ಹಿಂದೆ ಪ್ರತಿ ವರ್ಷ ಖಾಸಗಿ ಶಾಲೆಗಳಿಂದ ಸರಾಸರಿ 200 ರಿಂದ 300 ಮಕ್ಕಳು ಸರ್ಕಾರಿ ಶಾಲೆಯತ್ತ ಬರುತ್ತಿದ್ದರು. ಆದರೆ, ಈ ಬಾರಿ 2673 ಮಕ್ಕಳನ್ನು ದಾಖಲು ಮಾಡಿಕೊಳ್ಳಲಾಗಿದೆ ಎಂದು ಸಾರ್ವಜನಿಕ ಶಿಕ್ಷಣ ಇಲಾಖೆ ಮಾಹಿತಿ ನೀಡಿದೆ.ಕರೊನಾ ಹಿನ್ನೆಲೆಯಲ್ಲಿ ಈ ಭಾಗದ ಬಹುತೇಕರು ಆದಾಯವಿಲ್ಲದೆ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಉದ್ಯೋಗ ಕಳೆದುಕೊಂಡು ಜೀವನ ನಡೆಸಲು ಪರದಾಡುತ್ತಿದ್ದಾರೆ. ಇದರ ನಡುವೆಯೂ ತರಗತಿಗಳು ಪ್ರಾರಂಭವಾಗದಿದ್ದರೂ ಆನ್ ಲೈನ್ ಶಿಕ್ಷಣ, ಪಠ್ಯಪುಸ್ತಕ ಸೇರಿ ನಾನಾ ನೆಪದಲ್ಲಿ ಖಾಸಗಿ ಶಾಲೆಗಳು ದುಬಾರಿ ಶುಲ್ಕ ಮತ್ತು ಡೊನೇಷನ್ ಪೀಕಲು ಪಾಲಕರಿಗೆ ಕಾಟ ಕೊಡುತ್ತಿವೆೆ. ಮತ್ತೊಂದೆಡೆ ಜಿಲ್ಲೆಯಲ್ಲಿ ಸರ್ಕಾರಿ ಶಾಲೆಗಳಿಗೆ ಹೈಟೆಕ್ ಸ್ಪರ್ಶ, ಮಕ್ಕಳಿಗೆ ವಿಶೇಷ ಕಲಿಕೋಪಕರಣ ಸೌಲಭ್ಯದಿಂದ ಅಭಿವೃದ್ಧಿ ಹೊಂದಿ, ಆಕರ್ಷಕ ವಾತಾವರಣದ ಮೂಲಕ ಜನರನ್ನು ಸೆಳೆಯುತ್ತಿವೆೆ. ಜತೆಗೆ ವಿದ್ಯಾಗಮ ಯೋಜನೆಯು ಬಹುತೇಕ ಕಡೆ ಮೆಚ್ಚುಗೆಗೆ ಪಾತ್ರವಾಗಿದೆ. ಇದರಿಂದ ಮಕ್ಕಳನ್ನು ಖಾಸಗಿ ಶಾಲೆಗಳಿಂದ ಬಿಡಿಸಿ ಸರ್ಕಾರಿ ಶಾಲೆಗೆ ದಾಖಲಿಸಲಾಗಿದೆ.
