ಎಲ್ಲೆಲ್ಲೂ ಈಗ ಕಲೆಬೆರಕೆ ಮತ್ತು ಕಳಪೆ ಗುಣಮಟ್ಟದ ಸಮಸ್ಯೆ ವ್ಯಾಪಿಸಿಕೊಂಡಿದೆ. ಆಹಾರಪದಾರ್ಥಗಳ ವಿಷಯದಲ್ಲಿ ವ್ಯಾಪಕವಾಗಿದ್ದ ಈ ಸಮಸ್ಯೆ, ಇತ್ತೀಚೆಗೆ ದೇವರ ಪ್ರಸಾದಕ್ಕೂ ವಿಸ್ತರಿಸಿತು. ಈಗ ಆತಂಕ ಪಡುವ ಸಂಗತಿ ಎಂದರೆ ಜ್ವರ, ತಲೆನೋವು ಎಂದು ಸಾಮಾನ್ಯವಾಗಿ ಬಳಸಲಾಗುವ ಔಷಧಗಳು ಕಳಪೆ ಎಂಬ ಸಂಗತಿ ಬೆಳಕಿಗೆ ಬಂದಿರುವುದು. ಹೌದು, ಸಾರ್ವಜನಿಕರು ಸಾಮಾನ್ಯವಾಗಿ ಉಪಯೋಗಿಸುತ್ತಿರುವ 50ಕ್ಕೂ ಹೆಚ್ಚು ಮಾತ್ರೆಗಳನ್ನು ಕಳಪೆ ಎಂದು ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ (ಸಿಡಿಎಸ್ಸಿಒ) ಗುರುತಿಸಿದ್ದು, ಜನರು ಗಾಬರಿ ಪಡುವಂತಾಗಿದೆ. ದೇಶದ ಪ್ರಮುಖ ಫಾರ್ವ ಕಂಪನಿಗಳ 53 ಔಷಧಗಳು ಸರ್ಕಾರದ ಗುಣಮಟ್ಟ ಪರೀಕ್ಷೆಯಲ್ಲಿ ವಿಫಲವಾಗಿವೆ. ಗುಣಮಟ್ಟ ವಿಫಲವಾದ ಔಷಧಗಳ ಪಟ್ಟಿಯನ್ನು ಸಿಡಿಎಸ್ಸಿಒ ಬಿಡುಗಡೆ ಮಾಡಿದ್ದು, ಇದರಲ್ಲಿ 53 ಔಷಧಗಳ ಬಗ್ಗೆ ಎಚ್ಚರಿಕೆ ನೀಡಿದೆ. ಇವುಗಳಲ್ಲಿ ರಕ್ತದೊತ್ತಡ (ಬಿಪಿ), ಆಸಿಡ್ ರೀಫ್ಲಕ್ಸ್ನಂತಹ ತೊಂದರೆಗಳಿಗೆ ತೆಗೆದುಕೊಳ್ಳುವ ಮಾತ್ರೆಗಳೂ ಇವೆ. ಪ್ರಯೋಗಾಲಯಗಳಲ್ಲಿ ಪ್ರತಿ ತಿಂಗಳು ನಡೆಸುವ ರ್ಯಾಂಡಮ್ ಸ್ಯಾಂಪಲ್ ಪರೀಕ್ಷೆಯ ವೇಳೆ ಈ ವಿಚಾರ ಬೆಳಕಿಗೆ ಬಂದಿದೆ. ಆಸಿಡಿಟಿ ನಿಯಂತ್ರಣಕ್ಕೆ ಬಳಸಲಾಗುವ ಪ್ಯಾನ್-ಡಿ, ಜ್ವರಕ್ಕೆ ನೀಡಲಾಗುವ ಪ್ಯಾರಾಸಿಟಮಲ್ ಐಪಿ 500 ಎಂಜಿ, ವಿಟಮಿನ್ ಸಿ ಮತ್ತು ಡಿ3 ಮಾತ್ರೆಗಳಾದ ಶೆಲ್ಕಾಲ್, ಬಿ-ಕಾಂಪ್ಲೆಕ್ಸ್, ವಿಟಮಿನ್ ಸಿ ಮಾತ್ರೆಗಳು ಸೇರಿದಂತೆ ಹಲವು ಫಾರ್ವ ಕಂಪನಿಗಳ ಔಷಧಗಳು ಈ ಪಟ್ಟಿಯಲ್ಲಿವೆ.
