ಸಂತ ಸೇವಾಲಾಲ್ ಪವಾಡ ಪುರುಷರು: ಡಾ. ದೇವರಾಜ ನಾಯಕ್ ಬಣ್ಣನೆ

ಹಾಸನ: ಸಂತ ಸೇವಾಲಾಲ್ ಅವರು ದೈವ ಪುರುಷರು ಹಾಗೂ ಪವಾಡ ಪುರುಷರಾಗಿದ್ದರು. ಹಸಿದವರಿಗೆ ಊಟ ಕೊಡಿ, ಬಾಯಾರಿದವರಿಗೆ ನೀರು ಕೊಡಿ, ಕ್ರೋದ, ದ್ವೇಷ ಅಸೂಯೆಗಳನ್ನು ದೂರ ಮಾಡಿ ಎಂದು ಇಡೀ ಸಮಾಜಕ್ಕೆ ಉತ್ತಮ ಸಂದೇಶ ಸಾರಿದವರು ಎಂದು ಪಶುವೈದ್ಯಕೀಯ ಮಹಾವಿದ್ಯಾಲಯದ ಪ್ರಾಧ್ಯಾಪಕ ಡಾ. ಎಚ್. ದೇವರಾಜ ನಾಯಕ್ ತಿಳಿಸಿದರು.

ಜಿಲ್ಲಾಡಳಿತ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ಶನಿವಾರ ಹಾಸನಾಂಬ ಕಲಾಕ್ಷೇತ್ರದಲ್ಲಿ ಆಯೋಜಿಸಿದ್ದ ಶ್ರೀ ಸಂತ ಸೇವಾಲಾಲ್ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಬಂಜಾರ ಸಮುದಾಯದವರಾದ ನಾವು ಹಿಂದು ರಾಜರ ಬಳಿ ನೂರಾರು ದಿನಗಳು ನಡೆಯುವಂತಹ ಯುದ್ಧಗಳಿಗೆ ಬೆನ್ನೆಲುಬಾಗಿ ನಿಂತು ದವಸ ಧಾನ್ಯಗಳು, ಆಯುಧಗಳು, ಬಟ್ಟೆ ಇತ್ಯಾದಿಗಳನ್ನು ಸೈನಿಕರಿಗೆ ಒದಗಿಸುವಂತಹ ಕೆಲಸವನ್ನು ಮಾಡುತ್ತಿದ್ದೆವು. ಮಹಾರಾಜರು ಯುದ್ಧವನ್ನು ಗೆಲ್ಲಲು ಬಂಜಾರ ಸಮುದಾಯದವರು ಸಹಕಾರ ನೀಡುತ್ತಿದ್ದರು ಎಂದು ಹೇಳಿದರು.

ಗುಜರಾತ್, ರಾಜಸ್ಥಾನ, ಪುಣೆ, ಮಹಾರಾಷ್ಟ್ರ ಪೇಶ್ವೆಗಳು, ಹೈದರಾಬಾದಿನ ನಿಜಾಮರು, ಇವರೆಲ್ಲರಿಗೂ ಅಡ್ಡವಾಗಿ ನಿಂತು ಪ್ರತಿಯೊಂದು ಯುದ್ಧದಲ್ಲಿ ಅವರುಗಳು ಸೋಲನ್ನು ಕಾಣಲು ಮುಖ್ಯ ಕಾರಣ ಬಂಜಾರ ಸಮುದಾಯದವರಾಗಿದ್ದೇವೆ. ಲಂಬಾಣಿ ಸಮುದಾಯದ ಸಾಂಸ್ಕೃತಿಕ ಉಡುಪುಗಳು, ನೃತ್ಯಗಳು ವಿಶೇಷವಾದವುಗಳಾಗಿವೆ ಎಂದ ಅವರು ಸೇವಾಲಾಲ್ ಅವರ ಬಗ್ಗೆ ಸವಿವರವಾಗಿ ಉಪನ್ಯಾಸ ನೀಡಿದರು.

ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಡಾ. ಎಚ್ ಎಲ್ ಮಲ್ಲೇಶಗೌಡ ಅವರು ಮಾತನಾಡಿ, ಸರ್ಕಾರದ ಉದ್ದೇಶ ಮಹನೀಯರ ಜಯಂತಿಗಳನ್ನು ಆಯಾ ಜಾತಿಯವರು ಮಾತ್ರವೇ ಆಚರಿಸಬೇಕೆಂಬುದು. ಅಲ್ಲ ಈ ನೆಲದ ಮೂಲ ಸತ್ವ , ಮೂಲ ಸಂಸ್ಕೃತಿ, ಸಂಸ್ಕಾರವನ್ನು ಇನ್ನು ಸುದೀರ್ಘವಾಗಿ ಮುಂದಕ್ಕೆ ಕೊಂಡಯ್ಯಬೇಕೆಂದರೆ ಸೇವಾಲಾಲ್ ರಂತಹ ಮಹನೀಯರ ಜಯಂತಿಗಳನ್ನು ಸಮುದಾಯದ ಹಾಗೂ ನಾಡಿನ ಎಲ್ಲ ಜನಾಂಗದವರು ಒಟ್ಟುಗೂಡಿ ಆಚರಿಸಬೇಕು ಎಂದರು.

ಸಂಸ್ಕಾರ, ಸಾಮರಸ್ಯ ಕೊಡಬೇಕಾಗಿದ್ದಂತಹ ಶಿಕ್ಷಣ ಒಂದು ಹೊಸ ಬದುಕನ್ನು ಕಟ್ಟಿಕೊಳ್ಳಲು ಅನುವು ಮಾಡಿಕೊಡಬೇಕಾಗಿದ್ದಂತಹ ನಾಗರಿಕತೆ ನಮ್ಮನ್ನು ಕುಬ್ಜರನ್ನಾಗಿ ಮಾಡುತ್ತಿದೆ. ಇಂದು ಜಾತಿಯನ್ನು ತೊಡೆದು ಹಾಕುವ ಭರದಲ್ಲಿ ಜಾತೀಯತೆಯನ್ನು ಹೆಚ್ಚು ಬಿತ್ತುತ್ತಿದ್ದೇವೆ ಅನ್ನಿಸುತ್ತಿದೆ. ಹಾಗಾಗಿ ಮಹಾನುಭಾವರು ಹೇಳಿರುವಂತಹ ಅವರ ತತ್ವಗಳು, ಆದರ್ಶಗಳು ಆಚರಣೆಗೆ ಬರಬೇಕು ಎಂದು ಆಶಿಸಿದರು.

ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಬಿ.ಪಿ ಕೃಷ್ಣೇಗೌಡ ಮಾತನಾಡಿ, ಸೇವಾಲಾಲ್ ಅವರು ಕೇವಲ ಒಂದು ಜಾತಿಗೆ ಮೀಸಲಾದವರಲ್ಲ. ಅವರ ಕೊಡುಗೆಗಳು, ಮಾರ್ಗದರ್ಶನಗಳನ್ನು ಎಲ್ಲ ಜನಾಂಗಕ್ಕೆ ನೀಡಿದ್ದಾರೆ. ಹಾಗಾಗಿ ಇಂತಹ ಮಹನೀಯರ ಆದರ್ಶಗಳನ್ನು ನಾವೆಲ್ಲರೂ ಅಳವಡಿಸಿಕೊಳ್ಳಬೇಕು ಎಂದು ಹೇಳಿದರು.

ಸರ್ಕಾರಿ ಬಾಲಕಿಯರ ಪದವಿ ಪೂರ್ವ ಕಾಲೇಜಿನ(ವಿಭಜಿತ) ಉಪ ಪ್ರಾಂಶುಪಾಲ ಕುಮಾರ್ ನಾಯಕ್ ರಚಿಸಿರುವ ‘ಶ್ರೀ ಸಂತ ಸೇವಾಲಾಲ್’ ಎಂಬ ಶೀರ್ಷಿಕೆಯ ಲಂಬಾಣಿ ಭಾಷೆಯ ಪದಗಳು, ಆ ಪದಗಳಿಗೆ ಕನ್ನಡ, ಇಂಗ್ಲಿಷ್ ಭಾಷೆಯಲ್ಲಿ ಇರುವ ಅರ್ಥಗಳ ಒಳಗೊಂಡಿರುವ ಶಬ್ದಕೋಶವನ್ನು ಬಿಡುಗಡೆ ಮಾಡಲಾಯಿತು.

ಕಾರ್ಯಕ್ರಮದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕ ಡಾ.ಎಚ್.ಪಿ ತಾರಾನಾಥ್, ಶಿರಸ್ತೇದಾರ್ ಯಶೋದರಾ, ಮತ್ತಿತರರು ಉಪಸ್ಥಿತರಿದ್ದರು.

ಮೆರವಣಿಗೆಗೆ ಚಾಲನೆ

ಜಿಲ್ಲಾಡಳಿತ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ಹಮ್ಮಿಕೊಂಡಿರುವ ಶ್ರೀ ಸಂತ ಸೇವಾಲಾಲ್ ಜಯಂತಿಗೆ ಜಿಲ್ಲಾಧಿಕಾರಿಗಳ ಕಚೇರಿ ಆವರಣದಲ್ಲಿ ಉಪವಿಭಾಗಾಧಿಕಾರಿ ಮಾರುತಿ ಅವರು ಸಂತ ಸೇವಾಲಾಲ್ ಅವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವುದರೊಂದಿಗೆ ಮೆರವಣಿಗೆಗೆ ಚಾಲನೆ ನೀಡಿದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕರಾದ ಡಾ.ಎಚ್.ಪಿ ತಾರಾನಾಥ್ ಹಾಗೂ ಸಮುದಾಯದ ಮುಖಂಡರು ಹಾಜರಿದ್ದರು.