ಕಾಸರಗೋಡು ಭಾಷಾ ಅಲ್ಪಸಂಖ್ಯಾತ ಪ್ರದೇಶವಾಗಿದ್ದು, ಇದು ಭಾರತೀಯ ಸಂವಿಧಾನದಲ್ಲೂ ಉಲ್ಲೇಖಿಸಲ್ಪಟ್ಟಿದೆ. ಮಾತ್ರವಲ್ಲ ಸಂವಿಧಾನಾತ್ಮಕವಾಗಿ ಕಾಸರಗೋಡಿಗೆ ಕೆಲವೊಂದು ಸವಲತ್ತುಗಳನ್ನೂ ಕಲ್ಪಿಸಲಾಗಿದ್ದರೂ ಇದ್ಯಾವುದೂ ತಮಗೆ ಅನ್ವಯವಾಗುವುದಿಲ್ಲ ಎಂಬ ಧೋರಣೆ ಸರ್ಕಾರಕ್ಕಿದೆ. ಈಗಾಗಲೇ ’ಆಡಳಿತ ಭಾಷೆ ಮಲಯಾಳ’ಎಂಬ ಘೋಷಣೆಯೊಂದಿಗೆ ಅಚ್ಚಕನ್ನಡ ಪ್ರದೇಶದಲ್ಲೂ ಮಲಯಾಳ ನಾಮಫಲಕ, ವಿವಿಧ ಸರ್ಕಾರಿ ಕಚೇರಿಗಳಲ್ಲಿ ಸೂಚನೆ, ಆದೇಶಗಳೆಲ್ಲವೂ ಮಲಯಾಳದಲ್ಲೇ ಮುದ್ರಣಗೊಳ್ಳುತ್ತಿದ್ದು, ಇದರಿಂದ ಕನ್ನಡಿಗರು ಬಹಳಷ್ಟು ಸಂಕಷ್ಟ ಅನುಭವಿಸಬೇಕಾಗುತ್ತಿದೆ. ಕನ್ನಡ ಮಾತ್ರವಲ್ಲ ಅದೆಷ್ಟೋ ಮಂದಿ ಕಾಸರಗೋಡು, ಮಂಜೇಶ್ವರ ತಾಲೂಕಿನಲ್ಲಿದ್ದು, ಇವರಿಗೆ ಮಲಯಾಳದ ಜ್ಞಾನ ಲವಲೇಶವೂ ಇಲ್ಲ. ಇನ್ನು ವಿದ್ಯುತ್ ಬಿಲ್ ಮಲಯಾಳದಲ್ಲೇ ಬಂದರೆ ಈ ಚೀಟಿ ಹಿಡಿದುಕೊಂಡು, ಮಲಯಾಳ ಬಲ್ಲ ಇನ್ನೊಬ್ಬರ ಬಾಗಿಲಿಗೆ ತೆರಳಬೇಕಾದ ಅನಿವಾರ್ಯತೆ ಎದುರಾಗಲಿದೆ ಎಂದು ಕನ್ನಡಿಗರು ಅಳಲು ವ್ಯಕ್ತಪಡಿಸಿದ್ದಾರೆ.
