ವಿವಿಧತೆಯಲ್ಲಿ ಏಕತೆ ಎಂಬ ಮಾತನ್ನು ಎಲ್ಲೆಡೆ ಬಳಸುತ್ತೇವೆ. ಸಾಂಸ್ಕೃತಿಕ ಬಹುಸಂಸ್ಕೃತಿಯನ್ನು ಭಾರತೀಯ ಭಾವ ಬಂಧುತ್ವದ ಏಕತೆಯಲ್ಲಿ ನಿರೂಪಿಸುವುದು ನಮ್ಮ ಗುರಿಯಾಗಬೇಕು. ಸಂಶೋಧನೆಯೊಂದರೆ ಪ್ರಕಾರ ಜಗತ್ತಿನಲ್ಲಿ 6703 ಭಾಷೆಗಳಿವೆ. 30 ಸಾವಿರ ಭಾಷೆ ನಶಿಸಿ ಹೋಗಿವೆ. 10 ಭಾಷೆಗಳನ್ನು ಜಗತ್ತಿನ ಅರ್ಧದಷ್ಟು ಜನ ಬಳಸುತ್ತಾರೆ. ಅಳಿವಿನಂಚಿನಲ್ಲಿರುವ, ಸೀಮಿತ ಜನ ಸಮುದಾಯ ಬಳಸುವ ಸಾವಿರಾರು ಭಾಷೆಗಳಿವೆ. ಅಂತಹ ಭಾಷೆಯ ರಕ್ಷಣೆಯಿಂದ ಆ ಸಮುದಾಯ, ಸಂಸ್ಕೃತಿ, ಜನಜೀವನವನ್ನು ರಕ್ಷಿಸಿದಂತಾಗುತ್ತದೆ. ಆದ್ದರಿಂದ ಸಾಂಸ್ಕೃತಿಕ ವೈವಿಧ್ಯತೆಗಳನ್ನು ಹುಡುಕಿ ಅದನ್ನು ದಾಖಲೀಕರಣ ಮಾಡುವುದರಿಂದ ಅಳಿವಿನಂಚಿನಲ್ಲಿರುವ, ಅಲಕ್ಷಿತ ಸಂಸ್ಕೃತಿಯ ಬಗ್ಗೆ ಜಗತ್ತಿಗೆ ಪರಿಚಯವಾಗುತ್ತದೆ. ಈ ನಿಟ್ಟಿನಲ್ಲಿ ಬಂಜಾರ ಸಂಸ್ಕೃತಿ ಮತ್ತು ಭಾಷಾ ಅಕಾಡೆಮಿ ಕೈಗೆತ್ತಿಕೊಂಡಿರುವ ಬಂಜಾರ ಸಂಸ್ಕೃತಿ ವಿಶ್ವಕೋಶ ರಚನೆ ಕಾರ್ಯ ಸ್ವಾಗತಾರ್ಹವಾಗಿದ್ದು, ಸರ್ಕಾರ ಈ ಕಾರ್ಯಕ್ಕೆ ಅಗತ್ಯ ಸಹಕಾರ ನೀಡಬೇಕು.
