ಪುರಾಣಗಳಲ್ಲಿ ಮೊಸಳೆ ಗಂಗೆಯ ವಾಹನ. ಆದ್ದರಿಂದ ಇದು ದೇವರಿಗೆ ಸಮಾನ ಎಂದು ಹೇಳಲಾಗುತ್ತದೆ. ಆದರೆ ಜನರು ಇದರ ಚರ್ಮಕ್ಕಾಗಿ ಬೇಟೆಯಾಡಿ ಕೊಲ್ಲುತ್ತಿದ್ದಾರೆ. ಆಗ ಇವರಿಗೆ ದೇವರು ಜ್ಞಾಪಕಕ್ಕೆ ಬರುವುದಿಲ್ಲ. ಹಳ್ಳಿಗೆ ಮೊಸಳೆ ಬಂದಿತ್ತು, ದೇವಸ್ಥಾನಕ್ಕೆ ಬಂದಿತ್ತು, ಹಳ್ಳಿಯ ಜನರು ಮೊಸಳೆಯನ್ನು ಹೊಡೆದು ಕೊಂದರು ಎನ್ನುವ ವಿಷಯಗಳು ಆಗಾಗ ವರದಿಯಾಗುತ್ತಲೇ ಇರುತ್ತವೆ. ಜನರಿಗೆ ಯಾವುದೇ ಒಂದು ಮಾಂಸಾಹಾರಿ ಅಥವಾ ವನ್ಯಪ್ರಾಣಿ ಕಂಡರೆ ಅದು ನಮ್ಮನ್ನು ತಿನ್ನುತ್ತದೆ ಎನ್ನುವ ಭಯ ಮೂಡುತ್ತದೆ. ಆದರೆ ಅದು ಸತ್ಯಕ್ಕೆ ದೂರ. ಕಾಡು ಪ್ರಾಣಿಗಳು ಹಳ್ಳಿಗೆ ಬರಲು ಹಲವು ಕಾರಣಗಳಿರುತ್ತವೆ. ಬದಲಾಗಿ ಅಂತಹ ಪ್ರಾಣಿಗಳ ಬಗ್ಗೆ ಜ್ಞಾನ ಇಲ್ಲದೇ ಇರುವ ಕಾರಣದಿಂದ ಕೊಲೆ ಮಾಡುತ್ತಾರೆ. ಕೆಲವು ಜಾತಿಯ ಮೊಸಳೆಗಳ ಸಂತತಿ ನಿರ್ವಂಶದ ಹಂತವನ್ನು ತಲುಪಿದೆ ಎನ್ನುವುದು ಕಳವಳಕಾರಿ ಸಂಗತಿಯೂ ಹೌದು.
