ಗ್ರಾಮಸ್ಥರು ಕಂಗಾಲು: ವಿದ್ಯಾರ್ಥಿ ಸ್ನೇಹಿ ಕಾಲುಸಂಕ ಯೋಜನೆ ಕೆಲವೆಡೆ ಮಂಜೂರಾದರೂ ಕಾಮಗಾರಿ ಆರಂಭವಾಗಿಲ್ಲ. ಇನ್ನು ಕೆಲವೆಡೆ ವರ್ಷದಿಂದ ಕಾಮಗಾರಿ ನಡೆಯುತ್ತಿದ್ದರೂ ಕುಂಟುತ್ತ ಸಾಗಿದೆ. ಹೀಗಾಗಿ ಮಳೆಗಾಲದ ಆರಂಭದ ಹೊತ್ತಿನಲ್ಲಿ ಪ್ರತಿ ವರ್ಷದಂತೆ ಈ ಬಾರಿಯೂ ಜಿಲ್ಲೆಯ ಬೀರನಮನೆಗದ್ದೆ, ಕೆಳಾಸೆ, ಜನ್ನಕಡ್ಕಲ್, ಮೆಣಸೆಗದ್ದೆ, ಶ್ಯಾಮನೆಗದ್ದೆ, ಅಣಶಿ, ನಾರಗಾಳಿ ಸೇರಿ 50ಕ್ಕೂ ಹೆಚ್ಚು ಕಡೆ ಗ್ರಾಮಸ್ಥರೇ ಅಡಕೆ ಮರದ ದಬ್ಬೆ, ಕಾಡು ಮರ, ಕಾಡು ಬಳ್ಳಿಗಳನ್ನು ಸಂಗ್ರಹಿಸಿ ಸಂಕಗಳ ನಿರ್ಮಾಣ ಕಾರ್ಯ ಆರಂಭಿಸಿದ್ದಾರೆ. ಕೆಲವು ಕಡೆ ಈ ಹಿಂದಿನ ವರ್ಷ ಕಟ್ಟಿದ ಸಂಕವನ್ನೇ ಬಳಸಿದರೆ ಇನ್ನು ಕೆಲವೆಡೆ ಸ್ವತಃ ಕಾಲುಸಂಕ ನಿರ್ವಿುಸಿಕೊಳ್ಳಲು ಆಗದೆ, ಸರ್ಕಾರದಿಂದ ಸಂಪರ್ಕ ಸೇತುವೂ ಅನುಷ್ಠಾನಗೊಳ್ಳದೆ ಗ್ರಾಮಸ್ಥರು ಕಂಗಾಲಾಗಿದ್ದಾರೆ.
