ಜಿಪಂ ತ್ವರಿತ ಗ್ರಾಮೀಣ ನೀರು ಸರಬರಾಜು ಯೋಜನೆಯಡಿ ನಿರ್ಮಾಣಗೊಂಡಿದ್ದ ಟ್ಯಾಂಕ್ ಅನ್ನು ಅಂದಿನ ಸಚಿವ ಡಾ.ಎಂ.ಶಂಕರ್ನಾಯಕ್ ಅವರು 1998ರ ಸೆ.24ರಂದು ಉದ್ಘಾಟಿಸಿದ್ದರು. ಶಿಥಿಲಗೊಂಡಿದೆ ಎಂಬ ಕಾರಣಕ್ಕಾಗಿ ಟ್ಯಾಂಕ್ ಬಳಸುತ್ತಿಲ್ಲ. ಪಿಲ್ಲರ್ಗಳಿಗೆ ಹಾಕಲಾಗಿದ್ದ ಕಾಂಕ್ರೀಟ್ ಕಿತ್ತು ಬಂದು, ಕಬ್ಬಿಣದ ಹಂದರ ಕಾಣುತ್ತಿದೆ. ಇದರಿಂದಾಗಿ ಟ್ಯಾಂಕ್ ಬೀಳುವ ಅಪಾಯ ಹೆಚ್ಚಾಗಿದ್ದು, ಇದರ ಸುತ್ತಮುತ್ತಲಿರುವ ಹತ್ತಾರು ಮನೆಗಳ ನಿವಾಸಿಗಳು ಜೀವಭಯದಲ್ಲೇ ಜೀವಿಸುತ್ತಿದ್ದಾರೆ. ಸಾಲದ್ದಕ್ಕೆ ಟ್ಯಾಂಕ್ ಇರುವ ಪ್ರದೇಶದಲ್ಲಿ ಶಾಲೆಯ ಮಕ್ಕಳು ಹಾಗೂ ಗ್ರಾಪಂ ಕಾರ್ಯಾಲಯಕ್ಕೆ ನಿತ್ಯವೂ ನೂರಾರು ಜನರು ಓಡಾಡುತ್ತಾರೆ. ಇವರೂ ಕೂಡ ಜೀವ ಕೈಯಲ್ಲಿ ಹಿಡಿದು ಓಡಾಡುವುದು ಅನಿವಾರ್ಯವಾಗಿದೆ.
