ಕೋಲಾರ: ಪರೀಕ್ಷೆಗಳು ಸಮೀಪಿಸುತ್ತಿರುವ ಸಂದರ್ಭದಲ್ಲಿ ವಿಷಯವಾರು ಶಿಕ್ಷಕರು ಇಲ್ಲದಿದ್ದರೆ ಮಕ್ಕಳ ಭವಿಷ್ಯ ಏನು? ನಾವು ಬಡವರಾದ ಕಾರಣ ನಮ್ಮ ಮಕ್ಕಳನ್ನು ಸರ್ಕಾರಿ ಶಾಲೆಗಳಲ್ಲಿ ಓದಿಸುತ್ತಿದ್ದೇವೆ. ಶಾಲೆಯಲ್ಲಿ ಬೋಧಿಸಲು ಶಿಕ್ಷಕರೇ ಇಲ್ಲದಿದ್ದರೆ ಹೇಗೆ ಎಂದು ಪಾಲಕರು ಪ್ರಶ್ನಿಸಿ ಮುದುವಾಡಿ ಸರ್ಕಾರಿ ಪ್ರೌಢಶಾಲೆಯ ಮುಖ್ಯಶಿಕ್ಷಕಿಯನ್ನು ಸೋಮವಾರ ತರಾಟೆಗೆ ತೆಗೆದುಕೊಂಡರು.
ಶಾಲೆಯಲ್ಲಿ ಸಮಾಜ ಶಿಕ್ಷಕರಿಲ್ಲ, ಶೈಕ್ಷಣಿಕ ವರ್ಷದಿಂದಲೂ ಹಿಂದಿ ಶಿಕ್ಷಕರಿಲ್ಲ ಎಂದು ಆರೋಪಿಸಿ ಮುದುವಾಡಿ ಸರ್ಕಾರಿ ಪ್ರೌಢಶಾಲೆಯ ವಿದ್ಯಾರ್ಥಿಗಳು ಸೋಮವಾರ ಬೆಳಗ್ಗೆ ಶಾಲೆಯ ಆವರಣದಲ್ಲಿ ಪ್ರತಿಭಟೆನೆಗೆ ಮುಂದಾದರು. ಬಳಿಕ ಮಕ್ಕಳ ಜತೆಗೆ ಪಾಲಕರು ಭಾಗವಹಿಸಿದರು.
ಮುಖ್ಯ ಶಿಕ್ಷಕಿ ರಹಿನಾಬಾನು ಅವರು ಬೆಳಗ್ಗೆ 10.30ಕ್ಕೆ ಶಾಲೆಗೆ ಆಗಮಿಸಿದಾಗ ಮಕ್ಕಳು ಧರಣಿ ಕುಳಿತಿರುವುದನ್ನು ಕಂಡು ಬೆರಗಾದರು. ಬಳಿಕ ಪಾಲಕರಾದ ಮಂಜುನಾಥ್ ರೆಡ್ಡಿ, ಶ್ರೀನಿವಾಸ್, ಮಂಜು, ಚೌಡಪ್ಪ ಮೊದಲಾದವರು ಮುಖ್ಯಶಿಕ್ಷಕಿಯನ್ನು ತರಾಟೆಗೆ ತೆಗೆದುಕೊಂಡರು. ಶಾಲೆಯಲ್ಲಿ ಇದ್ದ ಸಮಾಜ ವಿಜ್ಞಾನ ಅತಿಥಿ ಶಿಕ್ಷಕಿಯನ್ನು ಯಾಕೆ ತೆಗೆದಿದ್ದು, ಪರೀಕ್ಷೆಗಳು ಹತ್ತಿರಕ್ಕೆ ಬರುತ್ತಿವೆ. ಹಿಂದಿ ಶಿಕ್ಷಕರಿಲ್ಲ. ನೀವು ಈ ಶಾಲೆಗೆ ಬಂದ 6 ತಿಂಗಳಿನಿಂದ ಒಂದಲ್ಲ ಒಂದು ರೀತಿಯಲ್ಲಿ ಸಮಸ್ಯೆ ಎದುರಾಗುತ್ತಿವೆ ಎಂದು ಆರೋಪಿಸಿದರು.
ಮಕ್ಕಳಲ್ಲಿ ಧಾರ್ಮಿಕ ತಾರತಮ್ಯಮಾಡುತ್ತಿದ್ದೀರಿ, ಮಕ್ಕಳನ್ನು ದೇವಸ್ಥಾನಕ್ಕೆ ತೆರಳಲು ಬಿಡುತ್ತಿಲ್ಲ. ನೀವು ಶುಕ್ರವಾರ ಮಧ್ಯಾಹ್ನ ಪ್ರಾರ್ಥನೆ ಮಾಡುತ್ತೀರಿ. ಆ ಬಗ್ಗೆ ನಾವು ಅಡ್ಡಿಪಡಿಸಿಲ್ಲ. ನಮ್ಮ ಮಕ್ಕಳು ದೇವಸ್ಥಾನಕ್ಕೆ ಹೋಗಲು ರಜೆ ಕೇಳಿದರೆ ಬಿಡುತ್ತಿಲ್ಲ. ಊಟ ಮಾಡಿಕೊಂಡು ಬರಲು ಬಿಡುತ್ತಿಲ್ಲ, ಪಾಲಕರು ಬಂದರೂ ಬಿಡುತ್ತಿಲ್ಲ. ಈ ರೀತಿ ತಾರತಮ್ಯ ಸರಿಯಿಲ್ಲ ಎಂದು ಮುಖ್ಯ ಶಿಕ್ಷಕಿಯನ್ನು ಪಾಲಕರಾದ ಮಂಜುನಾಥರೆಡ್ಡಿ ತೀವ್ರ ತರಾಟೆಗೆ ತೆಗೆದುಕೊಂಡರು.
