ಇನ್ನೊಂದೆಡೆ, ತಮಿಳುನಾಡಿನಾದ್ಯಂತ ದೇವಸ್ಥಾನಗಳಲ್ಲಿ ಮೊಬೈಲ್ಫೋನ್ ಬಳಕೆ ನಿಷೇಧಿಸಿ ಮದ್ರಾಸ್ ಹೈಕೋರ್ಟ್ ನೀಡಿರುವ ತೀರ್ಪು ಗಮನಾರ್ಹ. ದೇವರ ಧ್ಯಾನದಲ್ಲಿ ತೊಡಗಲು, ಭಕ್ತಿಪೂರ್ವಕವಾಗಿ ನಮಿಸಲು, ಮಾನಸಿಕ ನೆಮ್ಮದಿ ಕಂಡುಕೊಳ್ಳಲು ಭಕ್ತರು ಭೇಟಿ ನೀಡುವ ದೇವಸ್ಥಾನಗಳಲ್ಲಿ ಕೂಡ ಮೊಬೈಲ್ ರಿಂಗಣ ಸದ್ದು, ಮಾತುಕತೆಗಳ ಕಿರಿಕಿರಿಯು ಅಲ್ಲಿನ ಪಾವಿತ್ರ್ಯಕ್ಕೆ ಭಂಗವುಂಟು ಮಾಡುವಂತಹುದೇ ಆಗಿದೆ. ಈ ಹಿನ್ನೆಲೆಯಲ್ಲಿ, ದೇವಸ್ಥಾನಗಳಲ್ಲಿ ಮೊಬೈಲ್ಫೋನ್ ಡಿಪಾಸಿಟ್ ಲಾಕರ್ಗಳ ವ್ಯವಸ್ಥೆ ಕಲ್ಪಿಸುವಂತೆ ಹೈಕೋರ್ಟ್ ಸೂಚಿಸಿರುವುದು ಇತರೆಡೆಯೂ ಜಾರಿಗೆ ತರಲು ಪರಿಶೀಲಿಸಬಹುದಾದ ಸಲಹೆಯೇ ಆಗಿದೆ. ಮೊಬೈಲ್ ಫೋನ್ ಬಳಸುವುದರ ಮುಖ್ಯ ಪ್ರಯೋಜನವೆಂದರೆ ಸುಲಭವಾದ, ವೇಗವಾದ ಹಾಗೂ ಅಗ್ಗವಾದ ಸಂವಹನ ವಿಧಾನವಾಗಿರುವುದು. ವ್ಯಾಪಾರ- ವಹಿವಾಟಿಗೂ ಬಳಕೆಯಾಗಿ ಹಣ ಸಂಪಾದನೆಯ ಮಾರ್ಗವೂ ಆಗಿದೆ. ತುರ್ತು ಸಂದರ್ಭಗಳಲ್ಲಿ ಸಹಾಯ ಕೋರಲು ಸಂಪರ್ಕಕ್ಕೆ ಅತ್ಯುತ್ತಮ ಉಪಕರಣ ಇದಾಗಿದೆ. ಇದರಲ್ಲಿಯೇ ಫೋಟೋ, ವಿಡಿಯೋ ತೆಗೆಯಬಹುದಾಗಿದೆ. ಹಿಂದೆ ಒಂದು ಫೋನ್, ಕ್ಯಾಮರಾ, ಕಂಪ್ಯೂಟರ್ ಮಾಡುವ ಎಲ್ಲ ಕೆಲಸವನ್ನು ಅಂಗೈಯಲ್ಲೇ ಇರುವ ಒಂದೇಒಂದು ಫೋನ್ನಿಂದ ಮಾಡಲು ಸಾಧ್ಯವಾಗುತ್ತಿರುವ ಅಂಶದಿಂದಾಗಿಯೇ ಇದರ ಜನಪ್ರಿಯತೆ ಹಾಗೂ ಬಳಕೆ ಉತ್ತುಂಗ ತಲುಪಿದೆ. ಆದರೆ, ಯಾವುದೇ ವಸ್ತುವನ್ನು ಅಗತ್ಯಕ್ಕೆ ತಕ್ಕಂತೆ ಹಿತಮಿತವಾಗಿ ಬಳಸಿದರೆ ಪ್ರಯೋಜನಕಾರಿ; ಇಲ್ಲದಿದ್ದರೆ ಅಪಾಯಕಾರಿ. ಅತಿಯಾದರೆ ಅಮೃತವೂ ವಿಷ ಎನ್ನುವುದನ್ನು ಮರೆಯಬಾರದು.
