ಹೈದರಾಬಾದ್: ಎಷ್ಟೋ ಜನ ಕೂದಲೆಳೆಯ ಅಂತರದಲ್ಲಿ ಎಂಥೆಂಥದ್ದೋ ಅಪಾಯ-ಅಪಘಾತಗಳಿಂದ ಪಾರಾಗುತ್ತಾರೆ. ಆದರೆ ಇಲ್ಲೊಬ್ಬಳು ಯುವತಿ ತಲೆ ಕೂದಲು ಸಿಲುಕಿಕೊಂಡಿದ್ದರಿಂದಾಗಿಯೇ ಅಪಘಾತಕ್ಕೀಡಾಗಿ ಪ್ರಾಣ ಕಳೆದುಕೊಂಡಿದ್ದಾಳೆ.
ಹೈದರಾಬಾದ್ನ ಬಿ-ಟೆಕ್ ವಿದ್ಯಾರ್ಥಿನಿ ವರ್ಷಿಣಿ ಗುರುವಾರ ಗೋ-ಕಾರ್ಟಿಂಗ್ ವೇಳೆ ಅಪಘಾತಕ್ಕೀಡಾಗಿ ಮೃತಪಟ್ಟಿದ್ದಾಳೆ. ಮೀರಪಟ್ ಪೊಲೀಸ್ ಠಾಣೆ ವ್ಯಾಪ್ತಿಯ ಗುರ್ರಂಗುಡದಲ್ಲಿನ ಪ್ಲೇ ಜೋನ್ನಲ್ಲಿ ಆಕೆ ಗೋ-ಕಾರ್ಟಿಂಗ್ ಹೋದಾಗ, ಅದರ ಒಂದು ಚಕ್ರಕ್ಕೆ ಆಕೆಯ ಕೇಶ ಸಿಲುಕಿಕೊಂಡಿದೆ. ಪರಿಣಾಮ ಗೋ-ಕಾರ್ಟಿಂಗ್ ಅಪಘಾತಕ್ಕೀಡಾಗಿ ಆಕೆ ಜೀವ ಕಳೆದುಕೊಂಡಿದ್ದಾಳೆ.
ಅಪಘಾತದ ತೀವ್ರತೆಗೆ ಆಕೆ ಧರಿಸಿದ್ದ ಹೆಲ್ಮೆಟ್ ಕೂಡ ಮುರಿದು ಹೋಗಿ, ಗಂಭೀರ ಗಾಯಕ್ಕೆ ಒಳಗಾಗಿದ್ದಳು. ತಕ್ಷಣ ಅವಳನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ಮಾರ್ಗಮಧ್ಯೆ ಮೃತಪಟ್ಟಿದ್ದಾಳೆ. ಈ ಬಗ್ಗೆ ಆಕೆಯ ಪಾಲಕರು ಗೋ-ಕಾರ್ಟಿಂಗ್ನವರ ವಿರುದ್ಧ ನಿರ್ಲಕ್ಷ್ಯ ಪ್ರಕರಣ ದಾಖಲಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)