ವೀರಶೈವವು ವಿಭಿನ್ನ ಕ್ರಿಯೆಗಳಿಗೆ ಅನುಸರಿಸಿ ಅನೇಕ ನಾಮಗಳನ್ನು ಅನುಸರಿಸುತ್ತಿದೆ. ವೀರಶೈವನು ಗುರುಗಳಿಂದ ಲಿಂಗವನ್ನು ಆಯತ ಮಾಡಿಕೊಳ್ಳುವುದರಿಂದ ಲಿಂಗಾಯತನೆಂದೂ, ಲಿಂಗವನ್ನು ಸದಾ ಧರಿಸುವುದರಿಂದ ಲಿಂಗವಂತನೆಂದೂ, ಶಿವದೀಕ್ಷೆಯಾದಾಗ ಮಹಾಮಂತ್ರವನ್ನು ಅಂಗಾಂಗಗಳಲ್ಲಿ ಸಂಬಂಧಿಸುವುದರಿಂದ ಮಂತ್ರಶರೀರ, ಅಪ್ರಾಕೃತಶರೀರ, ವಿಶಿಷ್ಟವ್ರತಧಾರಿಯಾಗಿದ್ದರಿಂದ ಶಿರೋವ್ರತ, ಶಾಂಭವ ವ್ರತ, ಪ್ರಸಾದಕಾಯನು, ಪ್ರಕಾಶಕಾಯನು, ವರ್ಣಾಶ್ರಮ ಮೀರಿ ನಡೆಯುವ ಕಾರಣ ಅತಿವರ್ಣಾಶ್ರಮ ಶರೀರದ ಎಲ್ಲ ಅಂಗಗಳಲ್ಲಿ ಲಿಂಗಧರಿಸುವುದರಿಂದ ಸರ್ವಂಗಲಿಂಗಿ ಆಗುವನು. ಹೀಗೆ ಹಲವಾರು ಪ್ರಕ್ರಿಯೆಗಳಿಂದ ಅನ್ವರ್ಥಕ ಹನ್ನೊಂದು ಹೆಸರುಗಳನ್ನು ಹೊಂದುವನು. ಅದರಲ್ಲಿ ವೀರಶೈವ ಪದ ತತ್ವವಾಚಿಯಾಗಿದೆ. ಸಾಮಾನ್ಯವಾಗಿ ಜನಪದವಾಣಿಯಲ್ಲಿ ಲಿಂಗಾಯತ ಪದ ಬಳಕೆಯಾಗಿದೆ. ಅಂಗೈಯಲ್ಲಿ ಲಿಂಗಧರಿಸಿ, ಲಿಂಗದಲ್ಲಿ ದೃಷ್ಟಿಮನವನ್ನಿರಿಸಿ ಶಿವಯೋಗವನ್ನು ಸಾಧಿಸುವ ಕ್ರಿಯೆಯೇ ವೀರಶೈವ ಪದ ಸೂಚಿಸುವುದು ಗ್ರಂಥಸ್ಥವಾಗಿ ತಿಳಿದುಬಂದಿದೆ ಎಂದರು.
