ಶತಮಾನಕ್ಕೆ ಸಾಕ್ಷಿಯಾಗಬಲ್ಲ ಕಡಲ ಭಾರ್ಗವ

ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅನಿಸಿಕೆ

ಕಾರಂತ ಜನ್ಮದಿನೋತ್ಸವ, ಪ್ರಶಸ್ತಿ ಪ್ರದಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಸಾಹಿತಿ, ಚಿಂತಕ, ಲೇಖಕ, ಕಲಾವಿದ ಎನ್ನುವುದನ್ನೂ ಹೊರತುಪಡಿಸಿ ಡಾ. ಕೋಟ ಶಿವರಾಮ ಕಾರಂತ ಅವರನ್ನು ಬಹುಮುಖಿ ವ್ಯಕ್ತಿತ್ವದ ಅಥವಾ ಹತ್ತಾರು ಬಿಂಬಗಳನ್ನು ಪ್ರಾತಿನಿಧಿಸುವ ವ್ಯಕ್ತಿತ್ವ ಎನ್ನಬಹುದು. ಕಠೋರ, ವಾಸ್ತವಿಕತೆಯನ್ನು ಬರಹಗಳ ಮೂಲಕ ಹೇಳುತ್ತಿದ್ದ ಅವರ ಆಕ್ರೋಶ, ಟೀಕೆಗಳು ಸರ್ಕಾರಕ್ಕೂ ಬಿಸಿ ತಟ್ಟುತ್ತಿತ್ತು. ನೇರ ನಡೆ-ನುಡಿಯ, ಶತಮಾನಕ್ಕೆ ಸಾಕ್ಷಿಯಾಗಬಲ್ಲ ಕಡಲ ಭಾರ್ಗವ ಎಂದು ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅನಿಸಿಕೆ ವ್ಯಕ್ತಪಡಿಸಿದರು.

ಮೂವರಿಗೆ ಪ್ರಶಸ್ತಿ ಪ್ರದಾನ

ಕರಾವಳಿ ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಎಂ.ಎ. ಗಫೂರ್ ಅವರು ಕಾರಂತರ ಕುರಿತ ಮೊದಲ ಬುಲೆಟಿನ್​ ಕಿರು ಹೊತ್ತಿಗೆ ಬಿಡುಗಡೆಗೊಳಿಸಿ ಮಾತನಾಡಿದರು. ಖ್ಯಾತ ವಿಮರ್ಶಕ ಡಾ. ಎಸ್.ಆರ್​. ವಿಜಯಶಂಕರ್​ ವಿಶೇಷ ಉಪನ್ಯಾಸ ನೀಡಿದರು.

ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ದಿನಕರ ಹೇರೂರು, ಮಂಗಳೂರು ವಿವಿ ಅಧ್ಯಕ್ಷ ನಾಗಪ್ಪ ಗೌಡ, ಕಸಾಪ ಜಿಲ್ಲಾಧ್ಯಕ್ಷ ನೀಲಾವರ ಸುರೇಂದ್ರ ಅಡಿಗ, ಉಡುಪಿ ತಾಲೂಕು ಗ್ಯಾರಂಟಿ ಯೋಜನೆ ಅಧ್ಯಕ್ಷ ರಮೇಶ ಕಾಂಚನ್​, ಟ್ರಸ್ಟ್​ನ ಸದಸ್ಯ ಮಂಚಿ ರಮೇಶ ಉಪಸ್ಥಿತರಿದ್ದರು.

ಎಂಜಿಎಂ ಕಾಲೇಜಿನ ವಿದ್ಯಾರ್ಥಿನಿಯರು ನಾಡಗೀತೆ ಹಾಡಿದರು. ಶಿವರಾಮ ಕಾರಂತ ಟ್ರಸ್ಟ್​ನ ಸದಸ್ಯ ಕಾರ್ಯದರ್ಶಿ ಪೂರ್ಣಿಮಾ ಸ್ವಾಗತಿಸಿದರು. ಟ್ರಸ್ಟ್​ನ ಅಧ್ಯಕ್ಷ ಗಣನಾಥ ಶೆಟ್ಟಿ ಎಕ್ಕಾರು ಆಶಯ ನುಡಿಗಳನ್ನಾಡಿದರು. ಟ್ರಸ್ಟ್​ನ ಸದಸ್ಯ ಚೇತನ್​ ಶೆಟ್ಟಿ ಕೋವಾಡಿ ಕಾರ್ಯಕ್ರಮ ನಿರೂಪಿಸಿದರು.

ಕಾರಂತರ ಕುರಿತು ಆಯೋಜಿಸಿದ್ದ ರಾಜ್ಯ ಮಟ್ಟದ ವಿವಿಧ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಿಸಲಾಯಿತು. ಸಭಾ ಕಾರ್ಯಕ್ರಮದ ಬಳಿಕ ಅಮಿತ್​ ರೆಡ್ಡಿ ನಿರ್ದೇಶನದಲ್ಲಿ ಡಾ. ಶಿವರಾಮ ಕಾರಂತ ಕಾದಂಬರಿ ಆಧಾರಿತ ಮೈಮನಗಳ ಸುಳಿಯಲ್ಲಿ ನಾಟಕ ಪ್ರದರ್ಶನ ನಡೆಯಿತು.

ಹಸಿರಾಗೇ ಇರುವ ಕಾರಂತರ ಸಾಹಿತ್ಯ ಕೃಷಿ

ಕಾರಂತ ಪ್ರಶಸ್ತಿ ಸ್ವೀಕರಿಸಿದ ಡಾ. ಬಿ.ಎ. ವಿವೇಕ ರೈ ಮಾತನಾಡಿ, ನನ್ನ ತಂದೆಗೂ ನನಗೂ ಕಾರಂತರು ಮರೆಯಲಾಗದ ಬಾಂಧವ್ಯ. 79 ವರ್ಷದ ಹಿಂದೆ ನನಗೆ ವಿವೇಕ ಎಂದು ನಾಮಕರಣ ಮಾಡಿದ್ದು ಅವರೇ. ನನ್ನ ಜೀವನದ ಎಲ್ಲ ಮಹತ್ವದ ಘಟ್ಟಗಳ ತೀರ್ಮಾನ ಅವರಿಂದಲೇ ಆಗಿದೆ. ಅವರ ಹೆಸರಿನ ಪ್ರಥಮ ಪ್ರಶಸ್ತಿ ಸ್ವೀಕರಿಸಿರುವುದು ನನ್ನ ಪುಣ್ಯ. ಅವರ ಸಾಧನೆ ಅಗಾಧ. ಆನೆ ನಡೆದಿದ್ದೇ ದಾರಿ ಎಂಬಂತೆ ಎಂತಹುದೇ ಟೀಕೆ, ಅವಮಾನಗಳಿಗೂ ಬಗ್ಗದೆ ಅಂದು ಅವರು ಮಾಡಿರುವ ಸಾಹಿತ್ಯ ಕೃಷಿ ಈಗಲೂ, ಮುಂದೆಯೂ ಹಸಿರಾಗಿಯೇ ಇರಲಿದೆ ಎಂದರು.