ವಿಜಯಪುರದ ಕೋಲಾರ-ದೇವನಹಳ್ಳಿ ಬೈಪಾಸ್ ರಸ್ತೆ ಕಾಮಗಾರಿ ಅಪೂರ್ಣ, ಹೆಚ್ಚಿದ ಅಪಘಾತ

ವಿಜಯಪುರ: ಪಟ್ಟಣದ ಕೋಲಾರ-ದೇವನಹಳ್ಳಿ ಬೈಪಾಸ್ ರಸ್ತೆಯ ವಿಸ್ತರಣೆ ಕಾಮಗಾರಿ ಹಲವು ವರ್ಷಗಳಿಂದ ಕುಂಟುತ್ತಾ ಸಾಗಿದ್ದು, ರಸ್ತೆ ಎರಡೂ ಬದಿಯಲ್ಲಿ ಹಳ್ಳ ತೋಡಿರುವುದರಿಂದ ವಾಹನಗಳು ಹಳ್ಳಕ್ಕೆ ಬಿದ್ದು, ಅಪಘಾತ ಪ್ರಕರಣ ಹೆಚ್ಚುತ್ತಿವೆ.

ಮಹಾರಾಷ್ಟ್ರದಿಂದ ಕೋಲಾರಕ್ಕೆ ಕೋಳಿಗೊಬ್ಬರ ಸಾಗಿಸುತ್ತಿದ್ದ 16 ಚಕ್ರಗಳ ಲಾರಿ ಮಂಗಳವಾರ ಪಲ್ಟಿಯಾಗಿದೆ. ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.

ಕೋಲಾರ-ದೇವನಹಳ್ಳಿ ಮಾರ್ಗದ ಪ್ರಮುಖ ಹೆದ್ದಾರಿ ಇದಾಗಿದ್ದು, ವಾಹನ ದಟ್ಟಣೆ ಇದ್ದು, ಬೈಪಾಸ್‌ನ ಸುಮಾರು 4 ಕಿಮೀ ರಸ್ತೆ ಪೈಕಿ 2 ಕಿಮೀಗೂ ಹೆಚ್ಚು ಡಾಂಬರೀಕರಣ ಪೂರ್ಣಗೊಂಡಿದೆ. ಆದರೆ ಉಳಿದ ಕೆಲವೆಡೆ ಕಾಮಗಾರಿ ಮೊಟುಕುಗೊಂಡಿದ್ದು, ವೇಗವಾಗಿ ಬರುವ ವಾಹನಗಳು ಆಗಾಗ್ಗೆ ಅಪಘಾತಕ್ಕೀಡಾಗುವುದು ಸಾಮಾನ್ಯವಾಗಿದೆ. ಇನ್ನಾದರೂ ಸಂಬಂಧಿಸಿದ ಇಲಾಖೆ, ಕಾಮಗಾರಿ ಪೂರ್ಣಗೊಳಿಸಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.