ಭಕ್ತರು ಪರದಾಟ: ಚಾಮರಾಯನಕೋಟೆ ಮೈಸೂರು ಜಿಲ್ಲೆಯ ಗಡಿಗ್ರಾಮವಾಗಿದ್ದು, ಹಾಸನ ಮತ್ತು ಮಡಿಕೇರಿ ಜಿಲ್ಲೆಗೆ ಸಮೀಪವಾಗಿದೆ. ಅಲ್ಲದೆ, ಈ ಗ್ರಾಮದಲ್ಲಿ ಕಾವೇರಿ ನದಿ ಹಾದು ಹೋಗಿದೆ. ನದಿಯ ಬೃಹತ್ ಬಂಡೆಯಲ್ಲಿ ಆಂಜನೇಯಸ್ವಾಮಿ ಮೂಡಿದ್ದು, ಇದರಿಂದ ಈ ಸ್ಥಳವನ್ನು ಹೊಳೆ ಆಂಜನೇಯಸ್ವಾಮಿ ಗುಡಿ ಎಂದು ಕರೆಯುತ್ತಾರೆ. ಈ ಗುಡಿಗೆ ನಿತ್ಯ ಭಕ್ತಾದಿಗಳು ಆಗಮಿಸುತ್ತಿದ್ದು, ಗುಡಿಯ ಆವರಣದಲ್ಲಿ ನಾಮಕರಣ, ಬೀಗರ ಔತಣ, ಭೋಜನ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದ್ದು, ಕುಡಿಯುವ ನೀರಿಗಾಗಿ ಪರದಾಡುವ ಸ್ಥಿತಿ ಬಂದಿದೆ. ಹೀಗಾಗಿ ಕುಡಿಯುವ ನೀರಿಗಾಗಿ ಸುಮಾರು 5 ರಿಂದ 7 ಕೀ.ಮೀ ದೂರದ ಗ್ರಾಮಗಳಿಗೆ ಹೋಗಿ ತರಬೇಕಾಗಿರುವ ಪರಿಸ್ಥಿತಿ ಉಂಟಾಗಿದೆ. ಇದು ಕೇವಲ ಭಕ್ತಾದಿಗಳು ಮಾತ್ರವಲ್ಲದೆ, ಇಲ್ಲಿನ ನಿವಾಸಿಗಳಿಗೂ ಸಮಸ್ಯೆಯಾಗಿದೆ.
