ಆರ್.ಕೃಷ್ಣ ಮೈಸೂರು
ಸರ್ಕಾರ ಉಚಿತ ಬಸ್ ಪ್ರಯಾಣ ಘೋಷಣೆ ಮಾಡುವುದರ ಮೂಲಕ ಮಹಿಳೆಯರು ಖಷಿಪಡುವಂತೆ ಮಾಡಿದ್ದರೆ, ಮತ್ತೊಂದೆಡೆ ಮುಖ್ಯಮಂತ್ರಿ ತವರು ಜಿಲ್ಲೆಯಲ್ಲಿಯೇ ರಾತ್ರಿ ವೇಳೆ ನಗರ ಸಾರಿಗೆ ಬಸ್ ಸೌಲಭ್ಯ ಇಲ್ಲದೆ ಪ್ರಯಾಣಿಕರು ಪರದಾಡಬೇಕಿದೆ.
ಪ್ರವಾಸಿತಾಣ, ಸಾಂಸ್ಕೃತಿಕ ನಗರಿ ಎನ್ನುವ ಖ್ಯಾತಿಯ ನಗರದಲ್ಲಿ ರಾತ್ರಿ ಒಂಬತ್ತು ಗಂಟೆ ನಂತರ ನಗರ ಸಾರಿಗೆ ಬಸ್ ವ್ಯವಸ್ಥೆ ಇಲ್ಲದೆ ಪ್ರಯಾಣಿಕರಿಗೆ ತೊಂದರೆ ಆಗುತ್ತಿದೆ. ಇದರಿಂದ ಜನರು ದುಪ್ಪಟ್ಟು ಹಣ ನೀಡಿ ಆಟೋ, ಇಲ್ಲವೇ ಸ್ವಂತ ವಾಹನಗಳ ಮೂಲಕ ಮನೆ ತಲುಪಬೇಕಾದ ಪರಿಸ್ಥಿತಿ ಉಂಟಾಗಿದೆ.
ಬೆಂಗಳೂರು ಬಳಿಕ ವೇಗವಾಗಿ ಬೆಳೆಯುತ್ತಿರುವ ಮೈಸೂರು ನಗರಕ್ಕೆ ಹೊರ ಜಿಲ್ಲೆ, ಹೊರ ರಾಜ್ಯಗಳಿಂದಲೂ ಸಂಪರ್ಕ ಕಲ್ಪಿಸಲು ಸುಸಜ್ಜಿತ ರಸ್ತೆಗಳನ್ನು ನಿರ್ಮಿಸಲಾಗಿದೆ. ಬೆಂಗಳೂರು-ಮೈಸೂರು ನಡುವೆ ದಶಪಥ ರಸ್ತೆ ಅಲ್ಲದೆ ಜೋಡಿ ರೈಲು ಮಾರ್ಗ, ವಿಮಾನ ಯಾನ ಸಂಪರ್ಕ ಸಹ ಕಲ್ಪಿಸಲಾಗಿದೆ. ಹೀಗಾಗಿ ರಾತ್ರಿ, ಹಗಲು ಎನ್ನದೆ ಪ್ರಯಾಣಿಕರ ಓಡಾಟ ಇದ್ದೇ ಇರುತ್ತದೆ.
ಮೈಸೂರು-ಬೆಂಗಳೂರು ನಡುವೆ ರಾತ್ರಿಯಿಡೀ ಬಸ್ ಸೌಲಭ್ಯ ಇರುವ ಜತೆಗೆ, ಮುಂಜಾನೆ 5 ಗಂಟೆಯಿಂದಲೇ ಹೆಚ್ಚಿನ ಕೆಎಸ್ಆರ್ಟಿಸಿ ಬಸ್ ಸೌಲಭ್ಯ ಕಲ್ಪಿಸಲಾಗುತ್ತಿದೆ. ಆದರೆ ಇದಕ್ಕೆ ಪೂರಕವಾಗಿ ನಗರ ವ್ಯಾಪ್ತಿಯಲ್ಲಿ ಸಂಚರಿಸಲು ಬಸ್ಗಳ ವ್ಯವಸ್ಥೆ ಇಲ್ಲ. ಬೆಳಗ್ಗೆ 6 ಅಥವಾ 7 ಗಂಟೆಯಿಂದ ಬಸ್ಗಳ ಸಂಚಾರ ಆರಂಭವಾಗುತ್ತದೆ. ಮತ್ತೊಂದೆಡೆ, ರಾತ್ರಿ 8.30ರಿಂದ 9 ಗಂಟೆ ಒಳಗೆ ಬಹುತೇಕ ನಗರ ಸಾರಿಗೆ ಬಸ್ ಸಂಚಾರ ಸ್ಥಗಿತಗೊಳ್ಳುತ್ತದೆ. ಹೀಗಾಗಿ ಹೊರಗಿನಿಂದ ನಗರಕ್ಕೆ ಕೆಎಸ್ಆರ್ಟಿಸಿ ಬಸ್ ಸೌಲಭ್ಯ ಇದ್ದರೂ, ನಗರದ ಒಳಗೆ ಬಡಾವಣೆಗಳಿಗೆ ತೆರಳಲು ಸೂಕ್ತ ನಗರ ಸಾರಿಗೆ ಬಸ್ಗಳಿಲ್ಲ.
ಪ್ರಯಾಣಿಕರ ಗೋಳು ಹೇಳತೀರದು:
ಕೆಎಸ್ಆರ್ಟಿಸಿ ಬಸ್ಗಳಲ್ಲಿ ಬರುವ ಪ್ರಯಾಣಿಕರು ಒಂದೆಡೆಯಾದರೆ, ರೈಲುಗಳಲ್ಲಿ ತಡರಾತ್ರಿಯಲ್ಲಿಯೂ ಬರುವ ಪ್ರಯಾಣಿಕರ ಗೋಳು ಹೇಳತೀರದಾಗಿದೆ.
ರೈಲುಗಳಲ್ಲಿ ಬರುವ ಪ್ರಯಾಣಿಕರು ನಗರ ಸಾರಿಗೆ ಬಸ್ ಸೌಲಭ್ಯವಿಲ್ಲದೆ ಖಾಸಗಿ ವಾಹನಗಳು, ಆಟೋಗಳ ಮೊರೆ ಹೋಗುತ್ತಾರೆ. ಕೆಲ ಬಸ್ಗಳಿದ್ದರೂ ಅವು ಗ್ರಾಮಾಂತರ ಬಸ್ ನಿಲ್ದಾಣ, ನಗರ ಬಸ್ ನಿಲ್ದಾಣಕ್ಕೆ ತೆರಳುತ್ತವೆ. ಆದರೆ ಅಲ್ಲಿಂದ ಬೇರೆ ಬಡಾವಣೆಗಳಿಗೆ ತೆರಳಲು ಯಾವುದೇ ಬಸ್ ಸೌಲಭ್ಯವಿಲ್ಲ.
