ದೆಹಲಿ ಪ್ರೀಮಿಯರ್ ಲೀಗ್ ಹರಾಜಿಗೆ ವಿರಾಟ್​ ಕೊಹ್ಲಿ ಪುತ್ರ ಆರ್ಯವೀರ್ ಕೊಹ್ಲಿ ಎಂಟ್ರಿ! Virat Kohli

Virat Kohli : ದೆಹಲಿ ಪ್ರೀಮಿಯರ್ ಲೀಗ್ ( DPL ) ಎರಡನೇ ಸೀಸನ್‌ಗೆ ಸಜ್ಜಾಗುತ್ತಿದೆ. ಡಿಪಿಎಲ್​-2025 ಹರಾಜು ಪ್ರಕ್ರಿಯೆ ಜುಲೈ 5 ರಂದು ನಡೆಯಲಿದ್ದು, ಟೀಮ್ ಇಂಡಿಯಾ ಸ್ಟಾರ್ ವಿರಾಟ್ ಕೊಹ್ಲಿ ಅವರ ಹಿರಿಯ ಸಹೋದರ ವಿಕಾಸ್ ಕೊಹ್ಲಿ ಅವರ ಪುತ್ರ ಆರ್ಯವೀರ್ ಕೊಹ್ಲಿ ಹೆಸರು ಕೂಡ ಬಿಡ್ಡರ್‌ಗಳ ಪಟ್ಟಿಯಲ್ಲಿದೆ. ಇದಲ್ಲದೆ, ಭಾರತದ ಮಾಜಿ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಪುತ್ರರಾದ ಆರ್ಯವೀರ್ ಮತ್ತು ವೇದಾಂತ್ ಕೂಡ ಡ್ರಾಫ್ಟ್‌ನಲ್ಲಿದ್ದಾರೆ.

ವಿರಾಟ್ ಅವರ ಅಣ್ಣನ ಮಗ ಮತ್ತು ಸೆಹ್ವಾಗ್ ಅವರ ಮಗನ ಹೆಸರು ಆರ್ಯವೀರ್ ಆಗಿರುವುದು ಗಮನಾರ್ಹ. ಈ ವಿಷಯ ತಿಳಿದ ನಂತರ ಸೆಹ್ವಾಗ್ ಮತ್ತು ವಿರಾಟ್ ಅಭಿಮಾನಿಗಳು ಸಂತೋಷ ವ್ಯಕ್ತಪಡಿಸುತ್ತಿದ್ದಾರೆ.

15 ವರ್ಷದ ಲೆಗ್ ಸ್ಪಿನ್ನರ್ ಆರ್ಯವೀರ್ ಕೊಹ್ಲಿ, ವಿರಾಟ್ ಕೊಹ್ಲಿ ಅವರ ಬಾಲ್ಯದ ತರಬೇತುದಾರ ರಾಜ್ ಕುಮಾರ್ ಶರ್ಮಾ ಅವರ ಮಾರ್ಗದರ್ಶನದಲ್ಲಿ ಪಶ್ಚಿಮ ದೆಹಲಿ ಕ್ರಿಕೆಟ್ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ. ಆರ್ಯವೀರ್ ಕಳೆದ ಋತುವಿನಲ್ಲಿ ದೆಹಲಿ ಅಂಡರ್ -16 ತಂಡದಲ್ಲಿ ನೋಂದಾಯಿತ ಆಟಗಾರನಾಗಿದ್ದರಿಂದ ಅವರನ್ನು ಸಿ ವರ್ಗಕ್ಕೆ ಸೇರಿಸಲಾಗಿದೆ.

ವೀರೇಂದ್ರ ಸೆಹ್ವಾಗ್ ಅವರ ಪುತ್ರರಾದ ಆರ್ಯವೀರ್ ಮತ್ತು ವೇದಾಂತ್ ಬಿ ವರ್ಗದಲ್ಲಿದ್ದಾರೆ. ಆರ್ಯವೀರ್ ದೆಹಲಿ ಅಂಡರ್ -19 ಅನ್ನು ಪ್ರತಿನಿಧಿಸಿದರು ಮತ್ತು ಮೇಘಾಲಯ ವಿರುದ್ಧ 297 ರನ್ ಗಳಿಸಿದರು. ವೇದಾಂತ್ ಆಫ್-ಸ್ಪಿನ್ನರ್ ಆಗಿದ್ದು, ದೆಹಲಿ ಅಂಡರ್ -16 ತಂಡಕ್ಕಾಗಿ ಆಡಿದ್ದಾರೆ.

ಇದನ್ನೂ ಓದಿ: ಸೀಸನ್ 12ಕ್ಕೆ ಕಿಚ್ಚನೇ ಬಿಗ್‌ಬಾಸ್ : ಮುಂದಿನ ನಾಲ್ಕು ಆವೃತ್ತಿಗಳನ್ನೂ ನಿರೂಪಿಸಲಿದ್ದಾರೆ ನಟ ಸುದೀಪ್

ಈಗಾಗಲೇ ತಮ್ಮ ಸಾಮರ್ಥ್ಯ ಪ್ರದರ್ಶಿಸಿರುವ ಪ್ರಿಯಾಂಶ್ ಆರ್ಯ ಮತ್ತು ದಿಗ್ವೇಶ್ ರಾಥಿ ಜುಲೈ 5 ರಂದು ದೆಹಲಿ ಪ್ರೀಮಿಯರ್ ಲೀಗ್‌ನಲ್ಲಿ ಹರಾಜಾಗಲಿದ್ದಾರೆ. ಕಳೆದ ವರ್ಷ ಸೌತ್ ದೆಹಲಿ ಸೂಪರ್‌ಸ್ಟಾರ್ಸ್ ಪರ ಆಡಿದ್ದ ಪ್ರಿಯಾಂಶ್ ಒಂದೇ ಓವರ್‌ನಲ್ಲಿ ಆರು ಸಿಕ್ಸರ್‌ಗಳನ್ನು ಬಾರಿಸುವ ಮೂಲಕ ಎಲ್ಲರ ಗಮನ ಸೆಳೆದರು. ಅಷ್ಟೇ ಅಲ್ಲ, ಹತ್ತು ಪಂದ್ಯಗಳಲ್ಲಿ ಒಟ್ಟು 608 ರನ್ ಗಳಿಸಿ ಲೀಗ್‌ನ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರಾದರು. ಹೀಗಾಗಿ, ಐಪಿಎಲ್‌ನಲ್ಲಿ ಪಂಜಾಬ್ ಕಿಂಗ್ಸ್ ತಂಡವನ್ನು 3.80 ಕೋಟಿ ರೂ.ಗೆ ಸೇರಿದ ಪ್ರಿಯಾಂಶ್, ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 42 ಎಸೆತಗಳಲ್ಲಿ 103 ರನ್ ಗಳಿಸುವ ಮೂಲಕ ಇತಿಹಾಸ ನಿರ್ಮಿಸಿದರು. ಮತ್ತೊಂದೆಡೆ, ದಕ್ಷಿಣ ದೆಹಲಿ ಪರ ಆಡಿದ್ದ ದಿಗ್ವೇಶ್ ಸಿಂಗ್ ರಾಥಿ ಕೂಡ ಡಿಪಿಎಲ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಐಪಿಎಲ್‌ಗೆ ಪ್ರವೇಶಿಸಿದರು. ಲಖನೌ ಸೂಪರ್ ಜೈಂಟ್ಸ್ ಅವರನ್ನು 30 ಲಕ್ಷ ರೂ.ಗೆ ಖರೀದಿಸಿತು. ರಾಥಿ ಅವರು ಈ ವರ್ಷ ಲಖನೌ ತಂಡಕ್ಕೆ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಆದರು. ಅವರು 13 ಇನ್ನಿಂಗ್ಸ್‌ಗಳಲ್ಲಿ ಹದಿನಾಲ್ಕು ವಿಕೆಟ್‌ಗಳನ್ನು ಕಬಳಿಸಿದರು.

ಅಂದಹಾಗೆ, ಡಿಪಿಎಲ್ 2024 ರಲ್ಲಿ ಪ್ರಾರಂಭವಾಯಿತು. ಉದ್ಘಾಟನಾ ಋತುವಿನಲ್ಲಿ ಪ್ರಿಯಾಂಶ್ ಆರ್ಯ, ದಿಗ್ವೇಶ್ ರಾಥಿ ಮತ್ತು ಪ್ರಿನ್ಸ್ ಯಾದವ್ ಅವರಂತಹ ಉನ್ನತ ಪ್ರತಿಭೆಗಳು ಹೊರಹೊಮ್ಮಿದರು. ಕಳೆದ ಋತುವಿಗೆ ಹೋಲಿಸಿದರೆ ಈ ಬಾರಿ 2 ಹೊಸ ತಂಡಗಳು ಬಂದಿವೆ. ಈ ಬಾರಿ ಒಟ್ಟು 8 ತಂಡಗಳು ಭಾಗವಹಿಸಲಿವೆ. ಈಸ್ಟ್ ಡೆಲ್ಲಿ ರೈಡರ್ಸ್, ನಾರ್ತ್ ಡೆಲ್ಲಿ ಸ್ಟ್ರೈಕರ್ಸ್, ವೆಸ್ಟ್ ಡೆಲ್ಲಿ ಲಯನ್ಸ್, ಸೌತ್ ಡೆಲ್ಲಿ ಸೂಪರ್‌ಸ್ಟಾರ್ಸ್, ಓಲ್ಡ್ ಡೆಲ್ಲಿ 6, ಸೆಂಟ್ರಲ್ ಡೆಲ್ಲಿ ಕಿಂಗ್ಸ್, ಔಟರ್ ಡೆಲ್ಲಿ ಮತ್ತು ನವದೆಹಲಿ ತಂಡಗಳು 2025ರ ಡಿಪಿಎಲ್‌ನಲ್ಲಿ ಭಾಗವಹಿಸಲಿವೆ. (ಏಜೆನ್ಸೀಸ್​)

https://www.vijayavani.net/optical-illusion-challenge-there-is-a-phone-in-this-photo-can-you-find-it

https://www.vijayavani.net/amid-shefali-jariwala-death-doctor-explains-risks-of-steroids-hormonal-therapies