ಹೊಸನಗರ:ಭೂ ಮಂಜೂರಾತಿ ಸಮಸ್ಯೆಗಳ ಇತ್ಯರ್ಥ ಸಂಬಂಧ ಕರಿಮನೆ ಗ್ರಾಪಂನಲ್ಲಿ ಶನಿವಾರ ಆಯೋಜಿಸಿದ್ದ ತುರ್ತು ಗ್ರಾಮಸಭೆಗೆ ಬರಲಾಗುವುದಿಲ್ಲ ಎಂದು ತಹಸೀಲ್ದಾರ್ ರಶ್ಮಿ ಹೇಳಿದ್ದಕ್ಕೆ ಆಕ್ರೋಶಗೊಂಡ ಗ್ರಾಮಸ್ಥರು, ಅಧಿಕಾರಿಗಳು ಹಾಗೂ ಪಂಚಾಯಿತಿ ಪ್ರತಿನಿಧಿಗಳನ್ನು ಕೂಡಿಹಾಕಿ ಆಕ್ರೋಶ ವ್ಯಕ್ತಪಡಿಸಿದರು.
ಭೂ ಮಂಜೂರಾತಿ ಆಗದ ಸಮಸ್ಯೆ ಸೇರಿದಂತೆ ಹಲವು ಸಮಸ್ಯೆಗಳ ಇತ್ಯರ್ಥಕ್ಕಾಗಿ ಸಭೆ ಆಯೋಜಿಸಲಾಗಿತ್ತು. ಈ ಬಗ್ಗೆ ತಹಸೀಲ್ದಾರ್ಗೆ ಮಾಹಿತಿ ನೀಡಿದ್ದರೂ ಬರುವುದಿಲ್ಲ ಎಂದು ಹೇಳಿದ್ದನ್ನು ಕೇಳಿ ಗ್ರಾಮಸ್ಥರು ಸಿಟ್ಟಿಗೆದ್ದರು.
ಕರಿಮನೆ ಗ್ರಾಪಂ ವ್ಯಾಪ್ತಿಯಲ್ಲಿ ಸಾಕಷ್ಟು ವರ್ಷಗಳಿಂದ ಜ್ವಲಂತ ಸಮಸ್ಯೆಗಳಿದ್ದರೂ ಅಧಿಕಾರಿಗಳು ಪರಿಹಾರ ಒದಗಿಸದೆ ನಿರ್ಲಕ್ಷೃ ತೋರುತ್ತಿದ್ದಾರೆ. ತಹಸೀಲ್ದಾರ್ಗೆ ಬನ್ನಿ ಮೇಡಂ ಅಂದರೆ, ಅವರು ಕಾರಣ ಹೇಳುತ್ತಾರೆ. ಹೀಗಿರುವಾಗ ಕೆಳಹಂತದ ಸಿಬ್ಬಂದಿಯನ್ನು ಕೂರಿಸಿಕೊಂಡು ಸಭೆಯಲ್ಲಿ ಏನು ಮಾಡುವುದು ಎಂದು ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದರು. ತಹಸೀಲ್ದಾರ್ ಸಭೆಗೆ ಬರಬೇಕು. ಅಲ್ಲಿಯವರೆಗೆ ಬಾಗಿಲು ತೆರೆಯಲ್ಲ ಎಂದು ಪಟ್ಟುಹಿಡಿದರು.
ಗ್ರಾಮದ ಪ್ರಮುಖರಾದ ದೇವಮ್ಮ ಗೋಪಾಲ್, ನಾಗರತ್ನ, ರಮೇಶ, ದೇವೇಂದ್ರಪ್ಪ, ಸತೀಶ ಪಟೇಲ್, ಪರ್ವತಪ್ಪ ಗೌಡ, ದೇವೇಂದ್ರ ಗೌಡ, ಹರೀಶ ಗೌಡ, ಅಂಬರೀಷ, ಮೂರ್ತಿ ಗೌಡ, ಸುಬ್ರಹ್ಮಣ್ಯ, ಗಣೇಶ, ರಾಮಪ್ಪ ಗೌಡ, ಸಂದೇಶ, ಗೋಪಾಲ ನಿಲ್ಸಕಲ್, ಸಿ.ಕೆ.ಸುಧಾಕರ್, ಜ್ಯೋತಿ, ಸುಶೀಲಾ, ಅನಿತಾ, ನೊಡೆಲ್ ಅಧಿಕಾರಿ ಕರಿಬಸವ ನಾಯ್ಕ ಮತ್ತಿತರರಿದ್ದರು.
