ಕ್ರೈಸ್ಟ್ಚರ್ಚ್: ಭಾರತಕ್ಕೆ ವೈಟ್ವಾಷ್ ಸೋಲುಣಿಸಿ ವಿಶ್ವಾಸದೊಂದಿಗೆ ತವರಿಗೆ ಮರಳಿದ್ದ ನ್ಯೂಜಿಲೆಂಡ್ ತಂಡ ಕ್ರೋವ್-ಥೋರ್ಪೆ ಟ್ರೋಫಿ ಟೆಸ್ಟ್ ಸರಣಿಯ ಮೊದಲ ಪಂದ್ಯದಲ್ಲಿ ಪ್ರವಾಸಿ ಇಂಗ್ಲೆಂಡ್ ಎದುರು 8 ವಿಕೆಟ್ಗಳಿಂದ ಸೋಲಿನ ಆಘಾತ ಎದುರಿಸಿದೆ. ಇದರಿಂದ ಬೆನ್ ಸ್ಟೋಕ್ಸ್ ಪಡೆ 3 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.
ಹ್ಯಾಗ್ಲೆ ಓವಲ್ನಲ್ಲಿ ಭಾನುವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ 6 ವಿಕೆಟ್ಗೆ 155 ರನ್ಗಳಿಂದ 4ನೇ ದಿನದಾಟ ಆರಂಭಿಸಿದ ಕಿವೀಸ್, ಭೋಜನ ವಿರಾಮದ ವೇಳೆಗೆ 254 ರನ್ಗಳಿಗೆ ಸರ್ವಪತನ ಕಂಡಿತು. ಇದರಿಂದ ಗೆಲುವಿಗೆ 104 ರನ್ ಗುರಿ ಪಡೆದ ಇಂಗ್ಲೆಂಡ್ 12.4 ಓವರ್ಗಳಲ್ಲೇ 2 ವಿಕೆಟ್ ನಷ್ಟದಲ್ಲಿ ಗುರಿ ತಲುಪಿತು. ಪದಾರ್ಪಣೆ ಪಂದ್ಯವಾಡಿದ ಜೇಕಬ್ ಬೆಥೆಲ್ (50*ರನ್, 37 ಎಸೆತ, 8 ಬೌಂಡರಿ, 1 ಸಿಕ್ಸರ್) ಬಿರುಸಿನಾಟದಿಂದ ಇಂಗ್ಲೆಂಡ್, ಪ್ರತಿ ಓವರ್ಗೆ 8.21 ರನ್ ಸರಾಸರಿಯಲ್ಲಿ ಚೇಸಿಂಗ್ ಮಾಡಿತು. ಸರಣಿಯ 2ನೇ ಟೆಸ್ಟ್ ಡಿಸೆಂಬರ್ 6ರಿಂದ ವೆಲ್ಲಿಂಗ್ಟನ್ನಲ್ಲಿ ನಡೆಯಲಿದೆ.
2ನೇ ಇನಿಂಗ್ಸ್ನಲ್ಲಿ 42 ರನ್ಗಳಿಗೆ 6 ವಿಕೆಟ್ ಸಹಿತ ಪಂದ್ಯದಲ್ಲಿ ಒಟ್ಟು 10 ವಿಕೆಟ್ ಕಬಳಿಸಿದ ವೇಗಿ ಬೆಡನ್ ಕರ್ಸ್ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ನ್ಯೂಜಿಲೆಂಡ್: 348 ಮತ್ತು 254 (ಮಿಚೆಲ್ 84, ಸ್ಮಿತ್ 21, ಸೌಥಿ 12, ಕರ್ಸ್ 42ಕ್ಕೆ 6, ವೋಕ್ಸ್ 59ಕ್ಕೆ 3), ಇಂಗ್ಲೆಂಡ್: 499 ಮತ್ತು 2 ವಿಕೆಟ್ಗೆ 104 (ಕ್ರೌಲಿ 1, ಡಕೆಟ್ 27, ಬೆಥೆಲ್ 50*, ರೂಟ್ 23*, ಹೆನ್ರಿ 12ಕ್ಕೆ 1, ಓರೌರ್ಕಿ 27ಕ್ಕೆ 1). ಪಂದ್ಯಶ್ರೇಷ್ಠ: ಬೆಡನ್ ಕರ್ಸ್.
ಭಾರತಕ್ಕೆ ಅನುಕೂಲ
ಕಿವೀಸ್ ವಿರುದ್ಧ ಮೊದಲ ಟೆಸ್ಟ್ನಲ್ಲಿ ಇಂಗ್ಲೆಂಡ್ ಗೆದ್ದಿರುವುದು ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ (ಡಬ್ಲ್ಯುಟಿಸಿ) ಫೈನಲ್ ರೇಸ್ನಲ್ಲಿ ಭಾರತಕ್ಕೆ ತುಸು ಅನುಕೂಲ ಮಾಡಿಕೊಟ್ಟಿದೆ. ಇನ್ನು ಭಾರತ ನೇರವಾಗಿ ಡಬ್ಲ್ಯುಟಿಸಿ ಫೈನಲ್ಗೇರಲು ಬಾರ್ಡರ್-ಗಾವಸ್ಕರ್ ಟ್ರೋಫಿಯಲ್ಲಿ 5-0 ಅಥವಾ 4-0 ಅಂತರದಿಂದಲೇ ಗೆಲ್ಲಬೇಕೆಂದಿಲ್ಲ. 4-1 ಅಥವಾ 3-0 ಅಂತರದಿಂದ ಗೆದ್ದರೂ ಸಾಕಾಗುತ್ತದೆ. ಆಗ ಅಂಕಗಳಿಕೆಯಲ್ಲಿ ಭಾರತವನ್ನು ದಣ ಆಫ್ರಿಕಾಕ್ಕೆ ಮಾತ್ರ ಹಿಂದಿಕ್ಕಲು ಸಾಧ್ಯವಿದೆ. ಇದಲ್ಲದೆ ಭಾರತ 3-2ರಿಂದ ಸರಣಿ ಗೆದ್ದರೂ ಸತತ 3ನೇ ಬಾರಿ ಡಬ್ಲ್ಯುಟಿಸಿ ಫೈನಲ್ಗೇರುವ ಅವಕಾಶ ಹೆಚ್ಚಿದೆ.
ಚಿನ್ನಸ್ವಾಮಿ ಕ್ರೀಡಾಂಗಣದ ಪ್ರೇಕ್ಷಕರ ಸ್ಟ್ಯಾಂಡ್ಗೆ ಶಾಂತಾ ರಂಗಸ್ವಾಮಿ ಹೆಸರಿಡಲು ಒತ್ತಾಯ