ಪ್ರಶಸ್ತಿಗೆ ಆಯ್ಕೆಯಾದ ’ಸರ್ವೇ ನಂ.97’ ಕಥಾ ಸಂಕಲನದ ಲೇಖಕ ಅನೀಲ ಗುನ್ನಾಪುರ ಮೂಲತಃ ಇಂಡಿ ತಾಲೂಕಿನ ಹಿರೇಮಸಳಿ ಗ್ರಾಮದವರು. ಸದ್ಯ ಬಾಗಲಕೋಟೆಯಲ್ಲಿ ಸರ್ಕಾರಿ ಭೂಮಾಪಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. 2016 ರಲ್ಲಿ ಪುಸ್ತಕ ಪ್ರಾಧಿಕಾರದ ಧನ ಸಹಾಯದೊಡನೆ ಇವರ ಗುಬ್ಬಚ್ಚಿ ಗೂಡಿನಲ್ಲಿ ಕವನಸಂಕಲನ ಪ್ರಕಟಗೊಂಡಿದ್ದು, ಚೊಚ್ಚಲ ಕಥಾ ಸಂಕಲನ ‘ಕಲ್ಲುಹೂವಿನ ನೆರಳು’ ಸಹೃದಯರ ಗಮನಸೆಳೆದಿದ್ದಲ್ಲದೇ ಅನೇಕ ಪ್ರಶಸ್ತಿ- ಗೌರವಗಳಿಗೆ ಪಾತ್ರವಾಯಿತು. ಈ ಕಥಾಸಂಕಲನಕ್ಕೆ ರಾಜ್ಯಮಟ್ಟದ ಪ್ರಾರ್ಥನಾ ಸಾಹಿತ್ಯ ಪುರಸ್ಕಾರ ಮತ್ತು ಜನ್ನಾ ಸನದಿ ಸಾಹಿತ್ಯ ಪ್ರಶಸ್ತಿ ಮತ್ತು ಸಂಗಂ ಸಾಹಿತ್ಯ ಪುರಸ್ಕಾರ ಮತ್ತು ಸಮೀರವಾಡಿ ದತ್ತಿ ನಿಧಿ ಗೌರವ ಲಭಿಸಿದೆ. ಮಾತ್ರವಲ್ಲ, ಹುಚ್ಚಯ್ಯನ ಲೀಲೆ ಕತೆ ಗುಲ್ಬರ್ಗಾ ವಿಶ್ವವಿದ್ಯಾಲಯದ ಬಿಕಾಂ, ಬಿಬಿಎಂ, ದ್ವಿತೀಯ ಸೆಮಿಸ್ಟರ್ ವಿದ್ಯಾರ್ಥಿಗಳಿಗೆ ಪಠ್ಯವಾಗಿದೆ. ಲಿಂಗಾಯತ ಖಾನಾವಳಿ ಕತೆ ಕುವೆಂಪು ವಿಶ್ವವಿದ್ಯಾಲಯದ ಬಿಬಿಎ ಪ್ರಥಮ ಸೆಮಿಸ್ಟರ್ ವಿದ್ಯಾರ್ಥಿಗಳಿಗೆ ಪಠ್ಯವಾಗಿ ಆಯ್ಕೆಯಾಗಿದೆ.
