ಈ ರಸ್ತೆ ಹಲವು ವರ್ಷಗಳಿಂದಲೂ ಸಂಪೂರ್ಣ ಹದಗೆಟ್ಟಿದೆ. ವಾಹನ ಸವಾರರು ಸಂಚರಿಸಲು ಪರದಾಡುತ್ತಿದ್ದಾರೆ. ಹಾಗಾಗಿ ರಸ್ತೆ ಅಭಿವೃದ್ಧಿ ಪಡಿಸುವಂತೆ ಸಾರ್ವಜನಿಕರು ಒತ್ತಾಯಿಸಿದ್ದಾರೆ. ರಾಮಾಪುರ ಗ್ರಾಮ ಹೋಬಳಿ ಕೇಂದ್ರ ಸ್ಥಾನವಾಗಿದೆ. ಮೀಣ್ಯಂ ಗ್ರಾಮಕ್ಕೆ 27 ಕಿ.ಮೀ. ಅಂತರದಲ್ಲಿದೆ. ಅರಣ್ಯ ಪ್ರದೇಶದ ಮೂಲಕ ಈ ಮಾರ್ಗ ಹಾದು ಹೋಗಿದೆ. ಕೂತಗುಳಿ, ಸಾಹೇಬರದೊಡ್ಡಿ, ಗೊಲ್ಲರದಿಂಬ, ದಿನ್ನಳ್ಳಿ, ಸತ್ಯಮಂಗಲ, ಗಾಜನೂರು, ಕೊಪ್ಪ ಸೇರಿ ವಿವಿಧ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ಮುಖ್ಯ ರಸ್ತೆಯಾಗಿದೆ. ಜತೆಗೆ ಹೂಗ್ಯಂ ಭಾಗದ ಜನರೂ ಈ ಮಾರ್ಗದಲ್ಲೇ ತೆರಳಬೇಕಿದೆ. ರಾಮಾಪುರಕ್ಕೆ ಹೋಗುವ ಶಾಲೆ-ಕಾಲೇಜಿನ ವಿದ್ಯಾರ್ಥಿಗಳು, ಕೆಲಸ ಕಾರ್ಯಗಳಿಗೆ ತೆರಳುವ ಜನರು ಇದೇ ರಸ್ತೆಯನ್ನು ಅವಲಂಬಿಸಿದ್ದಾರೆ. 27 ಕಿ.ಮೀ. ಇರುವ ಈ ಮಣ್ಣಿನ ರಸ್ತೆ ಹಲವು ವರ್ಷಗಳಿಂದ ಇದೇ ದುಸ್ಥಿತಿಯಲ್ಲಿದೆ. ಹದಗೆಟ್ಟ ರಸ್ತೆಯಲ್ಲಿ ಹಲವು ಅಪಘಾತಗಳು ಸಂಭವಿಸಿ ಸಾವು, ನೋವುಗಳಾಗಿದೆ. ಜತೆಗೆ ಜಲ್ಲಿಕಲ್ಲುಗಳು ಹಾಗೂ ಗುಂಡಿಗಳಿಗೆ ಬೈಕ್ ಸವಾರರು ಆಯತಪ್ಪಿ ಬಿದ್ದು ಗಾಯಗೊಂಡಿರುವ ಘಟನೆಯೂ ನಡೆದಿದೆ. ಇದು ರಾಮಾಪುರಕ್ಕೆ ತೆರಳುವ ದಾರಿಯೋ ಅಥವಾ ಯಮಪುರಿಗೆ ಸಾಗುವ ಮಾರ್ಗವೋ ಎಂಬುದು ಈ ಭಾಗದ ಜನರ ಪ್ರಶ್ನೆಯಾಗಿದೆ.
