ಹಣ ಪಡೆದು ಕೈದಿಗಳಿಗೆ ಊಟಕ್ಕೆ ಮೀನು ಪೂರೈಕೆ

ಬೆಳಗಾವಿ: ಇಲ್ಲಿನ ಹಿಂಡಲಗಾ ಕಾರಾಗೃಹದಲ್ಲಿ ಸಿಬ್ಬಂದಿಗಳೇ ಕೈದಿಗಳಿಂದ ಹಣ ಪಡೆದು ಊಟಕ್ಕೆ ಮೀನು ಪೂರೈಕೆ ಮಾಡಿರುವ ವಿಡಿಯೋ ಸೋಮವಾರ ವೈರಲ್ ಆಗಿದೆ. ಕಾರಾಗೃಹ ಸಿಬ್ಬಂದಿ ಕೈದಿಗಳ ಸಹಚರರಿಂದ ಹಣ ಪಡೆಯುತ್ತಿರುವ ದೃಶ್ಯಗಳು ವಿಡಿಯೋದಲ್ಲಿ ಸೆರೆಯಾಗಿವೆ.

ಈ ಹಣದಿಂದ ಕೈದಿಗಳಿಗೆ ಮೀನು ಪೂರೈಕೆ ಮಾಡಿರುವ ಶಂಕೆ ವ್ಯಕ್ತವಾಗಿದೆ. ಕಾರಾಗೃಹದಲ್ಲಿನ ಕೈದಿಗಳಿಗೆ ಕರಾವಳಿ ಭಾಗದಲ್ಲಿ ಮಾತ್ರ ಊಟಕ್ಕೆ ಮೀನು ನೀಡಲಾಗುತ್ತದೆ. ಆದರೆ, ಹಿಂಡಲಗಾ ಕಾರಾಗೃಹದಲ್ಲಿ ಮೀನು ನೀಡುವುದಿಲ್ಲ. ಇಲ್ಲಿನ ಕೈದಿಗಳು ಸಿಬ್ಬಂದಿಗಳಿಗೆ ಹಣ ನೀಡಿ ಊಟಕ್ಕೆ ಮೀನು ತರಿಸಿಕೊಂಡಿದ್ದು ಚರ್ಚೆಗೆ ಗ್ರಾಸವಾಗಿದೆ.