ವಿಜಯವಾಣಿ ಸುದ್ದಿಜಾಲ ಮೈಸೂರು
ಬದಲಾದ ಪರಿಸ್ಥಿತಿಗೆ ಅನುಗುಣವಾಗಿ ಒಕ್ಕಲಿಗ ತನ್ನ ವ್ಯವಸಾಯದ ವಿಧಾನ ಬದಲಿಸಿಕೊಳ್ಳಲು ಸೋಪಾನ. ‘ಸಮಗ್ರ ಕೃಷಿಯ ಯುಕ್ತಿ, ಲಾಭದಾಯಕ ಬೇಸಾಯದ ಶಕ್ತಿ’ ಎಂಬ ಪ್ರಮುಖ ಸಂದೇಶ ಸಾರುವುದರೊಂದಿಗೆ ಮೂರು ದಿನಗಳ ಕೃಷಿ ಮೇಳ ಶುಕ್ರವಾರ ಅರ್ಥಪೂರ್ಣ ಆರಂಭ ಕಂಡಿತು.
ಬಹು ಕೃಷಿ ಪದ್ಧತಿ ತೊಟ್ಟಿಲು ಎಂದೇ ಗುರುತಿಸಿಕೊಂಡ ಹಳೇ ಮೈಸೂರು ಪ್ರಾಂತ್ಯದ ಕೇಂದ್ರಸ್ಥಾನ, ಸಾಂಸ್ಕೃತಿಕ ನಗರಿ ಎಂದೇ ಹೆಸರಾದ ಮೈಸೂರು ಮತ್ತೊಂದು ಮಹತ್ವದ ವಿದ್ಯಮಾನಕ್ಕೆ ಸಾಕ್ಷಿಯಾಯಿತು.
‘ಸುಸ್ಥಿರ ಅಭಿವೃದ್ಧಿ ನಮ್ಮ ಗುರಿ’ ಪರಿಕಲ್ಪನೆಯಡಿ ವಿಆರ್ಎಲ್ ಸಮೂಹ ಸಂಸ್ಥೆಗಳ ವಿಜಯವಾಣಿ ಹಾಗೂ ದಿಗ್ವಿಜಯ ಸಾರಥ್ಯದಲ್ಲಿ ಇಲ್ಲಿನ ಮಹಾರಾಜ ಕಾಲೇಜು ಮೈದಾನದಲ್ಲಿ ಮೂರು ದಿನಗಳ ಕೃಷಿ ಮೇಳ ನಡೆಯಲಿದ್ದು, ಅನ್ನದಾತರಿಗೆ ಸುಸ್ಥಿರತೆಯ ಮಾರ್ಗಪಥ ಹಾಕಿಕೊಡುವ ಮುನ್ಸೂಚನೆ ನೀಡಿತು.
ಅನಾವರಣ
ಕರೋನೋತ್ತರ ಕಾಲಘಟ್ಟದಲ್ಲಿ ಉದ್ಯಮ-ವಹಿವಾಟು ವೃದ್ಧಿ, ಆರ್ಥಿಕತೆ ಚೇತರಿಕೆ, ಜನರಲ್ಲಿ ಕೊಂಡುಕೊಳ್ಳುವ ಶಕ್ತಿ ಹೆಚ್ಚಳಕ್ಕೆ ಕೃಷಿಯೇ ಮೂಲದ್ರವ್ಯವೆಂಬುದು ಕೃಷಿ ಮೇಳದ ಮೊದಲ ದಿನವೇ ನಿಚ್ಚಳವಾಯಿತು.
ಮಣ್ಣು ಸಂರಕ್ಷಣೆಯಿಂದ ಹಿಡಿದು ಮಾರುಕಟ್ಟೆ ಜ್ಞಾನ, ಜಲಸಂಪತ್ತು ಸದ್ಬಳಕೆ, ಮಿಶ್ರಬೆಳೆ, ಆಧುನೀಕರಣ, ಯಾಂತ್ರೀಕರಣ, ದಾಸ್ತಾನು, ಮೌಲ್ಯವರ್ಧನೆ, ಹೊಸ ಸಂಶೋಧನೆ, ಆವಿಷ್ಕಾರಗಳು, ಸಹಜ, ಸಾವಯವ, ಯೋಗಿಕ್, ನಿಖರ ಬೇಸಾಯ ತರಹೇವಾರಿ ಪದ್ಧತಿ, ಹೊಸತು ಅನಾವರಣಗೊಂಡಿತು.
ಪಶುಸಂಗೋಪನೆ, ಮೀನುಗಾರಿಕೆ, ಕುರಿ ಸಾಕಣೆ, ರಾಸುಗಳ ಹೊಸ ತಳಿಗಳು- ಅವುಗಳ ವೈಶಿಷ್ಟೃ ತಿಳಿದುಕೊಳ್ಳಲು ಅನುಭವಿ, ಪ್ರಗತಿಪರ ರೈತರ ಜತೆಗೆ ಯುವಜನರ ಆಸಕ್ತಿ, ಕೃಷಿಯೆಡೆಗಿನ ಹಂಬಲವನ್ನು ಎತ್ತಿ ತೋರಿಸಿತು. ವಿಚಾರಗೋಷ್ಠಿಗಳು ಗಹನವಾದ ವಿಷಯಗಳನ್ನು ಮೊಗೆದು ಕೊಟ್ಟರೆ, ಸಾಂಸ್ಕೃತಿಕ ಕಾರ್ಯಕ್ರಮಗಳು ದಣಿದ ಮನಗಳನ್ನು ಉಲ್ಲಸಿತಗೊಳಿಸಿದವು.
ವಿವಿಧ ಪ್ರದರ್ಶನ ಮಳಿಗೆಗಳಲ್ಲಿ ಪ್ರಗತಿಪರ ರೈತರು, ಕೃಷಿ ತಾಂತ್ರಿಕ ತಜ್ಞರು, ಉದ್ಯಮ-ವ್ಯಾಪಾರಿಗಳು ನೀಡುವ ಮಾಹಿತಿ, ಹಲವು ಬಗೆಯ ಉತ್ಪನ್ನಗಳು, ಕಡಿಮೆ ನೀರಿನಲ್ಲಿ ಹೆಚ್ಚು ಇಳುವರಿ ಪಡೆದ ತಂತ್ರಗಳು ಕಂಡುಂಡವರಿಗೆ ಕೃಷಿ ಲಾಭದಾಯಕವೂ ಹೌದು, ಸುಸ್ಥಿರ ಅಭಿವೃದ್ಧಿಯೂ ಸಾಧ್ಯವೆಂಬ ಭರವಸೆ ಕಟ್ಟಿಕೊಟ್ಟಿತು.
ಹುಮ್ಮಸ್ಸು ತುಂಬಿದ ಸಿಎಂ:
ಮೈದಾನದಲ್ಲಿ ಮೈದಳೆದ ಮಳಿಗೆಗಳು ಕೃಷಿಯ ಒಟ್ಟೂ ಸಾಧನೆ, ಸಾಧ್ಯತೆಗಳನ್ನು ತೆರೆದಿಟ್ಟರೆ, ಸರ್ಕಾರದ ನೀತಿ-ನಿರ್ಧಾರಗಳು ರೈತರ, ಕೃಷಿ ಬೆಳವಣಿಗೆಗೆ ಸದಾ ಒತ್ತಾಸೆ ನೀಡುತ್ತವೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳುವ ಮೂಲಕ ನೆರೆದ ಜನಸಮೂಹದಲ್ಲಿ ಹುಮ್ಮಸ್ಸು ತುಂಬಿದರು.
ಶ್ರೀಲಂಕಾ, ಪಾಕಿಸ್ತಾನ ಮತ್ತಿತರ ದೇಶಗಳಲ್ಲಿ ಆಹಾರಕ್ಕಾಗಿ ಹಾಹಾಕಾರ ತಲೆದೋರಿದೆ. ಬಲಾಢ್ಯ ರಾಷ್ಟ್ರಗಳು ಆರ್ಥಿಕ ಹಿಂಜರಿತದ ಭೀತಿಯಲ್ಲಿದ್ದರೆ, ಭಾರತ ಆಹಾರ ಭದ್ರತೆ ಸಾಧಿಸುವುದಕ್ಕೆ ಅನ್ನದಾತರು ಆಧಾರ ಸ್ತಂಭ. ಸರ್ಕಾರದ ನೀತಿ-ನಿರ್ಧಾರಗಳು ಕಾರಣವೆಂದು ಹೇಳುವ ಮೂಲಕ ಕೃಷಿ ಮಹತ್ವದತ್ತ ಗಮನ ಸೆಳೆದರು.
