ಹೇಮನಾಥ್ ಪಡುಬಿದ್ರಿ
ಕಾಪು ತಾಲೂಕಿನಲ್ಲಿ ಎರಡು ಅಂಗನವಾಡಿಗಳಿಗೆ ಕಟ್ಟಡ ನಿರ್ಮಾಣಗೊಂಡು ತಿಂಗಳೂಗಳೇ ಕಳೆದರೂ, ಮಕ್ಕಳ ಕಲರವ ಕೇಳುವ ಭಾಗ್ಯ ಇನ್ನೂ ಇಲ್ಲವಾಗಿದೆ. ಶಿಷ್ಟಾಚಾರದ ನೆಪದಲ್ಲಿ ಕಟ್ಟಡ ಉದ್ಘಾಟನೆ ನೇಪಥ್ಯಕ್ಕೆ ಸರಿದಿದ್ದು, ಕುಂಜೂರು ಹಾಗೂ ಪಲಿಮಾರು ಅಂಗನವಾಡಿಯ ಮಕ್ಕಳು ಶಿಥಿಲ ಕಟ್ಟಡದಲ್ಲಿಯೇ ಕಲಿಯವಂತಾಗಿದೆ.
ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಸಹಿತ ವಿವಿಧ ಇಲಾಖೆಗಳ ಅನುದಾನ, ದಾನಿಗಳ ನೆರವು ಸೇರಿ 16.50 ಲಕ್ಷ ರೂ. ವೆಚ್ಚದಲ್ಲಿ ಎಲ್ಲೂರು ಗ್ರಾಮದ ಕುಂಜೂರು ದುರ್ಗಾನಗರ ಮತ್ತು ಪಲಿಮಾರು ಗ್ರಾಪಂ ಬಳಿಯಲ್ಲಿ ಅಂಗನವಾಡಿ ಕಟ್ಟಡಗಳು ನಿರ್ಮಾಣಗೊಂಡು ನಾಲ್ಕೈದು ತಿಂಗಳಾಗಿದೆ. ಇವುಗಳ ಉದ್ಘಾಟನೆಗಾಗಿ ಪಲಿಮಾರು ಗ್ರಾಮ ಪಂಚಾಯಿತಿ ಎರಡು ಬಾರಿ ದಿನಾಂಕ ನಿಗದಿ ಮಾಡಿದ್ದರೂ, ಶಿಷ್ಟ್ಟಾಚಾರದ ನೆಪದಲ್ಲಿ ಮುಂದೂಡಲಾಗುತ್ತಿದೆ.
ಸುಸಜ್ಜಿತವಾದ ಸ್ವಂತ ಕಟ್ಟಡಗಳಿದ್ದರೂ ಅಂಗನವಾಡಿ ಪುಟಾಣಿಗಳು ಎರಡು ವರ್ಷಗಳಿಂದ ಪಲಿಮಾರು ಪ್ರಾಥಮಿಕ ಶಾಲೆ ಕೊಠಡಿಯಲ್ಲೇ ಕಲಿಯುವಂತಾಗಿದೆ. ಮಳೆಯಿಂದ ಸೋರುತ್ತಿದ್ದ ಕೊಠಡಿಯನ್ನು ಗ್ರಾಪಂ ದುರಸ್ತಿ ಮಾಡಿತ್ತು.
