ಸಮೀಕ್ಷೆಯ ಪ್ರಶ್ನಾಪಟ್ಟಿಯಲ್ಲಿ ಕೆಲವು ಅನಗತ್ಯ ಪ್ರಶ್ನೆಗಳು ಇವೆ, ಇವುಗಳನ್ನೆಲ್ಲ ಮುಗಿಸಲು ಹೆಚ್ಚು ಸಮಯ ಹಿಡಿಯುತ್ತಿದೆ ಎಂಬಿತ್ಯಾದಿ ದೂರುಗಳು ಕೇಳಿಬರುತ್ತಿವೆ. ಹಾಗೆಯೇ ವೈಯಕ್ತಿಕ ಮಾಹಿತಿ ಸೋರಿಕೆಯಾದರೆ ಆಗುವ ನಷ್ಟ ಭರಿಸುವವರಾರು ಎಂಬ ಪ್ರಶ್ನೆಯನ್ನೂ ಕೆಲವು ಸಾರ್ವಜನಿಕರು ಕೇಳುತ್ತಿದ್ದಾರೆ. ಅಲ್ಲದೆ, ತರಾತುರಿಯಲ್ಲಿ ಸಮೀಕ್ಷೆ ನಡೆಸಲಾಗುತ್ತಿದ್ದು, ಇದು ಹಲವು ಅಪಸವ್ಯ, ಗೊಂದಲ ಹಾಗೂ ಪ್ರಮಾದಗಳಿಗೆ ಕಾರಣವಾಗುತ್ತಿದೆ. ಸಮೀಕ್ಷೆಗೆ ಅಂಗವಿಕಲರನ್ನು ಬಳಸಿಕೊಂಡಿರುವುದು, ಶಿಕ್ಷಕರನ್ನು ಪರಿಚಯ ಇಲ್ಲದ ಸ್ಥಳದಲ್ಲಿ ಸಮೀಕ್ಷೆಗೆ ನಿಗದಿ ಮಾಡಿರುವುದು, ಆರೋಗ್ಯ ಸಮಸ್ಯೆಯ ಕಾರಣ ಹೇಳಿದರೂ ಹಿರಿಯ ಅಧಿಕಾರಿಗಳು ಸಕಾರಾತ್ಮಕವಾಗಿ ಸ್ಪಂದಿಸದೆ ಬೆದರಿಸಿ ಸಮೀಕ್ಷೆ ಮಾಡಿಸುತ್ತಿರುವುದು... ಹೀಗೆ ಗಣತಿದಾರರ ವಲಯದಲ್ಲೂ ಅಸಮಾಧಾನ ಮಡುಗಟ್ಟಿದೆ.
