ಹೆಚ್ಚಿದ ಗಂಧದ ಮರಗಳ್ಳರ ಹಾವಳಿ

ರಟ್ಟಿಹಳ್ಳಿ: ಪಟ್ಟಣ ಸೇರಿ ಸುತ್ತಲಿನ ಗ್ರಾಮಗಳ ಗುಡ್ಡಗಾಡು, ಮನೆ ಅಕ್ಕಪಕ್ಕ, ಸರ್ಕಾರಿ ಕಚೇರಿ, ಜಮೀನು, ರಸ್ತೆ ಬದಿಗಳಲ್ಲಿ ಸ್ವಾಭಾವಿಕವಾಗಿ ಮತ್ತು ರೈತರು ಬೆಳೆಸಿದ ಗಂಧದ ಮರಗಳು ಕಳ್ಳರ ಪಾಲಾಗುತ್ತಿವೆ.

ಇತ್ತೀಚಿನ ದಿನಗಳಲ್ಲಿ ಗಂಧದ ಮರ ಕಳವು ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಪೊಲೀಸ್ ಮತ್ತು ಅರಣ್ಯ ಇಲಾಖೆ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ನಾಗರಿಕರು ಒತ್ತಾಯಿಸುತ್ತಿದ್ದಾರೆ.

ಸ್ಥಳೀಯ ಈಶ್ವರ ದೇವಸ್ಥಾನದ ಬಳಿ ಗ್ರಾಪಂ ಮಾಜಿ ಸದಸ್ಯ ಎಸ್.ಬಿ. ಪಾಟೀಲ ಅವರ ನಿವಾಸದಲ್ಲಿನ ಗಂಧದ ಎರಡು ಮರಗಳನ್ನು ಬುಧವಾರ ಕಡಿದು ಸಾಗಿಸಲಾಗಿದೆ. ಗ್ರಾಪಂ ಸದಸ್ಯ ಶಂಕ್ರರಗೌಡ ಚೆನ್ನಗೌಡ್ರ, ಶಿಕ್ಷಕ ದಯಾನಂದ ಮಡಿವಾಳರ, ಕಡೂರ ಗ್ರಾಮದ ಶಂಕರಗೌಡ ಶಿರಗಂಬಿಯವರ ಜಮೀನಿನಲ್ಲಿ ಹಾಗೂ ಹೆಸ್ಕಾಂ ಇಲಾಖೆ ಕಚೇರಿ ಆವರಣದಲ್ಲಿನ ಗಂಧದ ಮರಗಳನ್ನು ಇತ್ತೀಚೆಗೆ ಕಳ್ಳರು ಕಡಿದು ಸಾಗಿಸಿದ್ದಾರೆ. ಹಗಲಲ್ಲಿ ಗಿಡಗಳನ್ನು ಗುರುತಿಸುವ ಕಳ್ಳರು, ರಾತ್ರಿ ವೇಳೆ ಕತ್ತರಿಸಿಕೊಂಡು ಹೋಗುತ್ತಿದ್ದಾರೆ.