ರಾಘವೇಂದ್ರ ಪೈ ಕುಂದಾಪುರ
ಮೊದಲ ಬಾರಿ ಹಾಕಿದ ಬೀಜ ನೆರೆ ನೀರಿನಲ್ಲಿ ಕೊಳೆತು ಹೋದ ಪರಿಣಾಮ ಬೈಂದೂರು ತಾಲೂಕಿನ ಕೆಲ ನೆರೆಪೀಡಿತ ಪ್ರದೇಶದ ರೈತರು ಎರಡನೇ ಬೆಳೆ ಬೆಳೆಯಲು ಮುಂದಾಗಿದ್ದಾರೆ.
ಈ ಬಾರಿಯ ಮುಂಗಾರು ಕೃಷಿಗೆ ಆಶಾದಾಯಕವಾಗಿರಲಿದೆ ಎಂದು ನಂಬಿಕೊಂಡಿದ್ದ ರೈತರಿಗೆ ಆರಂಭದಲ್ಲೇ ಮುಂಗಾರು ಮಳೆ ಆತಂಕ ಹುಟ್ಟಿಸಿತ್ತು. ಬೀಜ ಬಿತ್ತನೆ ಸಂದರ್ಭ ಸುರಿದ ವ್ಯಾಪಕ ಮಳೆಯ ಕಾರಣ ನೆರೆ ನೀರಿನಲ್ಲಿ ರೈತರು ಬಿತ್ತಿದ ಬೀಜ ಕೊಳೆತು ಹೋಗಿತ್ತು. ಇದೀಗ ಎರಡನೇ ಬೆಳೆ ಬೆಳೆಯಲು ಮುಂದಾಗಿದ್ದಾರೆ. ಆದರೆ ಬುಧವಾರದಿಂದ ಸುರಿಯುತ್ತಿರುವ ಮಳೆ ರೈತರ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದೆ.
ನೆರೆ ಆತಂಕ: ಮೇ ಕೊನೆ ವಾರದಲ್ಲಿ ಸುರಿದ ಪೂರ್ವ ಮುಂಗಾರು ಮಳೆ ಹಾಗೂ ಆ ಬಳಿಕ ನಿರಂತರವಾಗಿ ಸುರಿದ ಮಳೆಯಿಂದ ಬೈಂದೂರು ತಾಲೂಕಿನ ನಾಡ, ಹಡವು, ನಾವುಂದ, ಸಾಲ್ಬುಡ, ಪಡುಕೋಣೆ, ಬಡಾಕೆರೆ ಮೊದಲಾದ ಕಡೆಗಳಲ್ಲಿ ನೆರೆ ಕಾಣಿಸಿಕೊಂಡಿತು. ಹೊಲ ಗದ್ದೆಗಳು ನೆರೆ ನೀರಿನಿಂದ ಸಂಪೂರ್ಣ ಜಲಾವೃತಗೊಂಡ ಪರಿಣಾಮ ರೈತರು ಬಿತ್ತಿದ ಬೀಜಗಳು ಕೊಳೆತು ಬೆಳೆ ಹಾನಿಯಾಗಿತ್ತು. ಹೀಗಾಗಿ ಈ ಭಾಗದ ರೈತರು ಎರಡನೇ ಬೆಳೆ ಬೆಳೆಯಲು ಮುಂದಾಗಿದ್ದಾರೆ. ಕಳೆದ 15 ದಿನಗಳಿಂದ ಮಳೆ ಪ್ರಮಾಣ ಕಡಿಮೆಯಾದ ಹಿನ್ನೆಲೆಯಲ್ಲಿ ರೈತರು ಎರಡನೇ ಬಾರಿ ಬೀಜ ಬಿತ್ತಿ ನೇಜಿ ಸಿದ್ಧಪಡಿಸಿಕೊಂಡು ನಾಟಿ ಕಾರ್ಯ ಆರಂಭಿಸಿದ್ದಾರೆ.
