ಸಿದ್ದಯ್ಯನಪುರದಲ್ಲಿ ಕಂಡಾಯಗಳ ಉತ್ಸವ

ಕೊಳ್ಳೇಗಾಲ: ಆಷಾಢ ಮಾಸದ ಎರಡನೇ ಶುಕ್ರವಾರದ ಹಿನ್ನೆಲೆಯಲ್ಲಿ ತಾಲೂಕಿನ ಸಿದ್ದಯ್ಯನಪುರ ಗ್ರಾಮದಲ್ಲಿ ಶುಕ್ರವಾರ ಶ್ರೀ ಸಿದ್ದಪ್ಪಾಜಿ ಕಂಡಾಯಗಳ ಉತ್ಸವ ಶ್ರದ್ಧಾ-ಭಕ್ತಿಯಿಂದ ಜರುಗಿತು.

ಗ್ರಾಮದ ಶ್ರೀ ಬ್ರಹ್ಮೇಶ್ವರ ದೇವಾಲಯದಲ್ಲಿ ಶ್ರೀ ಕ್ಷೇತ್ರ ಕುರುಬನಕಟ್ಟೆ ಕಂಡಾಯಗಳಿಗೆ ಹೂ-ಹೊಂಬಾಳೆ ಧರಿಸಿ ಪೂಜೆ ಸಲ್ಲಿಸಿದ ಬಳಿಕ ಮಂಗಳವಾದ್ಯದೊಂದಿಗೆ ಗ್ರಾಮದಲ್ಲಿ ಮೆರವಣಿಗೆ ಮಾಡಲಾಯಿತು. ಗ್ರಾಮದ ಯುವಕರು ಮೆರವಣಿಗೆಯಲ್ಲಿ ಮಂಗಳವಾದ್ಯ ಶಬ್ದಕ್ಕೆ ಕುಣಿದು ಕುಪ್ಪಳಿಸಿದರು.
ಮೆರವಣಿಗೆ ಮೂಲಕ ಕಂಡಾಯ ಪ್ರತಿ ಮನೆಯ ಮುಂಭಾಗ ಬರುವಾಗ ಮಹಿಳೆಯರು ಹಣ್ಣು-ಕಾಯಿ ಪೂಜೆ ಸಲ್ಲಿಸಿದರು. ಕಂಡಾಯ ಉತ್ಸವದ ಹಿನ್ನೆಲೆಯಲ್ಲಿ ಗ್ರಾಮವು ದೀಪಾಲಂಕಾರದಿಂದ ಕಂಗೊಳಿಸಿತು.

ಗ್ರಾ.ಪಂ. ಅಧ್ಯಕ್ಷ ಗುಣಶೇಖರ್, ಸದಸ್ಯರಾದ ಮುರುಳೀಧರ್, ಜಯಮ್ಮ, ಶಶಿಕುಮಾರಿ, ಗ್ರಾಮದ ಯಜಮಾನರಾದ ಚಾಮರಾಜು, ಲಕ್ಷ್ಮಣಮೂರ್ತಿ, ಕಾಂತರಾಜು, ಲಿಂಗರಾಜು, ಮಹದೇವ, ಮಾದಯ್ಯ, ಸಿ.ಎಂ.ಮಹದೇವ, ಮಹೇಂದ್ರ, ನಂಜುಂಡಸ್ವಾಮಿ ಇತರರು ಇದ್ದರು.