ಗ್ರಾಮದ ಕೂಗಳತೆಯಲ್ಲಿರುವ ಸರ್ವೆ ನಂ. 2ರ ಸ್ಮಶಾನದ ಅಂಚಿನಲ್ಲಿ ಹಾದು ಹೋಗಿರುವ ಹಳ್ಳದ ಒಡಲಿನಲ್ಲಿರುವ ಮರಳು ಮತ್ತು ಮಣ್ಣನ್ನು ಪ್ರಭಾವಿಗಳು ಹಾಗೂ ಪಟ್ಟಭದ್ರ ಹಿತಾಸಕ್ತಿಗಳು ಹಾಡಹಗಲೇ ಜೆಸಿಬಿ ಮೂಲಕ ಎತ್ತಿ ಮಾರಾಟ ಮಾಡುತ್ತಿದ್ದಾರೆ. ಸುಮಾರು 200 ಮೀಟರ್ ಉದ್ದ ಮತ್ತು 10-15 ಅಡಿ ಆಳದಲ್ಲಿ ಜೆಸಿಬಿ ಮೂಲಕ ಮಣ್ಣು ಮತ್ತು ಮರಳನ್ನು ತೆಗೆದು ಸಾವಿರಾರು ಟ್ರ್ಯಾಕ್ಟರ್ಗಳಲ್ಲಿ ಮಾರಾಟ ಮಾಡಿದ್ದಾರೆ. ಈ ಹಳ್ಳದ ಪಕ್ಕದಲ್ಲಿ ಕುಡಿಯುವ ನೀರಿನ ಕೆರೆ ಇದೆ. ಹಳ್ಳದಲ್ಲಿ ಆಳವಾದ ತಗ್ಗು ತೋಡಿರುವುದರಿಂದ ಈ ಕೆರೆಯ ನೀರು ಅರ್ಧದಷ್ಟು ಖಾಲಿಯಾಗಿದೆ. ಗ್ರಾಮದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಎದುರಾಗಿದೆ ಎಂಬುದು ಗ್ರಾಮಸ್ಥರ ಅಳಲು. ಇಲ್ಲಿಗೆ ಮೇಯಲು, ನೀರು ಕುಡಿಯಲು ಬರುವ ದನಕರುಗಳು, ಈ ಮಾರ್ಗವಾಗಿ ಸಂಚರಿಸುವ ರೈತರು, ಶವ ಸಂಸ್ಕಾರಕ್ಕೆ ಬರುವ ಜನರ ಪ್ರಾಣಕ್ಕೆ ಈ ಆಳವಾದ ಕಂದಕಗಳು ಕುತ್ತು ತರುವಂತಿವೆ. ಮಳೆಗಾಲದಲ್ಲಿ ಕಂದಕದ ಸುತ್ತಲಿನ ಕಪ್ಪು ಮಣ್ಣು ಸಡಿಲಗೊಂಡರೆ ಕೆರೆಗೆ ಆಪತ್ತು ಬರುವ ಸಾಧ್ಯತೆಯೂ ಇದೆ.
