ಸಾವಿರಾರು ನುಗ್ಗೆ ಗಿಡಗಳ ಮಾರಣಹೋಮ

ರೋಣ: ತಾಲೂಕಿನಲ್ಲಿ ಕರೊನಾ ವೈರಸ್ ಆತಂಕ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಅದು ತೋಟಗಾರಿಕೆ ಕೃಷಿಯನ್ನೂ ಬಿಟ್ಟಿಲ್ಲ. ತೋಟಗಾರಿಕೆ ಬೆಳೆಯನ್ನೇ ನಂಬಿಕೊಂಡು ಹೊಟ್ಟೆ ತುಂಬಿಸಿಕೊಳ್ಳುತ್ತಿದ್ದ ರೈತರಿಗೆ ಕರೊನಾ ವೈರಸ್ ಕಂಟಕವಾಗಿ ಪರಿಣಮಿಸಿದೆ. ಇದರಿಂದಾಗಿ ತಾಲೂಕಿನ ಹೊಸಳ್ಳಿ ಗ್ರಾಮದ ರೈತರು ಗಿಡಗಳಿಗೆ ಕೊಡಲಿ ಏಟು ಕೊಟ್ಟು ನಾಶ ಪಡಿಸುತ್ತಿದ್ದಾರೆ.

ಹೊಸಳ್ಳಿ ಗ್ರಾಮದ ರೈತ ಸಂಗಪ್ಪ ಮೆಣಸಿನಕಾಯಿ ಎಂಬುವವರು ತಮ್ಮ ಮೂರು ಎಕರೆ ಜಮೀನಿನಲ್ಲಿ 80 ಸಾವಿರ ರೂ. ಖರ್ಚು ಮಾಡಿ 3000 ಗಿಡ ಬೆಳೆಸಿದ್ದರು. ಬೆಳೆಯೂ ಸಮೃದ್ಧವಾಗಿತ್ತು. ಈ ವರ್ಷ ಮೂರು ಲಕ್ಷ ರೂ.ಗಳ ಆದಾಯದ ನಿರೀಕ್ಷೆಯಲ್ಲಿದ್ದರು. ಆದರೆ, ಲಾಕ್​ಡೌನ್​ನಿಂದಾಗಿ ಸೂಕ್ತ ಮಾರುಕಟ್ಟೆ ಇಲ್ಲದೆ ನುಗ್ಗೆಕಾಯಿಗಳು ಗಿಡದಲ್ಲಿಯೇ ಒಣಗುತ್ತಿದ್ದವು. ಇದನ್ನು ನೋಡಲಾಗದೆ ಸಂಗಪ್ಪ ಎಲ್ಲ ಗಿಡಗಳನ್ನು ಕಡಿದಿದ್ದಾರೆ.

ಅದರಂತೆ ಅದೇ ಗ್ರಾಮದ ನುಗ್ಗೆ ಬೆಳೆಗಾರರಾದ ಕಳಕಪ್ಪ ಅಬ್ಬಿಗೇರಿ, ಕಳಕಪ್ಪ ಹೂಗಾರ, ಡಿ.ಬಿ. ಕಂಬಳಿ ಸೇರಿ ಇನ್ನಿತರ ರೈತರು ತಮ್ಮ ಹೊಲದಲ್ಲಿನ ನುಗ್ಗೆಕಾಯಿ ಗಿಡಗಳನ್ನು ಕಡಿದಿದ್ದಾರೆ. ಅಲ್ಲದೆ, ಸುತ್ತಮುತ್ತಲಿನ ಗ್ರಾಮಗಳಲ್ಲಿನ 25 ರಿಂದ 30 ಎಕರೆಯಲ್ಲಿ ಬೆಳೆದಿದ್ದ ನುಗ್ಗೆ ಗಿಡಗಳು ಕೊಡಲಿಯೇಟಿಗೆ ಬಲಿಯಾಗಿವೆ ಎಂದು ರೈತ ಸಂಗಪ್ಪ ಮೆಣಸಿನಕಾಯಿ ಹೇಳಿದರು.

EndFragment