ಸಮೀಕ್ಷೆಗೆ ತೊಡಕಾದ ಸರ್ವರ್ ಸಮಸ್ಯೆ

ಕೊಳ್ಳೇಗಾಲ: ಪರಿಶಿಷ್ಟ ಜಾತಿ ಮೀಸಲು ವರ್ಗೀಕರಣ ಜಾರಿ ನಿಟ್ಟಿನಲ್ಲಿ ಪರಿಶಿಷ್ಟ ಜಾತಿಗಳ ಸಮೀಕ್ಷೆ ಆರಂಭ ಗೊಂಡಿದ್ದು. ಸಮೀಕ್ಷೆಯ ಎರಡನೇ ದಿನವಾದ ಮಂಗಳವಾರ ತಾಲೂಕಿನ ಮುಳ್ಳೂರು ಗ್ರಾಮದಲ್ಲಿ ಸರ್ವರ್ ಸಮಸ್ಯೆಯಿಂದ ಗಣತಿಗೆ ತೊಡಕಾಗಿದೆ.

ಸಮೀಕ್ಷೆದಾರರು ಮುಳ್ಳೂರು ಗ್ರಾಮದಲ್ಲಿ ಬೆಳಗ್ಗೆ 9 ಗಂಟೆಯಲ್ಲಿ ಸಮೀಕ್ಷೆ ಆರಂಭಿಸಿದ್ದು, ಆರಂಭದಲ್ಲಿ ಗ್ರಾಮದ ಪರಿಶಿಷ್ಟ ಜಾತಿಯ ಆದಿಜಾಂಬವ ಜನಾಂಗಕ್ಕೆ ಸೇರಿದ 1 ಕುಟುಂಬದ ನೋಂದಣಿ ಮಾತ್ರ ಆಗಿದೆ. ನಂತರ ಕಾಡಿದ ಸರ್ವರ್ ಸಮಸ್ಯೆಯಿಂದ ಮಧ್ಯಾಹ್ನ 2 ಗಂಟೆವರೆಗೂ ನೋಂದಣಿ ಮಾಡಲು ಸಾಧ್ಯವಾಗಿಲ್ಲ. ಮನೆ ಮನೆಗೆ ತೆರಳಿದ ಸಮೀಕ್ಷಾದಾರರು ನೋಂದಣಿ ಪ್ರಕ್ರಿಯೆ ಮಾಡಿದರೂ ಸರ್ವರ್ ಸಿಗದ ಕಾರಣ ಅಪ್‌ಲೌಡ್ ಆಗದೆ ಪರದಾಡುವ ಪರಿಸ್ಥಿತಿ ಕಂಡು ಬಂತು.