ಹೊರಗೆ ಥಳಕು ಒಳಗೆ ಹುಳುಕು

ಗೋಕರ್ಣ: ಐತಿಹಾಸಿಕ ತಾಣ ಗೋಕರ್ಣ ಸ್ವಚ್ಛತೆ ವಿಷಯದಲ್ಲಿ ಹೊರಗೆ ಥಳಕು, ಒಳಗೆ ಹುಳುಕು ಎಂಬಂತಾಗಿದೆ. ಊರ ಪ್ರವೇಶ ದ್ವಾರದಿಂದ ರಥಬೀದಿ, ಸಮುದ್ರ ತೀರದವರೆಗೆ ನಿಯಮಿತವಾಗಿ ಶುಚಿ ಮಾಡಲಾಗುತ್ತದೆ. ಆದರೆ, ಬಹುತೇಕ ವಾರ್ಡ್​ಗಳಲ್ಲಿ ತಿಂಗಳಿಗೆ ಒಮ್ಮೆಯೂ ಸ್ವಚ್ಛತೆ ಕಾರ್ಯ ಮಾಡುತ್ತಿಲ್ಲ. ಹಾಗೆಂದು, ಸ್ಥಳೀಯ ಆಡಳಿತ ನಿರ್ಲಕ್ಷಿಸಿದೆ ಎಂದಲ್ಲ; ಸ್ವಚ್ಛತಾ ಸಿಬ್ಬಂದಿ ಇರುವುದು ಕಡಿಮೆ. ಎಲ್ಲ ವಾರ್ಡ್​ಗಳನ್ನು ನಿಯಮಿತವಾಗಿ ಸ್ವಚ್ಛಗೊಳಿಸಲು ಪಂಚಾಯಿತಿ ಹೆಣಗಾಡುವಂತಾಗಿದೆ.

ಗ್ರಾಪಂ ವ್ಯಾಪ್ತಿ ಒಂದು ನಗರಸಭೆಯ ವ್ಯಾಪ್ತಿಯನ್ನೂ ಮೀರಿದೆ. ಲಕ್ಷಾಂತರ ಪ್ರವಾಸಿಗರು ಭೇಟಿ ನೀಡುವ ಐದು ಬೀಚ್​ಗಳು ಸೇರಿ 8.2 ಕಿಮೀ ಸುತ್ತಳತೆಯ 10 ವಾರ್ಡ್​ಗಳಲ್ಲಿ ಇದು ಕಾರ್ಯನಿರ್ವಹಿಸಬೇಕಾಗಿದೆ. ನಿತ್ಯ ಸ್ವಚ್ಛತೆಗೆ ಪ್ರತಿ ವಾರ್ಡ್​ಗೆ ಕನಿಷ್ಠ 3 ಸ್ವಚ್ಛತಾ ಸಿಬ್ಬಂದಿಯಂತೆ 30 ಕಾರ್ವಿುಕರ ಅಗತ್ಯವಿದೆ. ಆದರೆ, ಇಲ್ಲಿರುವವರು 10 ಸಿಬ್ಬಂದಿ ಮಾತ್ರ. ಆ ಪೈಕಿ ನಾಲ್ವರು ಮಹಿಳಾ ಸಿಬ್ಬಂದಿಯಿದ್ದು, ಇವರಷ್ಟೇ ಕಸ ಗೂಡಿಸಲು ಲಭ್ಯ. ಒಬ್ಬ ವಾಹನ ಚಾಲಕ. ಇಬ್ಬರು ಕೈಗಾಡಿ ಮೂಲಕ ಕಸ ಸಂಗ್ರಹಿಸಿದರೆ ಉಳಿದ ಮೂವರು ವಾಹನದಲ್ಲಿರುತ್ತಾರೆ. ಇಷ್ಟು ಜನ ನಿತ್ಯ ಬೆಳಗ್ಗೆ 7ರಿಂದ ಸಂಜೆ 7 ರವರೆಗೆ ಪಟ್ಟಣದಲ್ಲಿ ಸ್ವಚ್ಛತೆ ಕಾರ್ಯ ನಡೆಸುತ್ತಾರೆ.

ಎಲ್ಲ ಮುಖ್ಯ ಬೀಚ್​ಗಳ ಸ್ವಚ್ಛತೆಯನ್ನು ಅಲ್ಲಿರುವ ಅಂಗಡಿಕಾರರ ಮತ್ತು ಹೋಟೆಲ್ ಮಾಲೀಕರ ಯೂನಿಯನ್ ಉತ್ತಮವಾಗಿ ನೋಡಿಕೊಳ್ಳುತ್ತಿದೆ. ಇತ್ತೀಚಿನ ವರ್ಷಗಳಲ್ಲಿ ಗೋಕರ್ಣದ ಸಮುದ್ರ ಸನಿಹ ಒಳಭಾಗದ ದಂಡೆಭಾಗ, ಬೇಲೆಹಿತ್ತಲು, ರುದ್ರಪಾದ, ಬಿಜ್ಜೂರು, ತಾರಮಕ್ಕಿ ಕಡೆಗಳಲ್ಲಿ ವಿದೇಶಿ ಮತ್ತು ಸ್ಥಳೀಯ ಪ್ರವಾಸಿಗರು ವಾಸಿಸುತ್ತಿದ್ದಾರೆ. ಇದರಿಂದ ಸಹಜವಾಗಿ ಈ ಪ್ರದೇಶಗಳಲ್ಲಿ ತ್ಯಾಜ್ಯ ಮತ್ತು ಕಸದ ಪ್ರಮಾಣ ಹೆಚ್ಚಾಗಿದೆ. ಸ್ವಚ್ಛತಾ ಕಾರ್ವಿುಕರು ಆಗೊಮ್ಮೆ- ಈಗೊಮ್ಮೆ ಇಲ್ಲಿ ಸ್ವಚ್ಛತೆ ಮಾಡುವುದರಿಂದ ಕಸ ಹೆಚ್ಚಾಗಿ ಕಂಡು ಬರುತ್ತಿದೆ.

ಹಣ ಇಲ್ಲದೆ ಹೊಣೆ ಇಲ್ಲ?
ನಿಯಮದ ಪ್ರಕಾರ ಒಂದು ಗ್ರಾಪಂ ತನ್ನ ಒಟ್ಟು ಆದಾಯದ ಶೇ. 40ರಷ್ಟನ್ನು ಮಾತ್ರ ಆಡಳಿತ ಮತ್ತು ಸಿಬ್ಬಂದಿ ವೆಚ್ಚಕ್ಕೆ ವ್ಯಯಿಸಬಹುದು. ಇದರ ಪ್ರಕಾರ ಪಂಚಾಯಿತಿಗೆ 16 ಲಕ್ಷ ರೂ. ಮಿತಿಯಿದೆ. ಈಗಾಗಲೆ ಗ್ರಾಪಂ ಈ ಮಿತಿಯನ್ನು ಮೀರಿದೆ. ಇಲ್ಲಿ ಸದ್ಯ 10 ಜನ ಸ್ವಚ್ಛತಾ ಕಾರ್ವಿುಕರು ಮತ್ತು ಮೂವರು ಹಂಗಾಮಿ ನೌಕರರಿದ್ದು, ಅವರಿಗಾಗಿ 16 ಲಕ್ಷ ರೂ.ಗಳಿಗೂ ಹೆಚ್ಚು ವೆಚ್ಚ ತಗಲುತ್ತಿದೆ.

ಏರದ ಆದಾಯ: ಪಂಚಾಯಿತಿಯ ಕರ ಆಕರಣೆಯನ್ನು 52 ಲಕ್ಷ ರೂ.ಗೆ ನಿಗದಿ ಪಡಿಸಲಾಗಿದೆ. ಆದರೆ, ಪ್ರತಿವರ್ಷ 40 ಲಕ್ಷ ರೂ. ವಸೂಲಾಗುತ್ತಿದೆ. ಒಂದು ಅಂದಾಜಿನ ಪ್ರಕಾರ ಈ ಗ್ರಾಪಂ ಕೋಟ್ಯಂತರ ರೂ. ಆದಾಯ ಗಳಿಸುವ ಅವಕಾಶವಿದೆ. ಸಿಆರ್​ರೆಡ್, ಬಿನ್​ಶೇತ್ಕಿ ನಿಯಮದಂಥ ಕಾನೂನಿನ ತೊಡಕಿನಿಂದಾಗಿ ಇಲ್ಲಿರುವ ಶೇ. 90 ಹೋಟೆಲ್, ವಸತಿ ಗೃಹ, ರೆಸ್ಟೋರೆಂಟ್, ಬೀಚ್​ಗಳಲ್ಲಿನ ಅಂಗಡಿ ಮತ್ತು ಹೋಮ್ ಸ್ಟೇಗಳಿಗೆ ಅನುಮತಿಯನ್ನು ಗ್ರಾಪಂ ಒದಗಿಸುತ್ತಿಲ್ಲ. ಹೀಗಾಗಿ ಇವುಗಳಿಂದ ಬರಬಹುದಾದ ಕೋಟ್ಯಂತರ ರೂ. ಆದಾಯಕ್ಕೆ ಕತ್ತರಿ ಬಿದ್ದಿದೆ.

ಅನುಮತಿಗೆ ತಕರಾರು: ಈ ನಡುವೆ ಬೀಚ್ ಅಂಗಡಿಗಳಿಗೆ ಹಂಗಾಮಿ ಪರವಾನಗಿ ನೀಡಲಾಗುತ್ತಿತ್ತು. ಇದರಿಂದ ಪ್ರತಿ ವರ್ಷ 12 ರಿಂದ 15 ಲಕ್ಷ ರೂ. ಕರ ಸಂದಾಯವಾಗುತ್ತಿತ್ತು. ಆದರೆ, ಇದಕ್ಕೆ ಕರಾವಳಿ ವಲಯ ನಿಯಂತ್ರಣ ಇಲಾಖೆ ತಕರಾರು ಮಾಡಿದೆ. ಹೀಗಾಗಿ 3 ವರ್ಷದಿಂದ ತಾತ್ಕಾಲಿಕವಾಗಿ ನೀಡುವ ಅನುಮತಿಯಿಂದ ಬರುವ ಹಣ ಕೈತಪ್ಪಿದೆ.