ರೆಫರಿಯಾಗಿ ಕಾಣಿಸಿಕೊಂಡು ಇತಿಹಾಸ ಸೃಷ್ಟಿಸಬೇಕಾಗಿದ್ದ ಸೊಮಾಲಿಯಾದ ರೆಫರಿ ಒಮರ್ ಅಬ್ದುಲ್ಕದಿರ್ ಅರ್ಟನ್ ಅವರ ಕನಸು ಈಗ ಅಮೆರಿಕದ ನಿಯಮಗಳಿಂದಾಗಿ ನುಚ್ಚುನೂರಾಗಿದೆ. ಸ್ಥಳೀಯ ಭಯೋತ್ಪಾದಕ ಗುಂಪುಗಳೊಂದಿಗೆ ಅರ್ಟನ್ ಸಂಪರ್ಕ ಹೊಂದಿದ್ದಾರೆ ಎಂಬ ಅನುಮಾನದ ಹಿನ್ನಲೆ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಮೆರಿಕದ ಕಸ್ಟಮ್ಸ್​ ಅಧಿಕಾರಿಗಳು ತಿಳಿಸಿದ್ದಾರೆ.

2025ರ ಆಫ್ರಿಕಾದ ಅತ್ಯುತ್ತಮ ರೆಫರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದ ಅರ್ಟನ್, ಈ ಬಾರಿ ಅಮೆರಿಕ, ಮೆಕ್ಸಿಕೊ ಮತ್ತು ಕೆನಡಾ ಜಂಟಿಯಾಗಿ ಆಯೋಜಿಸುತ್ತಿರುವ ಫಿಫಾ ವಿಶ್ವಕಪ್​ನಲ್ಲಿ ಭಾಗವಹಿಸಲು ಸಜ್ಜಾಗಿದ್ದರು. ಆದರೆ ಮಿಯಾಮಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಅವರನ್ನು ಅಮೆರಿಕದ ಕಸ್ಟಮ್ಸ್ ಮತ್ತು ಗಡಿ ರಕ್ಷಣೆ (CBP) ಅಧಿಕಾರಿಗಳು ತಡೆದು, ವಾಪಸ್ ಕಳುಹಿಸಿದ್ದಾರೆ, (ಏಜನ್ಸೀಸ್​).