ನವದೆಹಲಿ: ರೋಹಿತ್ ಶರ್ಮ ಬದಲಿಗೆ ಮುಂಬೈ ಇಂಡಿಯನ್ಸ್ ತಂಡದ ನಾಯಕನಾಗಿ ನೇಮಕಗೊಂಡ ಬಳಿಕ ಟೀಕೆಗಳನ್ನು ಎದುರಿಸುತ್ತಲೇ ಬಂದಿರುವ ಹಾರ್ದಿಕ್ ಪಾಂಡ್ಯ, ಇದೀಗ ಐಪಿಎಲ್-17ರಲ್ಲಿ ಕಂಡ ಆರಂಭಿಕ 2 ಸೋಲಿನ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ರೋಹಿತ್ ಅಭಿಮಾನಿಗಳಿಂದ ಇನ್ನಷ್ಟು ನಿಂದನೆಗಳಿಗೆ ಗುರಿಯಾಗಿದ್ದಾರೆ. ಇಬ್ಬರು ಆಟಗಾರರ ಅಭಿಮಾನಿಗಳ ನಡುವಿನ ಈ ಜಗಳವನ್ನು ತನ್ನ ಯೂಟ್ಯೂಬ್ ಚಾನಲ್ನಲ್ಲಿ ಖಂಡಿಸಿರುವ ಅನುಭವಿ ಸ್ಪಿನ್ನರ್ ಆರ್. ಅಶ್ವಿನ್, "ಅಭಿಮಾನಿಗಳ ನಡುವಿನ ಸಮರ ಇಂಥ ಕೆಟ್ಟ ಹಾದಿ ಹಿಡಿಯಬಾರದು. ಈ ಇಬ್ಬರೂ ಆಟಗಾರರು ನಮ್ಮ ದೇಶವನ್ನೇ ಪ್ರತಿನಿಧಿಸುತ್ತಾರೆ ಎಂಬುದನ್ನು ಮರೆಯಬಾರದು. ಇದು ಕ್ರಿಕೆಟ್. ಸಿನಿಮಾ ಸಂಸತಿಯನ್ನು ಇಲ್ಲಿಗೆ ತರಬೇಡಿ. ಇದರಲ್ಲಿ ಮಾರ್ಕೆಟಿಂಗ್, ಬ್ರಾ$್ಯಂಡಿಂಗ್ ಸಂಗತಿಗಳೂ ಇವೆ ಎಂಬುದು ನನಗೆ ತಿಳಿದಿದೆ' ಎಂದು ಹೇಳಿದ್ದಾರೆ.
