ಇದೀಗ ಸ್ಥಳೀಯ ರೈತರಿಗೆ ಅನುಕೂಲ ಮಾಡಿಕೊಡುವ ಸಲುವಾಗಿ ಮೆಣಸಿನಕಾಯಿ ವ್ಯಾಪಾರ ಮತ್ತೆ ಆರಂಭಿಸಲು ವರ್ತಕರೂ ಒತ್ತಾಯ ಮಾಡಿದ್ದರು. ಅಷ್ಟು ಇಷ್ಟು ಬೆಳೆದ ಮೆಣಸಿನಕಾಯಿ ಮಾರಾಟ ಮಾಡಲು ಇಂಥ ಸಂದಿಗ್ದ ಪರಿಸ್ಥಿತಿಯಲ್ಲಿ ರೈತರಿಗೆ ಅವಕಾಶ ಕೊಡಬೇಕೆಂಬ ಒತ್ತಾಯ ಕೃಷಿಕರಿಂದಲೂ ಕೇಳಿ ಬಂದಿತ್ತು. ಇದೀಗ ಎಪಿಎಂಸಿ ಅಧಿಕಾರಿಗಳು ಮೆಣಸಿನಕಾಯಿ ವಹಿವಾಟು ಪುನರಾರಂಭಕ್ಕೆ ಕ್ರಮ ಕೈಗೊಂಡಿದ್ದಾರೆ. ಕಾಳು- ಕಡಿ, ಉಳ್ಳಾಗಡ್ಡಿ- ಆಲೂಗಡ್ಡೆ ವ್ಯಾಪಾರ ಎಂದಿನಂತೆ ನಡೆದಿದೆ. ಮೆಣಸಿನಕಾಯಿ ವ್ಯಾಪಾರವೂ ಆರಂಭವಾದರೆ ಸೋಮವಾರದಿಂದ ಮತ್ತೆ ಎಪಿಎಂಸಿಯಲ್ಲಿ ಇನ್ನಷ್ಟು ಜನಸಂದಣಿ ಉಂಟಾಗಲಿದೆ. ಜಿಲ್ಲಾಡಳಿತದ ಸೂಚನೆ ಮೇರೆಗೆ ಸ್ಥಗಿತಗೊಂಡಿದ್ದ ಒಣಮೆಣಸಿನಕಾಯಿ ವ್ಯಾಪಾರಕ್ಕೆ ಚಾಲನೆ ನೀಡಲಾಗಿದೆ. ಆನ್ಲೈನ್ ಟೆಂಡರ್ ನಡೆಯುವುದರಿಂದ ಸೋಮವಾರದಿಂದ ಹೆಚ್ಚಿನ ವ್ಯಾಪಾರಸ್ಥರು ಇದರಲ್ಲಿ ಭಾಗಿಯಾಗುವ ನಿರೀಕ್ಷೆ ಇದ್ದು, ರೈತರಿಗೆ ಅನುಕೂಲವಾಗಲಿದೆ ಎಂದು ಎಪಿಎಂಸಿ ಕಾರ್ಯದರ್ಶಿ ರಾಜಣ್ಣ ತಿಳಿಸಿದ್ದಾರೆ.
