ಇದು ತಾಲೂಕಿನ ಹರದನಹಳ್ಳಿಯ ನಿವಾಸಿ, ಗ್ರಾಮ ಪಂಚಾಯಿತಿ ಸದಸ್ಯ ಮತ್ತು 2010-11ನೇ ಸಾಲಿನ ಜಿಲ್ಲಾ ಮಟ್ಟದ ಪ್ರಗತಿ ಪರ ರೈತ ಪ್ರಶಸ್ತಿ ಪುರಸ್ಕೃತ ಎನ್.ಮಂಜುನಾಥ್ ಅವರ ತೋಟದ ನೋಟ. ಗ್ರಾಮದಲ್ಲಿರುವ ಒಟ್ಟು 3 ಎಕರೆ 15 ಗುಂಟೆ ಜಮೀನಿನಲ್ಲಿ ಕೃಷಿ ಮಾಡುತ್ತಿದ್ದಾರೆ. ಮುಕ್ಕಾಲು ಎಕರೆಯಲ್ಲಿ ಅಂಗಾಂಶ ಕೃಷಿ ಮಾಡಿದ ಬಾಳೆ, 1 ಎಕರೆಯಲ್ಲಿ ಅರಿಶಿಣ, ಇನ್ನು ಮುಕ್ಕಾಲು ಎಕರೆಯಲ್ಲಿ ನೇಂದ್ರ ಬಾಳೆ, 15 ಗುಂಟೆ ಜಾಗದಲ್ಲಿ ಅಂಬಾಡಿ, ನಾಟಿ ತಳಿಯ ವೀಳ್ಯದೆಲೆ, 10 ಗುಂಟೆಯಲ್ಲಿ ನಿಂಬೆ, 180 ತೆಂಗು ಬೆಳೆದಿದ್ದಾರೆ. ಎಲ್ಲ ಬೆಳೆಗಳೂ ಉತ್ತಮವಾಗಿವೆ. ರೋಗ-ರುಜಿನವಿಲ್ಲದೆ ಹಚ್ಚ ಹರಿಸಿರಿನಿಂದ ಕಂಗೊಳಿಸುತ್ತಿವೆ. ಗಾತ್ರದಲ್ಲಿ ಜೋರಾಗಿರುವ ಬಾಳೆ ಗೊನೆಗಳು ಗಿಡದ ಆರೋಗ್ಯವನ್ನು ತಿಳಿಸುತ್ತಿವೆ. ಚೆನ್ನಾಗಿ ಬೆಳೆದಿರುವ ಅರಿಶಿಣವೂ ಸಮೃದ್ಧಿಯ ಸಂಕೇತವಾಗಿ ಕಾಣುತ್ತಿದೆ. ವೀಳ್ಯದೆಲೆ, ನಿಂಬೆ ಮತ್ತು ಸೊಪ್ಪು, ತೆಂಗು, ಮೇವಿನ ಬೆಳೆ ಹೀಗೆ ಮಿಶ್ರ ಬೆಳೆಗಳು ವೈವಿಧ್ಯಮಯ ಬೇಸಾಯವನ್ನು ತಿಳಿಸುತ್ತಿವೆ. 1 ಬೋರ್ವೆಲ್ ಇದ್ದು, ಹನಿ ನೀರಾವರಿ ಮೂಲಕ ಬೆಳೆಗಳಿಗೆ ಜಲ ನೀಡುತ್ತಿದ್ದಾರೆ.
