ಯುಕ್ರೇನಿಯನ್​​​ ಅಧ್ಯಕ್ಷ ಝೆಲೆನ್ಸ್ಕಿಭೇಟಿಯಾಗಲಿರುವ ಟ್ರಂಪ್; ರಷ್ಯಾದೊಂದಿಗಿನ ಯುದ್ಧ ನಿಲ್ಲುತ್ತದೆಯೇ? |Volodymyr Zelensky

ವಾಷಿಂಗ್ಟನ್​ ಡಿಸಿ: ಯುಕ್ರೇನಿಯನ್​ ಅಧ್ಯಕ್ಷರನ್ನು ಸರ್ವಾಧಿಕಾರಿ ಎಂದು ಟೀಕಿಸಿದ ಒಂದು ವಾರದ ನಂತರ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಶ್ವೇತಭವನದಲ್ಲಿ ವೊಲೊಡಿಮಿರ್ ಝೆಲೆನ್ಸ್ಕಿ(Volodymyr Zelensky) ಅವರನ್ನು ಭೇಟಿ ಮಾಡುವ ನಿರೀಕ್ಷೆಯಿದೆ. ವೊಲೊಡಿಮಿರ್ ಝೆಲೆನ್ಸ್ಕಿ ಅವರು ಅಮೆರಿಕಕ್ಕೆ ಭೇಟಿ ನೀಡಿದ್ದಾರೆ. ಅವರ ವಿಮಾನವು ಜಂಟಿ ನೆಲೆ ಆಂಡ್ರ್ಯೂಸ್‌ನಲ್ಲಿ ಇಳಿದಿದೆ.

ಇದನ್ನು ಓದಿ: ರಷ್ಯಾ & ಯುಕ್ರೇನ್ ಸಮನ್ವಯಕ್ಕಾಗಿ ಟ್ರಂಪ್ ಸೌದಿ ಅರೇಬಿಯಾವನ್ನು ಆಯ್ಕೆ ಮಾಡಿದ್ದೇಕೆ; ಅಮೆರಿಕ ಅಧ್ಯಕ್ಷರ ಲೆಕ್ಕಾಚಾರವೇನು? | Donald Trump

ಈ ಭೇಟಿಯ ಸಮಯದಲ್ಲಿ ಟ್ರಂಪ್ ಝೆಲೆನ್ಸ್ಕಿ ಜತೆ ಟ್ರಿಲಿಯನ್ ಡಾಲರ್ ಒಪ್ಪಂದ ಮಾಡಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ಮೂಲಕ ಅಮೆರಿಕವು ಯುಕ್ರೇನ್​​ನ ಅಪರೂಪದ ಖನಿಜಗಳ ನಿಧಿಯನ್ನು ಸುಲಭವಾಗಿ ಪಡೆಯುತ್ತದೆ. ಆದರೆ ಯುಕ್ರೇನ್​ನಲ್ಲಿ ಅಪರೂಪದ ಭೂಮಿಯ ಖನಿಜಗಳು ಮತ್ತು ಇತರ ಖನಿಜ ಸಂಪತ್ತಿನ ಬಗ್ಗೆ ಕಡಿಮೆ ಪುರಾವೆಗಳಿವೆ. ಹಿಂದಿನ ಯುದ್ಧ-ಹಾನಿಗೊಳಗಾದ ಪ್ರದೇಶದಿಂದ ಏನಿದ್ದರೂ ಹೊರತೆಗೆಯುವುದು ಕಷ್ಟ, ಅಸಾಧ್ಯವೂ ಹೌದು ಎಂಬುದು ಅಮೆರಿಕದ ಪ್ರಸ್ತುತ ಮತ್ತು ಮಾಜಿ ಅಧಿಕಾರಿಗಳ ಅಭಿಪ್ರಾಯವಾಗಿದೆ.

ಡೊನಾಲ್ಡ್​ ಟ್ರಂಪ್ ಪ್ರಕಾರ, ಈ ಒಪ್ಪಂದವು ಅಮೆರಿಕದ ತೆರಿಗೆದಾರರಿಗೆ ತುಂಬಾ ಪ್ರಯೋಜನಕಾರಿಯಾಗಿದೆ. ಏಕೆಂದರೆ ಇದು ಯುಕ್ರೇನ್​ಗೆ ಸಹಾಯ ಮಾಡಲು ಖರ್ಚು ಮಾಡಿದ ಶತಕೋಟಿ ಡಾಲರ್‌ಗಳನ್ನು ಸರಿದೂಗಿಸುತ್ತದೆ. ಆದರೆ ಅಮೆರಿಕದ ಅಧಿಕಾರಿಗಳು ಮತ್ತು ತಜ್ಞರು ಈ ಒಪ್ಪಂದದ ಬಗ್ಗೆ ಸಂಶಯ ವ್ಯಕ್ತಪಡಿಸಿದ್ದಾರೆ.

ಯುಕ್ರೇನ್‌ನಲ್ಲಿ ಅಪರೂಪದ ಖನಿಜಗಳ ಉಪಸ್ಥಿತಿಯ ಬಗ್ಗೆ ಯಾವುದೇ ನಿರ್ದಿಷ್ಟ ಮಾಹಿತಿ ಇಲ್ಲದ ಕಾರಣ ಇದು ಅಷ್ಟು ಸುಲಭವಲ್ಲ ಎಂದು ತಜ್ಞರು ಹೇಳುತ್ತಾರೆ. ಈ ಅಂಕಿಅಂಶಗಳು ಹಳೆಯವು ಮತ್ತು ಸೋವಿಯತ್ ಯುಗದ ನಕ್ಷೆಗಳನ್ನು ಆಧರಿಸಿವೆ. ಜಾಗತಿಕ ಮಟ್ಟದಲ್ಲಿ ಯುಕ್ರೇನ್‌ನಲ್ಲಿ ಲಭ್ಯವಿರುವ ಖನಿಜಗಳ ಪ್ರಮಾಣವು ತುಂಬಾ ಕಡಿಮೆಯಾಗಿದೆ ಎಂದು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿರುವುದಾಗಿ ಸಿಎನ್‌ಎನ್ ವರದಿ ಮಾಡಿದೆ.

ಯುಕ್ರೇನಿಯನ್ ಖನಿಜಗಳನ್ನು ಅಮೆರಿಕದೊಂದಿಗೆ ವ್ಯವಹರಿಸುವ ಮುಖ್ಯ ಆಲೋಚನೆ ಯುಕ್ರೇನಿಯನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿಯವರದ್ದಾಗಿತ್ತು ಎಂಬುದು ಗಮನಾರ್ಹ. ಅವರು ಕಳೆದ ವರ್ಷ ಅಮೆರಿಕಕ್ಕೆ ಭೇಟಿ ನೀಡಿ ತಮ್ಮ ವಿಜಯ ಯೋಜನೆಯನ್ನು ಮಂಡಿಸಿದರು. ಯುಕ್ರೇನ್‌ನ ನೈಸರ್ಗಿಕ ಸಂಪನ್ಮೂಲಗಳನ್ನು ಬಳಸಿಕೊಳ್ಳಲು ಅಮೆರಿಕದ ಸಹಾಯವನ್ನು ಮುಂದುವರಿಸಬೇಕೆಂದು ಯೋಜನೆಯು ಕರೆ ನೀಡಿತು.

ಆದರೆ ಅಮೆರಿಕದ ಅಧಿಕಾರಿಗಳು ಯುಕ್ರೇನ್‌ನ ಈ ಪ್ರಸ್ತಾಪವನ್ನು ವಾಸ್ತವಿಕವೆಂದು ಪರಿಗಣಿಸಲಿಲ್ಲ. ಯಾವುದೇ ಅಮೆರಿಕನ್ ಕಂಪನಿಯು ಯುಕ್ರೇನ್‌ನಲ್ಲಿ ಗಣಿಗಾರಿಕೆ ವ್ಯವಹಾರವನ್ನು ಪ್ರವೇಶಿಸಲು ಉತ್ಸುಕವಾಗಿಲ್ಲ ಎಂದು ಅವರು ನಂಬುತ್ತಾರೆ. ಯುಕ್ರೇನ್‌ನ ಹೆಚ್ಚಿನ ಖನಿಜ ನಿಕ್ಷೇಪಗಳು ರಷ್ಯಾದ ನಿಯಂತ್ರಿತ ಪ್ರದೇಶಗಳಲ್ಲಿವೆ. ಅಲ್ಲಿ ತಲುಪುವುದು ಅಪಾಯಕಾರಿ ಮತ್ತು ತುಂಬಾ ದುಬಾರಿಯಾಗಿದೆ. ಅಂತಹ ಪರಿಸ್ಥಿತಿಯಲ್ಲಿ ಟ್ರಂಪ್ ಅವರ ಈ ಒಪ್ಪಂದವು ಪ್ರಯೋಜನಕಾರಿಯಾಗುತ್ತದೆಯೇ ಅಥವಾ ಇಲ್ಲವೇ ಎಂದು ತಜ್ಞರು ಅನುಮಾನಿಸುತ್ತಾರೆ.

ಫೆಬ್ರವರಿ 20ರಂದು ಟ್ರಂಪ್ ಝೆಲೆನ್ಸ್ಕಿ ವಿರುದ್ಧ ಅತಿದೊಡ್ಡ ವಾಗ್ದಾಳಿ ಮಾಡಿದ್ದರು. ಚುನಾವಣೆಗಳಿಲ್ಲದ ಸರ್ವಾಧಿಕಾರಿ, ಝೆಲೆನ್ಸ್ಕಿ ವೇಗವಾಗಿ ಚಲಿಸುವುದು ಉತ್ತಮ. ಇಲ್ಲದಿದ್ದರೆ ಅವನಿಗೆ ದೇಶ ಉಳಿಯುವುದಿಲ್ಲ ಎಂದು ಹೇಳಿದರು. ಶ್ವೇತಭವನದಲ್ಲಿ ವರದಿಗಾರರು ಈ ಹೇಳಿಕೆ ಕುರಿತು ಕೇಳಿದಾಗಿ ಟ್ರಂಪ್​ ಪ್ರತಿಕ್ರಿಯಿಸಿ ನಾನು ಹಾಗೆ ಹೇಳಿದ್ದೇನೆಯೇ? ನಾನು ಹಾಗೆ ಹೇಳಿದ್ದೇನೆಂದು ನಂಬಲು ಸಾಧ್ಯವಿಲ್ಲ ಎಂದಿದ್ದರು.(ಏಜೆನ್ಸೀಸ್​​)

https://www.vijayavani.net/donald-trump-says-saudi-arabias-one-move-would-end-russia-ukraine-war-immediately